Abaana ‘n’Obuhunguzi Kuruga Ahari [Yehova]’

NIKI ekirikukwija omu biteekateeko waahurira ekigambo “obuhunguzi”? Noobaasa kuteekateeka aha sente, ekibanja, nari ekindi eki orikuhungura aha muntu ou orikukunda. Hatariho kubangaanisa, kyona eki turikuhungura nitukitwara nk’eky’omuhendo kandi nituba nitwenda kukireeberera gye.

Baibuli neegira ngu abaana ‘n’obuhunguzi kuruga ahari [Yehova].’ (Zab. 127:3) Hatariho okubangaanisa, abazaire Abakristaayo nibareeba abaana baabo nk’ebiconco by’omuhendo kuruga ahari Tataitwe ow’omu iguru, kandi nibaba nibenda kukora kyona eki barikubaasa kubarinda, n’okubareeberera omu by’omubiri, omu nyehurira, n’omu by’omwoyo.

Kwonka eky’obusaasi, abazaire abamwe tibarikureeba abaana baabo nk’ebiconco kuruga ahari Ruhanga. (Isa. 49:15; 2 Tim. 3:1-3) Kandi abandi nibaba nibenda kureeberera gye abaana baabo kwonka bagumirwa kukikora ahabw’oburemeezi butari bumwe. Mbwenu shi ni buremeezi ki oburikureetera abazaire kugumirwa kureeberera abaana baabo? Yehova naayenda ngu abazaire bakore ki? Kandi abazaire Abakristaayo nibabaasa kukora ki kuba abasinguzi omu kworora abaana baabo?

OBUREMEEZI

Okugyemeserezibwa ab’eka nari ab’ekyanga kyaitu. Omu mahanga agamwe, abazaire abaine abaana baingi nibakira kuheebwa ekitiinisa omu kicweka kyabo. N’ahabw’ekyo abari omu bushwere nibabaasa kugyemeserezibwa abanyabuzaare baabo nari abataahi kuzaara abaana baingi obundi abu batarikubaasa kureeberera.
Okwerarikirira aha biro by’omumaisho. Omu mahanga agamwe abaana bato nibafa munonga ahabw’eibura ry’eby’okurya, endwara n’obujanjabi obutari aha mutindo. Omu mbeera nk’ezo abazaire abamwe nibacwamu kuzaara abaana baingi kugira ngu hagire abaakura. Abazaire abandi nibacwamu kuzaara abaana baingi kugira ngu baije babareeberere bahika omu myaka ya bukuru. Ekyo nikikira kubaho omu mahanga ahu gavumenti zitaine ntebeekanisa y’okureeberera abari omu myaka ya bukuru.
Okubariirira oruzaaro. Omu ebicweka ebimwe, abazaire nibagumirwa kutunga obuheereza bw’okubariirira oruzaaro. Abandi nibatiina oburemeezi oburikuruga omu miringo emwe ey’okubariirira oruzaaro etarikuhikaana n’omutindo. Kandi abandi tibarikubaasa kwehitsyaho obuheereza obwo ahabw’okugira ngu nibwetengyesa sente nyingi.a

YEHOVA NAAYENDA NGU ABAZAIRE BAKORE KI?

Eka eri omu mwanya murungi gw’okuhuumuriramu barikumara hamwe obwire. Omuzaire omushaija ahurikiize n’obwegyendesereza ebi omuhara arikumugambira obwo nyinabo naazaana omupiira na mutabani waabo. — Gira obwire bw’okuba na buri omwe aha baana baawe

Mureeberere abaana baanyu omu by’omubiri. Yehova ahaire abazaire obujunaanizibwa bw’okureeberera abaana baabo abarikutuura omu ka. Naayenda ngu abazaire babe beeteekateekire kukora n’amaani kuha buri mwana eby’okurya, ebijwaro, n’oburaaro. Kandi Yehova naayenda ngu abazaire bahwere abaana baabo kutunga obwegyese. N’ahabw’ekyo abazaire Abakristaayo tibarikwikiriza abaana baabo kushoma barikuraara aha ishomero. Kureka nibahamya ngu baabeekuriza kugira ngu batunge obwegyese oburungi, kandi baareebererwe gye. Ekyo nikireetera abaana kuhurira baine burinzi kandi barikukundwa. Kwonka nabwo Yehova tarikuteekateeka ngu abazaire baine kubanza baaba abagaiga kubaasa kuhikiiriza obujunaanizibwa obwo. Nangwa, abazaire abu Yehova yaatooraine kworora Omwana we bakaba bataine esente nyingi kwonka bakaba nibakora n’amaani.—Mat. 13:55, 56; Luk. 2:24.

Omusingye gwa Baibuli: “Kwonka omuntu weena, otarikuhwera banyabuzaare, n’okukira munonga ab’omu ka ye, biri ayehakaine okwikiriza, kandi naaba ari mubi okukira otarikwikiriza.”—1 Tim. 5:8.

Yehova naamanya ngu abazaire nibabaasa kwetenga obuhwezi bahika omu myaka ya bukuru. Nangwa omuringo gumwe oku abaana barikubaasa kuha abazaire baabo ekitiinisa n’okutaho entebeekanisa y’okubareeberera baahika omu myaka ya bukuru. (Kur. 20:12; 1 Tim. 5:4) Kwonka, Yehova naashemererwa abazaire baata omutima aha ku baraareeberere abaana baabo, omu myanya gw’okuguta aha ku abaana baraije kubareeberera baahika omu myaka ya bukuru.—2 Kor. 12:14.

Bareeberere omu by’omwoyo. Abazaire Abakristaayo baine obujunaanizibwa bw’okutendeka abaana baabo kukunda Yehova n’okumuramya. Yehova naareeba okutendekwa oku abazaire barikuha abaana baabo omu by’omwoyo nka kukuru munonga omu kukura kwabo.—Bir. 6:6, 7.

Omusingye gwa Baibuli: “[Mugumizemu nimworora, abaana baanyu] nimubategyeka gye, kandi nimubeegyeseza omuri [Yehova].”—Efe. 6:4.

YEHOVA NAAYENDA NGU MUBE ABASINGUZI

Omushaija n’omukazi we nibagaaniira bari omu ka. Baibuli ari aha meeza omu maisho gaabo. — Mugaaniire kare aha baana abu murikuteekateeka kuzaara

Mwetebeekanise bukiri kare. Ku oraabe nooyenda kuzaara abaana, teekateeka aha mbeera zaawe n’obwegyendesereza. Nk’eky’okureeberaho, ku oraabe nooyenda kuzaara abaana baingi, noija kubaasa kubariisa, kubajweka n’okubatwara aha ishomero? Waareeba otaraakibaase, noobaasa kugaaniira n’ou ori nawe omu bushwere kugira ngu muzaare abaana bakye abu murabaase kureeberera nk’oku Yehova arikwenda. N’amazima, Yehova naayetegyereza ngu titurikubaasa kwetebeekanisiza buri kimwe ekiraabeho omu magara gaitu. (Mub. 9:11) Kwonka naija kubaha omugisha mwateeraho kuba abazaire barungi nk’oku arikwenda.

Emisingye ya Baibuli: ‘Ebi omweziriki ateekateeka kukora tibibura kureeta mweru, kwonka weena orahukiiriza, naayereetera obukyene.’—Enf. 21:5.

“N’oha omuriimwe owaakuba naayenda kwombeka omunaara, atabanze kushutama akabariirira eby’emirimo yaagwo, akamanya ku araabe aine eby’okuguheza?”—Luk. 14:28.

Mwebembeze Yehova omu ka yaanyu. Hamya ngu okuramya Yehova nikyo kirikutwara omwanya gw’okubanza omu ka yaanyu. Ku oraabe oine abaana, mariirira kwegyesa buri omwe aharibo kukunda Yehova. Bahwere kutaho omutima baaba bari omu nteerane. Hamira aha ntebeekanisa yaanyu y’Okuramya kw’Eka buri saabiiti. Tendeka abaana baawe omu kubuurira. Obujunaanizibwa bwawe nk’omuzaire otabuha abaana baawe abakuru nari abanyabuzaare. Okukuza abaana baawe barikukunda Yehova nikiija kutwara obwire n’okuteeraho, kwonka nikirugamu emigisha mingi.

Omusingye gwa Baibuli: “Tihariho ki ndikushemerererwa okukira eki, okuhurira ngu abaana bangye nibagyendera omu mazima.”—3 Yoh. 4.b

Yesigye Yehova. Yaaba oine abaana nari oriyo nootebeekanisa kubagira, kimanye ngu emitindo ya Yehova ni mikuru kukira entwaza y’ekicweka kyanyu.

Ebishushani: 1. Abazaire bashutami na mutabani waabo aha ruteerane rw’ekibiina. Omutabani yaimutsya omukono kuha eky’okugarukamu. 2. Eka neeyejumba hamwe omu kubuurira. Omuzaire omushaija naabuurira na muhara waabo omushogoyo obwo nyinabo naabuurira n’abaana abandi babiri abato. — Okureeberera abaana omu bw’omwoyo nikitwara obwire n’okuteeraho

Ku oraacwemu kuzaara abaana bakye, yesigye ngu Yehova naija kukureeberera omu myaka ya bukuru. Yetantare kuteekateeka ngu oine kuzaara abaana ab’okukuhwera waahika omu myaka ya bukuru. Toine kutiina ngu noija kutsigwaho. Yehova araganiise ngu naija kukureeberera, kandi butoosha naahikiiriza ebi arikuraganisa.—Yos. 23:14.

Emisingye ya Baibuli: “Yesigye [Yehova] n’omutima gwawe gwona, orekye kwegamira okwetegyereza kwawe ahabwawe, omwemere omu mitwarize yaawe yoona, nawe aryaguma naatebeekanisa emihanda yaawe yoona.”—Enf. 3:5, 6.

“Nkaba ndi omutsigazi, mbwenu ndi omugurusi, kwonka tinkareebaga ohikiriire atsigirweho, n’obu baakuba abaana be nibashaba ak’okurya.”—Zab. 37:25.

‘Kwonka mubanze musherure Obukama bwe n’okuhikiirira kwe, n’ebyo byona nimwija kubyongyerwaho.’—Mat. 6:33.

Abaana n’ebiconco by’omuhendo ebi Ruhanga ahaire abazaire. Yehova ka aine kuba naashemererwa yaareeba abazaire Abakristaayo barikureeberera abaana baabo nk’oku arikwenda! Nibareeberera abaana baabo barikubaha ebirikwetengyesa omu by’omubiri, enyehurira n’omu by’omwoyo. Nibatebeekanisa kare omuhendo gw’abaana abu barazaare, kandi beebembeza ebi Ruhanga arikwenda kukira obukomooko bwabo n’entwaza y’omu kicweka kyabo. Omu kukora batyo, abazaire Abakristaayo nibooreka ngu nibatwara ekiconco ky’abaana ‘nk’obuhunguzi okuruga ahari [Yehova].’

Tibarikwefuuza

Mbwenu shi abazaire abarikucwamu kuzaara abaana bakye nibabonabona? Ekyo n’ekibuuzo eki abazaire abari omu mahanga agatari gye omu by’entaatsya barikwebuuza. Yetegyereze eki emitwe y’amaka omu mahanga agamwe barikugamba aha nshonga egi.

Haine obu muragyemesereziibwe kuzaara abaana baingi?

“Eego, nangwa na bamwe omu kibiina bakaba batugyemesereza. Omushaija omwe n’omukazi we bakatugira bati, ‘Ahabw’enki mwine omwana omwe? Aha omuri Africa, waaba oine omwana omwe nooba ori nk’otaine. Waaba oine babiri nooba ori nk’oine omwe.’ Nangwa na bwanyima y’okuzaara muhara waitu owa kabiri, okugyemeserezibwa okwo kukagumaho.”—Jeremias

Haine oburemeezi obu mutungire omu by’omubiri nari omu by’omwoyo ahabw’okuzaara abaana bakye?

“Ngaaha, tikwo kiri. Ahabw’okucwamu kugira abaana bakye, nyowe n’omukazi wangye tukabaasa kureeberera gye abaana baitu omu by’omubiri n’omu by’omwoyo. Nkakurira omu ka mpango kandi nkareeba oburemeezi obu tata na maawe baabaire nibarabamu kubaasa kutuhitsyaho ebirikwetengyesa n’obwegyese.”—Jeremias

Abaana baanyu nibeehurira bata aha ki mwacwiremu?

“Abaana baitu baine okushemererwa ahabw’okuba tibarahikirweho oburemeezi nk’oburikuhika aha abaana abandi ahabw’okugira ngu abazaire baabo baine abaana baingi ekirikubagumira kubareeberera.”—Filipe

“Obu abaana baitu baabaire nibakura bakaba bashemereirwe ahabw’okugira ngu bakaba nibahurira baine oburinzi kandi barikukundwa. Butoosha tukaba tutaayaayisa ab’eishe-emwe na banyaanyazi-itwe abakuzire omu by’omwoyo abaatuhigire kutaho ebigyendererwa by’omwoyo. Kandi tubaasize kureeba ebirungi ebyarugire omu kuteeraho okwo omu baana baitu.”—Carlos

Mugasiirwe muta ahabw’okucwamu kuzaara abaana bakye?

“Tukabaasa kureeberera gye eka yaitu omu by’omubiri ahabw’okucwamu gye. Emyaka eshatu enyima, nkafeerwa omurimo gw’esente nyingi. Kwonka kikatworobera kuraba omu mpinduka egyo ahabw’okugira ngu tukaba twine abaana bakye tutarikwetenga ebintu bingi kubareeberera.”—Jeremias

“Okucwamu kwaitu kutubaasiise kureeberera gye eka yaitu omu by’omubiri n’omu by’omwoyo. Kandi tubaasize kuheereza omu myanya ahu ababuurizi barikwendwa munonga. Kandi kitubaasiise kufa aha byetengo bya buri mwana. Abaana baitu boona nibaheereza Yehova kandi bataireho ebigyendererwa by’omwoyo.”—Lenadi

Okaayenzire kugambira ki abazaire?

“Mbaasize kureeba okuhikiiririra kw’ebiri omu Zaaburi 34:10b, aharikugira hati: ‘Abarikusherura [Yehova], tibariburwa kirungi kyona.’ Nyowe n’eka yangye Yehova atuhaire ebi turikwetenga.”—Rafael

a Abari omu bushwere nibo baine kwecweramu abaana abu baraazaare, obu baine kubazaara, na yaaba baine kukoresa emiringo y’okubariirira oruzaaro etarikwihamu enda. Tihaine oshemereire kubacwera orubanja aha nshonga egyo. (Rom. 14:4, 10-13) Kandi Abakristaayo abari omu bushwere baine kuguma nibaijuka obuhabuzi oburi omu 1 Abakorinso 7:3-5.

b Omu mushororongo ogu, abaana abarikugambwaho n’abantu abu Yohaana yaahweraire kwega amazima, kwonka omuzaire nawe naabaasa kwehurira omu muringo nigwo gumwe abaana be baaheereza Yehova.