Reetera ebi Orikushoma Kuba Ebyabuzima

Baibuli neegamba aha byafaayo bingi ebirikutwegyesa amashomo makuru. Twareetera ebi turikushoma kuba ebyabuzima nikituhwera kwongyera kubyetegyereza gye kandi bitugasire. Teekateeka ahari bumwe aha bukoryo oburikubaasa kukuhwera kureeba ebi orikushoma nk’ebyabuzima.

• Shoma omu iraka ririkuhurirwa. Okushoma Baibuli omu iraka eririkuhurirwa nikikuhwera kuteekateeka aha byabaireho. Mwashoma Baibuli nk’eka, buri omwe omu ka naabaasa kushoma ebigambo eby’abarikugambwaho omu Baibuli abatari bamwe, kandi ekyo nikiija kubahwera kureeba ebyabaireho nk’ebyabuzima.

• Teera akashushani. Teeraho kwebuuza oku abarikugambwaho baabaire nibeehurira n’eki baabaire nibateekateeka. Nk’eky’okureeberaho noobaasa kwebuuza oti: ‘Ahabw’enki omuntu ogu yaagambire ati nari yaatwarize atyo? Ku ogire ngu niinye naabaire ndi omu mbeera ye, nkaba ninyija kuteekateeka ki kandi nyehurire nta?’

• Teera ebishushani aha rupapura. Okuteera ebishushani by’ebyabaireho omu Baibuli aha rupapura nikibaasa kukuhwera kubireeba nk’ebyabuzima n’okuguma noobyijuka. Torikwetenga kuba ori omuteezi murungi w’ebishushani kubaasa kukora ekyo.