Gumizamu Noyigutsya Ekyetengo Kyawe ky’Eby’omwoyo

1. Yehova akatuhanga na byetengo ki? (Matayo 5:3)

YEHOVA akatuhanga n’ebyetengo bitari bimwe. Nk’eky’okureeberaho, kubaasa kugira amagara marungi nitwetenga eby’okurya, ebijwaro n’oburaaro. Twaba tutatungire kimwe aha bintu ebyo, nitubaasa kufeerwa amagara gaitu nari tugire oburemeezi. Kwonka oyihireho ebyo, Yehova akatuhanga n’ekyetengo ky’eby’omwoyo. (Shoma Matayo 5:3.) Twaba nitwenda kugira okushemererwa okwabuzima, twine kufayo aha kyetengo ekyo kandi tukagumizamu nitukigutsya.

2. Shoboorora eki kirikumanyisa okufayo aha kyetengo kyawe eky’eby’omwoyo?

² Nikimanyisa ki okufayo aha kyetengo kyaitu eky’eby’omwoyo? Omu Rugriika ekigambo ekyo kiine amakuru g’okushabiiriza eby’omwoyo. Teekateeka aha mushaija omworo orikushabiiriza. Ajwire emyenda y’obucancabari kandi ashutami aha rubaju rw’omuhanda. Ahwairemu amaani ahabw’okugira ngu taine by’okurya, tihaine orikumufaho, kandi naateerwa omushana n’embeho y’ekiro. Omuntu orikushabiiriza naaba naamanya ngu aine kutunga obuhwezi kubaasa kuguma ahuriire. Nikyo kimwe, omuntu orikufayo aha kyetengo kye eky’eby’omwoyo naaba naayetenga obuhwezi kubaasa kuba gye. N’ahabw’ekyo naaba aine ekihika ky’okugasirwa omu obuhwezi bw’eby’omwoyo obu Yehova arikuha abarikumukunda.

3. Nituza kugamba ahari ki omu kicweka eki?

³ Omu kicweka eki, nituza kubanza kureeba eki turikwegyera aha mukazi wa Foiniike owaayeshengyereize Yesu ngu amuhwere. Oku omukazi ogwo yaatwarize nikworeka emitwarize eshatu ei abantu abarikufayo aha kyetengo kyabo ky’eby’omwoyo baine kugira. Bwanyima nituza kureeba eki turikwegyera aha ky’okureeberaho eky’entumwa Petero, Paulo n’Omugabe Daudi, abaabaire bari abashaija b’eby’omwoyo.

EMITWARIZE ESHATU MIKURU EI TWINE KUGIRA

4. Ahabw’enki omukazi wa Foiniike yaizire ahari Yesu?

⁴ Eizooba rimwe, omukazi wa Foiniike akaija ahari Yesu. Muhara we akaba ‘ariho daimoni, eyaabaire neemwita kubi munonga.’ (Mat. 15:​21-28) Akatsimba amaju omu maisho ga Yesu reero yaamweshengyereza ngu amuhwere. Omukazi ogwo akooreka emitwarize y’omutaano obu yaija ahari Yesu. Ka tureebe emwe ahariyo.

5. Ni mitwarize ki ei omukazi wa Foiniike yaayorekire, kandi kikareetera Yesu kukora ki? (Reeba n’ekishushani.)

⁵ Omukazi wa Foiniike akooreka obucureezi obwabuzima. Ahabw’enki? Ahabw’okugira ngu taragwirwe kubi Yesu ku yaakoreise eky’okureeberaho ekirikumugyeragyeranisa n’embwa, enyamaishwa eyaabaire etuura omu ka y’Abanyamahanga. Okaba noija kutwaza ota ku ogire ngu Yesu niiwe yaagambiire ebigambo ebyo? Okaba noija kuguubwa kubi reero orekyere aho kumushaba obuhwezi? Okwo tikwo omukazi wa Foiniike yaatwarize. Oyihireho okuba omucureezi, tarahanikire. Ekyo nitukireebera aha ku yaagumiizemu naayeshengyereza Yesu ngu amuhwere. Niki ekyamuhigire kutwaza atyo? N’okwikiriza oku yaabaire aine omuri Yesu. Amazima gari ngu, okwikiriza kw’omukazi ogwo kukakwata ahari Yesu kwamuhiga kugira eki yaakora. Akabinga daimoni aha muhara, n’obu araabe yaabaire agizire ngu akaba aizire kuhwera ‘entaama z’oruganda rwa Israeli ezaabuzire.’

6. Niki eki turikwegyera aha ku omukazi wa Foiniike yaatwarize?

⁶ Kubaasa kwigutsya ekyetengo kyaitu ky’eby’omwoyo, twine kwongyera kugira emitwarize niyo emwe. Twine kuba abacureezi, kutahanika kandi tugire okwikiriza kuhami. Omuntu omucureezi naaguma naayeshengyereza Ruhanga ngu amuhwere. Naitwe twine kugira okwikiriza kuhami omuri Kristo Yesu, kandi twesigye abarikukoresa kwebembera abeegi be. (Mat. 24:​45-47) Yehova n’Omwana we nibashemererwa kwigutsya ekyetengo ky’eby’omwoyo ky’abarikworeka emitwarize egyo. (Gyeragyeranisa Yakobo 1:​5-7.) Hati ka tushwijume oku Yehova arikutuha eby’okurya by’omwoyo, ebijwaro n’oburinzi. Nituza kureeba eki twine kukora kubaasa kutunga ebintu ebyo turikwegyera aha ky’okureeberaho ky’entumwa Petero, Paulo n’Omugabe Daudi.

GUMA NOOYERIISA GYE OMU BY’OMWOYO NKA PETERO

7. Petero akaheebwa bujunaanizibwa ki, kandi akaba aine kwega kukora ki? Shoboorora. (Abaheburaayo 5:14–6:1)

⁷ Teekateeka aha ky’okureeberaho ky’entumwa Petero. Akaba ari omwe aha Bayudaaya abaabandize kwetegyereza ngu Yesu ni Mesia, ou Yehova yaabaire naakoresa kuriisa abantu be “ebigambo by’amagara agatahwaho.” (Yoh. 6:​66-68) Yesu atakagarukire omu iguru, akatsigira Petero obujunaanizibwa arikumugira ati: “Riisa entaama zangye.” (Yoh. 21:17) Petero akahikiiriza obujunaanizibwa obwo omu bwesigwa, kandi Yehova akamukoresa kuhandiika ebaruha ebiri eziri omu Baibuli. Kwonka Petero akaba aine kweriisa eby’okurya by’omwoyo. Nk’eky’okureeberaho, akeega ebaruha ezi entumwa Paulo yaabaire ahandiikire. Akagira ngu bimwe aha bi Paulo yaahandiikire omu baruha ezo, bikaba ‘bigumire kwetegyerezibwa.’ (2 Pet. 3:​15, 16) Kwonka tarahanikire ahakuba akaba aine okwikiriza ngu Yehova naija kumuhwera kwetegyereza n’okugyendera aha ‘by’okurya ebigumire’ ebi Paulo yaahandiikire arikuhwerwa omwoyo ogurikwera.—Shoma Abaheburaayo 5:14–6:1.

8. Petero akatwaza ata Yehova ku yaamuhaire enyetegyereza nsya arikukoresa maraika?

⁸ Petero akooreka ngu akaba aine okwikiriza omuri Yehova arikukuratira obuhabuzi obu yaahairwe. Nk’eky’okureeberaho, obu yaabaire ari aha mwaro gwa Yoopa, akatunga okworekwa. Maraika wa Yehova akamugambira kubaaga n’okurya enyamaishwa ezaabaire zitashemeire kurugiirira aha Biragiro bya Musa. Obuhabuzi obwo bukaba nibuteeza entsibo aha Bayudaaya. Omu kubanza, Petero akamugarukamu ati: “Ngaaha, Mukama wangye, ahabw’okuba tinkaryaga kintu kyona ekirikuzira nari ekitashemeire.” Reero maraika akamugira ati: “Eki Ruhanga yaashemeize, otarikihindura ekirikuzira.” (Byak. 10:​9-15) Petero akeetegyereza enshonga egyo. Ekyo nitukimanya tuta? Bwanyima y’okutunga okworekwa okwo, abashaija bashatu abu Koruneelio Omunyamahanga yaabaire ayoohereize bakahika owa Petero reero baamushaba kugyenda nabo kuza kugamba na mukama waabo. Enyimaho, Petero akaba atarikubaasa kwikiriza kutaaha omunju y’Omunyamahanga. Abayudaaya bakaba nibareeba Abanyamahanga nk’abatashemeire. (Byak. 10:​28, 29) Kwonka ahonaaho Petero akaikiriza obuhabuzi busya obu Yehova yaamuhaire. (Enf. 4:18) Akabuurira Koruneelio n’eka ye, kandi akashemererwa kureeba nibaikiriza amazima, nibakashukwaho omwoyo ogurikwera, kandi baabatizibwa.—Byak. 10:​44-48.

9. Ni miringo ki ebiri ei turikugasirwamu twakunda kurya eby’okurya by’omwoyo ebigumire?

⁹ Nka Petero, twine kuguma nitwetenga amate nigo mazima ga Baibuli agarikutandikirwaho. Kwonka twine n’okukunda eby’okurya by’omwoyo ebigumire, nigo mazima agagumire kwetegyereza. Ni kikuru kutaho obwire bw’okweyegyesa Ekigambo kya Ruhanga, kandi tukateeraho kwetegyereza amazima agagumire. Ahabw’enki? Ahakuba nitugasirwa omu miringo nk’ebiri: Ogw’okubanza, nitwega ebintu bingi ahari Yehova ebirikutuhwera kwongyera kumukunda n’okumuha ekitiinisa. Kandi ogwa kabiri, nitwongyera kugira omujinya gw’okugambira abandi ebirikukwata ahari Tataitwe ow’omu iguru orikutangaaza. (Rom. 11:33; Kush. 4:11) Eky’okureeberaho kya Petero nikitwegyesa eishomo erindi. Twatunga enyetegyereza nsya twine kurahuka kuhindura emiteekateekyere yaitu n’ebikorwa byaitu. Obwo nibwo turaagume nituriisibwa gye omu by’omwoyo, kandi tukaba ab’omugasho ahari Yehova.

GUMA OJWIRE GYE OMU BY’OMWOYO NKA PAULO

10. Nikimanyisa ki okujwara gye omu by’omwoyo? (Abakolosai 3:​8-10)

¹⁰ Kubaasa kushemeza Ruhanga, tushemereire kukoresa gye obuhwezi obundi obu arikutuha, nikwo kujwara gye omu by’omwoyo. Ekyo nikimanyisa ki? Entumwa Paulo akahandiika ngu twine kujuura “omuntu owa ira” tukajwara “omuntu omusya.” (Shoma Abakolosai 3:​8-10.) Nikyetengyesa amaani n’okuteeraho kubaasa kuguma tujwire omuntu omusya. Teekateeka ahari Paulo. Kuruga omu buto, akakora munonga kubaasa kusiimwa Ruhanga. (Gal. 1:14; Fil. 3:​4, 5) Kwonka akaba ataine okumanya okuhikire aha bikwatiraine n’ekigyendererwa kya Ruhanga, n’ahabw’ekyo akaba ari omu mbeera mbi omu by’omwoyo. Ahabw’okugira ngu akaba atarikumanya enyegyesa za Yesu kandi aine amaryo, kikamureetera kuba omushaija owaabaire ajwire emitwarize mibi, kandi “enshaarizi.”—1 Tim. 1:13.

11. Paulo akaba aine kusingura bweremwa ki? Shoboorora.

¹¹ Obu Paulo yaabaire atakabaire Omukristaayo, akaba naarahuka kugira ekiniga. Ekitabo ky’Ebyakozirwe nikigira ngu Paulo akaba ainiire abeegi ba Yesu ekiniga kingi, kandi arikubagambira “eby’okukangisa n’eby’okwita.” (Byak. 9:1) Bwanyima y’okuba Omukristaayo, hatariho okubangaanisa akateeraho munonga kujuura emitwarize y’omuntu owa ira. (Efe. 4:​22, 31) Kwonka nabwo Paulo akagira obutaikirizana na Barunaba, kandi kikarugamu okuteera “empaka nyingi.” (Byak. 15:​37-39) N’obu emitwarize ye eya ira yaagarukire, tarahanikire. Akaguma ‘naateera omubiri gwe,’ nari okurwanisa obutahikiirira kugira ngu agume naasiimwa Yehova.—1 Kor. 9:27.

12. Niki ekyahweraire Paulo kujuura emitwarize y’omuntu owa ira?

¹² Paulo akabaasa kujuura emitwarize y’omuntu owa ira kandi yaajwara omuntu omusya ahabw’okugira ngu akaba atarikwesiga amaani ge. (Fil. 4:13) Nka Petero, Paulo akeesiga ‘amaani agu Ruhanga arikuha.’ (1 Pet. 4:11) Kwonka nabwo, obumwe Paulo akaba akora enshobe kimureetera kwehurira nk’oremirwe. Kwonka ku yaabaire ayehurira atyo, akaba ateekateeka aha birungi ebi Ishe ow’omu iguru yaamukoreire. Kandi ekyo kikaba kimuhwera kugaruka kugira amaani g’okumariirira kukora empinduka.—Rom. 7:​21-25.

13. Nitubaasa kutooreza tuta Paulo?

¹³ N’obu twakuba tuheereize Yehova kumara obwire buraingwa, nitubaasa kutooreza Paulo turikugumizamu nitujuura omuntu owa ira, tukajwara omuntu omusya, nikyo kijwaro ky’eby’omwoyo eki Ruhanga arikutuha. Twagaruka tukagira emitwarize eya ira nk’okurahuka kugira ekiniga, okugambira omuntu omu muringo gutari gw’embabazi, titushemereire kuhanika nari kwereeba nk’abaremirwe. Kureka, twine kuhamira aha kigyendererwa ky’okuhindura emiteekateekyere yaitu n’ebikorwa byaitu. (Rom. 12:​1, 2; Efe. 4:24) Kwonka twaba nitukikora, twine kwijuka eki: Okutaana n’ebijwaro bya butoosha ebi turikubaasa kufunza kugira ngu bituhike, niitwe abaine kuhindura emiteekateekyere yaitu kugira ngu tubaase kuhika omu kijwaro ky’eby’omwoyo eki Yehova arikutuha. N’ahabw’ekyo n’eky’obwengye kuhindura eki turi omu omunda kuhikaana n’emitindo ya Ruhanga.

GUMA ORINZIRWE GYE OMU BY’OMWOYO NKA DAUDI

14-15. Yehova naarinda ata abaheereza be omu by’omwoyo? (Zaaburi 27:5) (Reeba n’ekishushani.)

¹⁴ Kubaasa kugira okushemererwa okwabuzima, nitwetenga ekirikukira aha kujwara n’okurya gye omu by’omwoyo. Twine kutunga oburinzi omu by’omwoyo. Ekyo nikimanyisa ki, kandi nitubaasa kuhamya tuta ngu twaguma turinzirwe gye omu by’omwoyo?

¹⁵ Omugabe Daudi akagamba aha burinzi obu Yehova arikutuha omu by’omwoyo. (Shoma Zaaburi 27:5.) Mbwenu shi Yehova naarinda ata abaheereza be obunaku obu? Naabarinda kugira ngu hatagira omuntu weena nari ekintu kyona ekyahitsya akabi aha kwikiriza oku baine omuriwe. Naaraganisa ngu tihariho kirwaniso ekiheesirwe kuturwanisa ekirikubaasa kutusingura. (Zab. 34:7; Isa. 54:17) N’obu Sitaane n’abashagiki be baraabe baine amaani, tibarikubaasa kutuhitsyaho akabi k’obutwire. Kandi n’obu baakutwita, Yehova naija kutugarurira amagara gaitu arikutuzoora. (1 Kor. 15:​55-57; Kush. 21:​3, 4) Kandi Yehova naatuhwera kwemera okwerarikirira oku turikuba twine kugira ngu kutaturemesa kumuheereza. (Enf. 12:25; Mat. 6:​27-29) Kandi Tataitwe owa rukundo naatuha eka y’eby’omwoyo nibo b’eishe-emwe na banyaanyazi-itwe abarikutushagika, hamwe n’abareeberezi abarikuturiisa omu by’omwoyo. (Isa. 32:​1, 2) Ku turikuza omu nteerane nitwijukibwa emiringo etari emwe oku turikubaasa kwikiriza Yehova kuturinda.—Heb. 10:​24, 25.

16. Yehova akarinda Daudi mu miringo ki?

¹⁶ Daudi ku yaabaire ayorobera Yehova, akaba amurinda akabi akarikuhika aha barikushiisha nkana. (Gyeragyeranisa Enfumu 5:1, 2.) Kwonka ku yaayehugize emitindo ya Yehova, akamureka yaahikwaho ebyarugire omu bi yaakozire. (2 Sam. 12:​9, 10) Kandi shi obu Daudi yaabonabona hataine kibi eki akozire? Akagambira Yehova oku arikwehurira kurabira omu kushaba, kandi Yehova akamuhwera kutarengwa amaganya arikumuhamiza ngu naamukunda munonga kandi naija kumureeberera.—Zab. 23:​1-6.

17. Nitubaasa kutooreza tuta Daudi?

¹⁷ Nitubaasa kutooreza Daudi turikusherura obuhabuzi bwa Yehova kutuhwera kucwamu gye. Nitumanya ngu obumwe nituhikwaho oburemeezi ahabw’okugira ngu tucwiremu kubi beitu kutari kugira ngu Yehova aremirwe kuturinda. (Gal. 6:​7, 8) Kandi twahikwaho oburemeezi tutaine kibi eki tukozire, nitubaasa kugambira Yehova oku turikwehurira kurabira omu kushaba, twine obwesigye ngu naija kurinda emitima yaitu n’ebiteekateeko byaitu.—Fil. 4:​6, 7.

GUMIZAMU NOYIGUTSYA EKYETENGO KYAWE KY’EBY’OMWOYO

18. Abantu baine miteekateekyere ki aha kwigutsya ekyetengo kyabo ky’eby’omwoyo, kandi itwe nitubaasa kukora ki kwigutsya ekyetengo ekyo? (Reeba n’ebishushani.)

¹⁸ Ekyahandiikirwe kyaitu eky’omwaka 2026 nikigira kiti: Baine okushemererwa abarikufayo aha kyetengo kyabo ky’eby’omwoyo. Ekyo ni kikuru munonga obunaku obu kukira obundi bwona. Ahabw’enki? N’ahabw’okugira ngu twetoroirwe abantu abatashemereirwe abarikugira ngu tibaine kyetengo ekyo, nari abarikuteeraho kukigutsya omu muringo gwabo kurabira omu diini z’ebishuba n’abantu abarikwetwara nk’abanyabwengye. Titwine kwikiriza kutooreza emiteekateekyere yaabo. Ekyo nitubaasa kukikora tuta? Turikugasirwa omu bwijwire omu by’okurya by’omwoyo ebi Yehova arikutuha, tukajwara omuntu omusya, kandi tukoorobera Yehova kubaasa kutunga oburinzi bwe.