Ikiriza Ngu Yehova Naakukunda

1. Ahabw’enki waayehaireyo ahari Yehova? (Reeba n’ekishushani.)

NOIJUKA obu waayehayo ahari Yehova? Okumanya ebirikumukwataho na rukundo ei omwiniire nikyo kyakuhigire kucwamu otyo. Okamuraganisa ngu noija kuguma nooyebembeza ebi arikukunda, kandi ogumizemu kumukunda n’omutima gwawe gwona, n’amagara gaawe goona, n’obwengye bwawe bwona, n’amaani gaawe goona. (Mak. 12:30) Okuruga obwo, rukundo ei omwiniire eyongyeire kuhama. Mbwenu shi, noobaasa kugarukamu ota omuntu yaakubuuza ati: “Noohamiza kimwe ngu nookunda Yehova?” Otarikubangaanisa noobaasa kugarukamu oti: “Buzima niimukunda kukira omuntu ondiijo weena nari ekintu ekindi kyona!”

2-3. Yehova naayenda ngu tuhamye ki, kandi nituza kushwijuma ki omu kicweka eki? (Yeremia 31:3)

² Kandi shi noobaasa kugarukamu ota omuntu ku yaakukubuuza ati: “Nookihamya ngu Yehova naakukunda?” Mbwenu shi noobaasa kweziringa kumugarukamu obundi ahabw’okuteekateeka ngu rukundo ya Yehova tekushemereire? Munyaanyazi-itwe omwe owaakuzire atarikworekwa rukundo akagira ati: “Niinkimanya ngu ninkunda Yehova kandi tindikukibangaanisaho. Kwonka obumwe nimbangaanisa yaaba Yehova naankunda.” Mbwenu shi niki ekirikubaasa kukuhwera kumanya ngu Yehova naakukunda?

³ Yehova naayenda ngu ohamize kimwe ngu naakukunda. (Shoma Yeremia 31:3.) Amazima gari ngu Yehova akakweyiriza haihi. Kandi obu waayehayo ahariwe okabatizibwa, okatunga ekintu ky’omuhendo munonga, niyo rukundo ye etahwaho. Ekyo nikimanyisa ngu naakukunda munonga kandi tarikwija kukutsigaho. Rukundo egyo neemureetera kureeba abaheereza be abeesigwa otwariiremu naiwe ‘nk’eitungo rye eritoorainwe.’ (Mal. 3:17) Yehova naayenda ngu ohamize kimwe ngu naakukunda nk’oku entumwa Paulo yaabaire naakihamya. Paulo akagamba n’obwesigye ati: “Ahakuba nimmanyira kimwe ngu okufa, n’obu gaakuba amagara, nari baamaraika, nari abarikutegyeka, nari ebiriho, nari ebiribaho, nari ab’obushoboorozi, nari oburaingwa obwa bwemi nari oburaingwa obw’okuzimu, n’obu kyakuba ekindi kintu kyona ekihangirwe tihaine kiribaasa kututaanisa n’okukunda kwa Ruhanga.” (Rom. 8:​38, 39) Omu kicweka eki, nituza kureeba enshonga ahabw’enki twine kuhamiza kimwe ngu Yehova naatukunda, n’ekiratuhwere kukikora.

ENSHONGA AHABW’ENKI TWINE KWIKIRIZA NGU YEHOVA NAATUKUNDA

4. Sitaane naajanjaaza kishuba ki, kandi nitubaasa kukirwanisa tuta?

⁴ Twaikiriza ngu Yehova naatukunda niturwanisa ‘obugobya bwa Sitaane.’ (Efe. 6:11) Sitaane ayeteekateekire kukora kyona eki arikubaasa kuturemesa kuheereza Yehova. Kamwe aha bukoryo obu arikukoresa n’okujanjaaza ekishuba ngu Yehova tarikutukunda. Ijuka ngu naamanya gye obwire burungi obu arikubaasa kutureetera kubangaanisa rukundo ya Yehova. Ekyo naakira kukikora twaba tuhwairemu amaani obundi ahabw’obusaasi oburikureetwa ebi twarabiremu enyima, oburemeezi obu turikurabamu hati, nari twaba twerarikirire aha birikubaasa kubaho omu biro by’omumaisho. (Enf. 24:10) Sitaane ari nk’entare erikusherura oku eraakwate enyamaishwa etaine amaani, n’oburinzi. N’ahabw’ekyo naateeraho kutugyeza twaba tuhwairemu amaani kugira ngu tubaase kuhanika. Kwonka twagumizamu nituhamya obwesigye bwaitu ngu Yehova naatukunda, nitwija kuba tweteekateekire ‘kumurwanisa’ n’obutego bwe.—1 Pet. 5:​8, 9; Yak. 4:7.

5. Ahabw’enki tushemereire kwikiriza ngu Yehova naatukunda kandi naatufaho?

⁵ Twaikiriza ngu Yehova naatukunda, nitumwirira haihi. Ahabw’enki nitugira tutyo? Yehova akatuhanga n’ekyetengo ky’okukundwa n’okukunda abandi. Omuntu ku arikutworeka rukundo, n’eky’obuhangwa naitwe kumukunda. N’ahabw’ekyo nitwongyera kukunda Yehova twareeba oku arikutukunda kandi akatufaho. (1 Yoh. 4:19) Rukundo ei tumwiniire ku erikweyongyera, nawe naayongyera kutukunda. Baibuli neekyoreka butunu eti: “Mwirire haihi Ruhanga, nawe abone kubairira haihi.” (Yak. 4:8) Mbwenu shi nitubaasa kuhamya tuta obwesigye bwaitu ngu Yehova naatukunda?

NIKI EKIRIKUBAASA KUTUHWERA KWIKIRIZA NGU YEHOVA NAATUKUNDA?

6. Kubaasa kwikiriza ngu Yehova naakukunda, noobaasa kumushaba kukukorera ki?

⁶ Guma nooshaba Yehova kukuhwera kumanya ahabw’enki naakukunda. (Luk. 18:1; Rom. 12:12) Kyaba nikyetengyesa, shaba Yehova emirundi mingi omu izooba kukuhwera kwereeba nk’oku arikukureeba. Waaba nooyeshinja nikibaasa kukugumira kwikiriza ngu Yehova naakukunda. Kwonka ijuka ngu Yehova ni mukuru kukira emitima yaitu. (1 Yoh. 3:​19, 20) Naakumanya kukira oku orikwemanya, kandi naakureebamu ebi otarikubaasa kwereebamu. (1 Sam. 16:7; 2 Bus. 6:30) N’ahabw’ekyo oteeziringa ‘kumugambira’ enyehurira zaawe n’okumushaba obuhwezi kubaasa kwikiriza ngu naakukunda. (Zab. 62:8) Bwanyima teeraho kukora ebirikuhikaana n’okushaba kwawe orikugyendera aha buhabuzi oburi omu kicweka eki.

7-8. Ebyahandiikirwe eby’omuri Zaaburi nibituhamiza bita ngu Yehova naatukunda?

⁷ Yesigye ebi Yehova yaagambire. Yehova akakoresa abahandiiki ba Baibuli kuhandiika amazima agarikumukwataho. Daudi akahandiika aha ku Yehova arikutufaho ati: ‘[Yehova] aba haihi ab’emitima ehendekire, naajuna ab’omutima ogweteisiize kimwe.’ (Zab. 34:18) Waaba oine amaganya, noobaasa kwehurira nk’ori wenka. Kwonka Yehova naakuraganisa ngu omu mbeera nk’egyo naaza kukuba haihi, ahabw’okuba naaba naareeba ngu noomwetenga okukira obundi bwona. Daudi akagaruka yaagira ati: “Ote amarira gangye omu cupa yaawe.” (Zab. 56:8) Yehova naakureeba waaba ori omu mbeera egumire. Naafayo aha bi orikurabamu, kandi naakwatwaho waaba ori omu busaasi. Nk’oku amaizi gari ag’omuhendo aha muntu orikuraba omu ihamba, n’amarira gaawe Yehova naagatwara nk’ag’omuhendo. Zaaburi 139:3 nihagira hati: “[Iwe Yehova] noomanya emihanda yangye yoona.” Yehova naareeba emihanda yaawe yoona kwonka naata omutima aha birungi ebi orikukora. (Heb. 6:10) Ahabw’enki? Ahabw’okuba naasiima okuteeraho kwawe kukora ebirikumushemeza.a

⁸ Yehova naatuhuumuriza arikukoresa Ebyahandiikirwe. Naaba ari nk’orikutugira ati: “Niinyenda okimanye ngu niinkukunda kandi niinkufaho munonga.” Kwonka nk’oku twaba twareebire, Sitaane naajanjaaza ekishuba ngu Yehova tarikutukunda. N’ahabw’ekyo obumwe waabangaanisa yaaba Yehova naakukunda, yebuuze oti: ‘N’oha ou nyine kwesiga—“ishe w’ebishuba” nari “Ruhanga orikwesigwa”?’—Yoh. 8:44; Zab. 31:5.

9. Yehova naaraganisa ki abo abarikumukunda? (Okuruga 20:​5, 6)

⁹ Teekateeka aha ku Yehova arikutwariza abarikumukunda. Yetegyereze ebi Yehova yaagambiire Musa n’Abaisraeli. (Shoma Okuruga 20:​5, 6.) Yehova naaraganisa ngu naija kugumizamu naagirira rukundo etahwaho abarikumukunda. Ebigambo ebyo nibituhamiza ngu Ruhanga waitu omwesigwa naakunda abaheereza be ahabw’okugira ngu nabo nibamukunda. (Neh. 1:5) N’ahabw’ekyo obumwe waaba nooyenda kwehamiza ngu Yehova naakukunda, twara akaire oyebuuze oti: ‘Ninkunda Yehova?’ Oine kumanya ngu: Ku oraabe noomukunda kandi orikuteeraho kumushemeza, tihaine ekiine kukureetera kubangaanisa yaaba nawe naakukunda. (Dan. 9:4; 1 Kor. 8:3) Mbwenu shi ku oraabe otarikubangaanisa yaaba nookunda Yehova, ahabw’enki noobangaanisa yaaba we naakukunda? Buzima gira obwesigye ngu Yehova naakukunda kandi tarikutsigaho.

10-11. Yehova naayenda ngu oreebe ota ekitambo? (Abagalatia 2:20)

¹⁰ Teekateeka aha kitambo. Ekitambo kya Yesu Kristo nikyo kiconco ekirikukirayo eki Yehova yaahaire abantu. (Yoh. 3:16) Mbwenu shi Yesu akafeera iwe nk’omuntu? Eego! Teekateeka aha bi entumwa Paulo yaarabiremu. Ijuka ngu akakora ebibi by’amaani atakabaire Omukristaayo, kandi na bwanyima akaba aine kugumizamu naarwanisa obutahikiirira bwe. (Rom. 7:​24, 25; 1 Tim. 1:​12-14) Kwonka nabwo, akabaasa kureeba ekitambo nk’ekiconco eki Yehova yaamuhaire we nk’omuntu. (Shoma Abagalatia 2:20.) Ijuka ngu Yehova akakoresa Paulo kuhandiika aha nshonga egyo. Kandi buri kyahandiikirwe ekiri omu Baibuli kikahandiikwa kutwegyesa. (Rom. 15:4) Ebigambo bya Paulo nibyoreka ngu Yehova naayenda oreebe ekitambo nk’ekiconco eki yaahaireyo ahabwawe. Waareeba ekitambo omu muringo ogwo, noija kuhamya obwesigye bwawe ngu Yehova naakukunda.

¹¹ Nitusiima munonga Yehova ahabw’okwohereza Yesu kwija omu nsi kutufeera. Kandi enshonga endiijo ahabw’enki Yesu yaizire omu nsi n’okugambira abandi amazima agarikukwata ahari Ruhanga. (Yoh. 18:37) Amazima ago nigatwariramu n’oku Yehova arikutwariza abaana be.

OKU YESU ARIKUTUHWERA KWIKIRIZA NGU YEHOVA NAATUKUNDA

12. Ahabw’enki nitubaasa kwesiga ebirikukwata ahari Yehova ebi Yesu yaayegyeise?

¹² Obu Yesu yaabaire ari omu nsi, akagamba amazima agarikukwata ahari Yehova. (Luk. 10:22) Buzima nitubaasa kwesiga ebirikukwata ahari Yehova ebi Yesu yaayegyeise. Ahabw’okuba akaba atwire na Yehova kumara obwire buraingwa atakaizire omu nsi. (Kol. 1:15) Ebi baakozire hamwe, n’ebi yaareebire ari hamwe nawe, bikamureetera kuhamiza kimwe ngu Yehova naakunda abaana be abarikumwesiga omu nsi. Yesu naahwera ata abantu kwikiriza ngu Yehova naabakunda?

13. Yesu naayenda ngu Yehova tumureebe tuta?

¹³ Yesu naayenda tureebe Yehova nk’oku arikumureeba. Omu bitabo by’Engiri Yesu akagamba ahari Yehova arikukoresa ekigambo “Tata” emirundi erikurenga 160. Kandi ku yaabaire aba naagamba n’abakuratsi be akaba akoresa ebigambo nka “Shoimwe” nari “Shoimwe ow’omu iguru.” (Mat. 5:16; 6:26) Obu Yesu yaabaire atakaizire omu nsi abantu bakaba nibeeta Yehova ebitiinisa nka ‘Ow’obushoboorozi bwona,’ ‘Rukira-boona,’ nari ‘Omuhangi wa byona,’ kwonka Yesu okukoresa ‘Tata’ nikyoreka omukago gw’amaani ogu Yehova aine n’abaheereza be. Hatariho okubangaanisa Yesu naayenda ngu tureebe Yehova nka Tataitwe owa rukundo orikukunda munonga abaana be. Ka tushwijume eby’okureeberaho bibiri obu Yesu yaakoresa ekigambo “Tata.”

14. Yesu akooreka ata ngu buri omwe ahariitwe n’ow’omuhendo ahari Tataitwe ow’omu iguru? (Matayo 10:​29-31) (Reeba n’ekishushani.)

¹⁴ Eky’okubanza teekateeka aha bigambo bya Yesu ebiri omuri Matayo 10:​29-31. (Kishome.) Ebiteera-nkumba n’obunyonyi bukye obutarikubaasa kukunda Yehova nari kumuramya. Kwonka, Tataitwe naabutwara nk’obw’omuhendo kandi naamanya obu buri kamwe karikugwa ahansi. Mbwenu shi ku araabe nikwo arikutwara atyo obunyonyi obwo, tarikukizaho kutureeba nk’ab’omuhendo ahabw’okugira ngu nitumuramya kandi nitumuheereza ahabw’okumukunda? Yesu akooreka ngu Tataitwe naamanya n’omubaro gw’eishokye ogu buri omwe ahariitwe aine aha mutwe. Yehova ku araabe naamanya n’obuntu bukye nk’obwo, nitubaasa kugira obwesigye ngu naatufaho munonga. Buzima, Yesu naayenda ngu buri omwe ahariitwe aikirize ngu n’ow’omuhendo ahari Tataitwe ow’omu iguru.

15. Ebigambo bya Yesu ebiri omuri Yohaana 6:44 nibikwegyesa ki ahari Sho ow’omu iguru?

¹⁵ Yetegyereze eky’okureeberaho kya kabiri obu Yesu yaakoresa ekigambo “Tata.” (Shoma Yohaana 6:44.) Sho ow’omu iguru akakweyiriza haihi kandi yaakureeta omu mazima. Ahabw’enki yaakweyiriize haihi? Ahakuba akareeba ngu oine omutima ogushemeire. (Byak. 13:48) Obu Yesu yaagamba ebiri omuri Yohaana 6:​44, naabaasa kuba yaabaire naajuriza ebigambo bya Yehova ebiri omuri Yeremia 31:3 ahu Yehova yaagambiire abaheereza be ati: “Nkakukunda, [nari nkakweyiriza haihi] na rukundo etahwaho.” (Yer. 31:3; gyeragyeranisa Hosea 11:4.) Teekateeka aha ki ekyo kirikumanyisa. Tataitwe ow’omu iguru owa rukundo naagumizamu kukureebamu ebirungi kukira ebi orikwereebamu.

16. (a) Yesu okweta Yehova Tataitwe akaba naamanyisa ki, kandi ahabw’enki twine kwesiga ebi yaagambire? (b) Noobaasa kuhamya ota obwesigye bwawe ngu Yehova ni Sho orikukirayo ou orikubaasa kugira? (Reeba akabokusi “Tataitwe Ou Twena Turikwetenga.”)

¹⁶ Yesu okugamba ahari Yehova nka Tataitwe, akaba ari nk’orikutugambira ati: “Yehova ni Tata kandi naimwe ni Shoimwe. Nimbahamiza ngu naabafaho kandi naakunda buri omwe ahariimwe.” N’ahabw’ekyo obumwe waabangaanisa yaaba Yehova naakukunda, yebuuze oti: ‘Mbwenu shi tinshemereire kwesiga ebigambo bya Yesu orikumanya gye Tataitwe, kandi orikugamba amazima obutoosha?’—1 Pet. 2:22.

GUMIZAMU NOOHAMYA OBWESIGYE BWAWE

17. Ahabw’enki twine kugumizamu nituhamya obwesigye bwaitu ngu Yehova naatukunda?

¹⁷ Twine kwongyera kuhamya ngu Yehova naatukunda. Nk’oku twayega, omuzigu waitu Sitaane naateeraho munonga kuturemesa kuheereza Yehova. Naayenda ngu tuhwemu amaani n’ahabw’ekyo naija kugumizamu naatureetera kuteekateeka ngu Yehova tarikutukunda. Kwonka titwine kumwikiriza kusingura.—Yob. 27:5.

18. Noobaasa kwongyera kuhamya ota ngu Yehova naakukunda?

¹⁸ Kubaasa kuhamiza kimwe ngu Yehova naakukunda, guma noomushaba kukuhwera kwereeba nk’oku arikukureeba. Teekateeka oku abaahandiikire Baibuli baagambire ahari rukundo ye n’oku arikutwariza abarikumukunda. Ijuka ngu naakunda weena orikumukunda. Guma nooreeba ekitambo nk’ekiconco eki Yehova yaahaireyo ahabwawe. Kandi gira obwesigye ngu Yehova ni sho ow’omu iguru nk’oku Yesu yaagambire. Reero haagira owaakubuuza ati: “Noohamya ngu Yehova naakukunda?” omugarukyemu otarikubangaanisa oti: “Eego naankunda! Kandi ninkora eki ndikubaasa buri izooba kworeka ngu nimukunda!”