Noogasirwa omu Katabo Okushwijuma Ebyahandiikirwe Buri Izooba?

Okushoma ekyahandiikirwe ky’eizooba n’ebirikukishoboorora kuruga omu katabo Okushwijuma Ebyahandiikirwe Buri Izooba ni kimwe aha bi orikukora butoosha kwirira haihi na Yehova? Waaba otarikukikora, noobaasa kukita aha ntebeekanisa yaawe? Baingi nibashoma ekyahandiikirwe ekyo kare omu kasheeshe, kugira ngu babaase kukiteekateekaho baaba nibakora emirimo ya butoosha. (Yos 1:8; Zab 119:97) Noobaasa kweyongyera ota kugasirwa omu kyahandiikirwe ky’eizooba? Shoma ebyahandiikirwe ebindi ebyetooroire ekyahandiikirwe ky’eizooba kubaasa kwongyera kukyetegyereza. Teeraho kuteekateeka aha biri omu Baibuli ebirikworeka omusingye oguri omu kyahandiikirwe ekyo. Bwanyima, teeraho kugyendera aha musingye ogwo. Waagyendera aha Kigambo kya Ruhanga waaba noocwamu aha nshonga zitari zimwe, nikiija kukwebembera kandi kikuhwere.​—Zab 119:105.

Abarikukora aha Beseeli omu nsi yoona nibashwijuma ebiri omu katabo Okushwijuma Ebyahandiikirwe Buri Izooba aha kyantsya. Omu myaka mikye ehingwire, puroguraamu ezo zitwire niziteebwa aha JW Broadcasting^® ahansi ya ENTEBEEKANISA ZAITU N’EBIRIKUBAHO. Ni ryari obu oheererukire kureeba emwe ahari zo? Obundi bimwe aha birikugambwaho nibyo byenyine ebi orikwetenga. Nk’eky’okureeberaho, ebirikukwata ahari Looti nibibaasa kukuhwera bita kucwamu gye?

MUREEBE VIDIYO MUTARIKUNDA ENSI (1YOH 2:15), REERO MUGARUKYEMU EBIBUUZO EBI:

• Puroguraamu egi ey’Okuramya kw’Akasheeshe yaaba eyegamiire aha musingye ki gw’omu Baibuli?

• Ebyahikire ahari Looti nibyoreka bita akabi akari omu kukunda ensi nari ebintu ebigirimu?​—Kut 13:12; 14:12; 19:3, 12, 13, 24-26

• Nitubaasa kworeka tuta ngu nitukunda Yehova, etari ensi nari ebintu ebigirimu?