Okweta Abantu

1. Kampeyini y’okweta abantu kwija aha ruteerane oru neetandika ryari?

¹ Waatebeekanisiza banywani baawe nari eka yaawe ekiihuro ky’omutaano, kandi otairemu amaani hamwe n’esente nyingi buzima noobeeta n’omuhimbo. Nikyo kimwe, bingi bikozirwe omu kutebeekanisa ekiihuro ky’eby’omwoyo ekirikwija kubaho aha ruteerane oruhango. Harikuburayo saabiiti ishatu oruteerane rukahika, nitwija kugira omugisha gw’okweta abandi kwija omu ruteerane oru orw’ebiro bishatu. Niki ekiraatuhwere kweta abantu n’omuhimbo kwija aha ruteerane oru?

2. Niki ekiraatuhige kwejumbira kimwe omu kampeyini y’okweta abantu aha ruteerane oru?

² Twateekateeka aha ku turikwija kugasirwa aha kiihuro ky’eby’omwoyo eki Yehova atutebeekanisiize aha ruteerane oru, nikiija kutuhiga kwejumbira kimwe omu kampeyini y’okweta abantu. (Isa. 65:13, 14) Twine kumanya ngu kampeyini egi erikubaho buri mwaka neerugamu ebirungi. (Reeba Akabokisi “Niharugamu Ebirungi.”) Bamwe aha bu turaayete nibaija kuba hamwe naitwe omu ruteerane oru orw’ebiro bishatu. N’obu turaabe tutarikumanya yaaba boona abu turaayete baraije, okuteeraho kwaitu kwejumba omu kampeyini egi nikiija kureetera Yehova kuhimbisibwa kandi kyorekye ngu nitufayo aha bantu boona.—Zab. 145:3, 7; Kush. 22:17.

3. Obupapura bw’okweta abantu kwija aha ruteerane oru nibwija kugabwa buta?

³ Buri kakiiko k’abareeberezi kaine kucwamu oku obupapura bw’okweta abantu kwija aha ruteerane oru buraagabwe, otwariremu na yaaba bushemereire kutsigwa omu maka agataraashangwemu bantu nari kubugaba omu myanya erimu abantu baingi omu kicweka kyanyu ky’okubuuriramu. Mwaba nimugaba obupapura obwo aha wiikenda nimubaasa kubugaba na magaziini kyaba nikibaasika. Bwanyima y’okuheza kampeyini egi nitwija kugira okushemererwa ahabw’okumanya ngu tukagyejumbiramu kimwe kandi twayeta abantu baingi kwija kutwegaitaho aha kiihuro ky’eby’omwoyo eki Yehova atutebeekanisiize.

Niharugamu Ebirungi

Emyaka mingi enyima munyaanyazi-itwe omwe owaayejumbire omu kampeyini y’okweta abantu kwija aha ruteerane orw’ebiro bishatu, akaba naayebuuza yaaba okuteeraho kwe kuraarugyemu ebirungi. Akaba naayebuuza yaaba ‘abantu baraahurikize kandi bakaija aha ruteerane?’ Aha Rwamukaaga omu kasheeshe aha ruteerane orwo, akareeba omushaija ow’ediini erikwetwa Sikh, atyo yaamweyanjurira. Omushaija ogwo akagira ngu akaija aha ruteerane orwo ahakuba akatunga akapapura kaitu k’okumweta. Akaba aine ebibuuzo bingi ebi munyaanyazi-itwe yaabaasize kumugarukamu. Akagira ngu akashemererwa ahabw’okuba aha ruteerane orwo n’ahabw’okureeba abaabaire bariho baine emitwarize mirungi kandi bajwaire gye. Bwanyima aha izooba niryo rimwe, munyaanyazi-itwe ogwo akagaaniira n’omushaija n’omukazi we abaabaire bashutami haihi nawe. Nabo bakaba batungire akapapura k’okubeeta kandi bakaizira omu baasi. Bakaba bashemereirwe ahabw’okwija kandi bakatebeekanisa kugaruka n’aha Sande. Munyaanyazi-itwe ogwo akeetegyereza ngu ni kikuru okwejumba omu kampeyini y’okweta abantu kwija aha ruteerane buri mwaka.
Aha ruteerane orw’ebiro bishatu oruhweire, omushaija n’omukazi we baapayoniya ab’obutwire bakeeyanjurira omukazi n’omushaija we abaabaire bakuzire. Omukazi n’omushaija ogu bakagira ngu gukaba guri omurundi gwabo gw’okubanza kwija. Baapayoniya bakababuuza bati: “N’oha owabeetsire?” Bakagarukamu ngu, “Izooba rimwe, ku twagarukire omuka, twashanga akapapura k’okutweta kari ahansi y’orwigi.” Bakashoma akapapura ako kandi baijuza akacweka akaabaire kari enyima yaako. Bamwe aha baabaire bari aha ruteerane orwo bakarya kyamushana nabo. Bakashemererwa munonga ahabw’ebyabaire aha ruteerane orwo kandi bacwamu kugaruka ekiro ekyakuratsireho. Entebeekanisa y’okubataayaayira ekakorwa kugira ngu babaase kumanya ebirikukiraho.