Baanabi Mubatware nk’Eky’Okureeberaho—Yoeli
1. Nitubaasa kutooreza tuta Yoeli omu kubuurira kwaitu?
1 Nabi Yoeli akaba ari oha? Yoeli akooreka ngu ni “mwene Pesuel.” (Yoel. 1:1) Nabi ogu omucureezi akata omutima aha butumwa bwa Yehova, beitu tikweha kitiinisa nka nabi. Naitwe, twaba nitubuurira titushemereire kwesherurira ekitiinisa, twine kuta omutima ahari Yehova hamwe na Baibuli. (1 Kor. 9:16; 2 Kor. 3:5) Okwongyera ahari ekyo, amakuru agu turikubuurira nigatugaruramu amaani. Ni bunabi ki obwarangirwe nabi Yoeli oburikubaasa kutuha amatsiko kandi bukatureetera twabuurira n’obweziriki omu bunaku obu?
2. Okumanya ngu ekiro kya Yehova kiri haihi nikituhiga kukora ki?
2 ‘Ekiro kya Yehova Kiri Haihi.’ (Yoel. 1:15): Ebigambo ebi n’obu biraabe byahandiikirwe ira munonga, nitutuura omu bwire obu biraije kuhikiirizibwa omurundi gw’aha muheru. Embeera mbi eri omu nsi, okutafayo kw’abantu n’okushekyererwa oku turikubugana omu kubuurira nibyoreka ngu turi omu biro by’aha mperu. (2 Tim. 3:1-5; 2 Pet. 3:3, 4) Okumanya ngu emperu eri haihi kuhika, nikutuhiga kuta okubuurira omu mwanya gw’okubanza omu biturikukora.—2 Pet. 3:11, 12.
3. Ahabw’enki okubuurira kuri kukuru nk’oku turikwiririra obwire bw’okubonabona kwingi?
3 ‘Yehova Naija Kuba Obuhungiro bw’Abantu Be.’ (Yoel. 3:16): Okutengyetsa ensi okurikugambwaho omu runyiriri oru nikukwata aha bunaku obu Yehova araije kucweramu orubanja omu bwire bw’okubonabona kwingi. Nituhumuurizibwa ahabw’okumanya ngu Yehova naija kujuna abaheereza be abeesigwa omu bunaku obwo. (Kush. 7:9, 14) Twaba nitubuurira kandi tukareeba oku Yehova arikuturinda n’oku arikutugaruramu amaani, nikitureetera kugira okwikiriza n’okugumisiriza okuraije kutuhwera omu bwire bw’okubonabona kwingi.
4. Ahabw’enki nitubaasa kugira okushemererwa n’obumanzi turikworekyera ebiro by’omumaisho?
4 N’obu bamwe baraabe nibagira ngu obutumwa bwa nabi Yoeli nibutiinisa, beitu nibuha abantu ba Ruhanga amatsiko g’okucungurwa. (Yoel. 2:32) N’ahabw’ekyo, katworekyere ebiro by’omumaisho n’obumanzi kandi tubuurire amakuru marungi g’Obukama bwa Ruhanga n’obweziriki, turikugyendera aha biri omu Yoeli 2:23 ebirikugira ngu: ‘Nimushemererwe; mwesiimire omuri Yehova Ruhanga waanyu.’