“Oku Turikubaasa Kugaba Magaziini Omuri . . .”

Buri kwezi omu Oruteerane rw’Obuheereza nihaba harimu ekicweka ekirikworeka oku turikubaasa kugaba magaziini. Ekigyendererwa kyakyo tikugamba ebiri omu magaziini. Kureka kitebeekanisiibwe kutuhwera kuhikaanisa ebiteekateeko aha ku turikubaasa kuzigaba. N’ahabw’ekyo kurugiirira aha buhabuzi oburikuheebwa, orikwebembera ekicweka ekyo ashemereire kukoresa enyanjura ngufu munonga. Bwanyima ashemereire kushaba abamuhurikiize kuhikaanisa ebiteekateeko aha kicweka kimwe (nari ebicweka ebirikuhikaana n’omutwe gwa magaziini), kugira ngu boona beejumbemu kandi bareebe n’obuhabuzi obundi obu barikubaasa kukoresa. Omu mwanya gw’okushaba abamuhurikiize kuha enyanjura yoona, naabashaba kugamba ebibuuzo ebi abantu barikwenda kutunga eby’okugarukamu byabyo, bwanyima abashaba n’okugamba ebyahandiikirwe ebi barikubaasa kubashomera. Naahendera n’eby’okureeberaho kworeka oku buri magaziini erikubaasa kugabwa. Nituhigwa kushoma magaziini ezo tutakaizire mu nteerane kugira ngu tube twetebeekaniise gye kwejumba omu kuhikaanisa ebiteekateeko. Twena twatebeekanisa gye ekicweka eki, nitwija kuhwerahwerana.​—Enf. 27:17.