Niki Ekirikukureetera Kwesiima?
1. Niki ekirikutureetera kwesiima aha muheru gwa buri kwezi?
1 Niki ekirikukureetera kwesiima, ku turikushabwa kuhayo ripoota zaitu z’okubuurira aha muheru gwa buri kwezi? (Gal. 6:4) Yaaba turi baapayoniya ab’omutaano turikubuurira eshaaha 130 nari turi ababuurizi abaikiriziibwe kubuurira edakiika 15, twena tushemereire kwesiima ahabw’okugira ngu nituheereza Yehova n’omutima gwaitu gwona.—Zab. 100:2.
2. Ahabw’enki tushemereire kuheereza Yehova n’obweziriki?
2 Ahabw’okugira ngu Yehova n’ow’Obushoboorozi Bwona, twine kumuha ekirikukirayo oburungi. (Mal. 1:6) Tukeehayo kumuheereza ahabwa rukundo ei tumwiniire. N’ahabw’ekyo buri izooba nari aha muheru gw’okwezi, twaba nituhamya ngu tukoreise gye obwire, amaani n’etaranta zaitu kuheereza Yehova nikitureetera kwesiima. (Enf. 3:9) Kwonka twaba nituhurira ngu Yehova titumuhaire ekirikukirayo oburungi, nituba twine kuteeraho kwongyera aha buheereza bwaitu.—Rom. 2:15.
3. Ahabw’enki tutashemereire kwegyeragyeranisa n’abandi?
3 Tutegyeragyeranisa n’Abandi: Ti kirungi kwegyeragyeranisa n’abandi nari kwegyeragyeranisa n’obu twabaire tukiine amaani. Embeera nizihinduka kandi titurikwinganisa maani. Okwegyeragyeranisa nikurugamu okuhayahayana nari okwereeba nk’otaine mugasho. (Gal. 5:26; 6:4) Yesu taragyeragyeraniise ebi abantu baabaire nibabaasa kukora. Kureka akaba asiima omuntu kurugiirira aha ki yaabaire abaasa kukora.—Mak. 14:6-9.
4. Nitubaasa kwega ki omu nfumu ya Yesu ey’etaranta?
4 Omu nfumu ya Yesu ey’etaranta, buri mukozi akaheebwa etaranta kurugiirira aha ‘ku yaabaire naabaasa.’ (Mat. 25:15) Mukama waabo ku yaagarukire akabashaba kureeta ebi baakozire, abo abaakozire n’obweziriki okurugiirira aha maani n’embeera zaabo, bakasiimwa kandi bataaha omu kushemererwa kwa mukama waabo. (Mat. 25:21, 23) Naitwe twaguma nitwejumbira kimwe omu murimo gw’okubuurira, nitugira obwesigye ngu Ruhanga naasiima ebi turikukora kitureetera kwesiima!