‘Otatiina’
1. Ni buremeezi ki nk’obwa Yeremia obu turikubaasa kutunga omu kubuurira?
1 Yeremia ku yaatumirwe nka nabi, akereeba nk’otarikubaasa. Kwonka Yehova akamugira ngu ‘atatiina,’ kandi yaamugumya ngu ahikiriize omurimo gwe. (Yer. 1:6-10) Omu bunaku obu, enshoni nari okwetiina nibibaasa kuturemesa kwejumba omu murimo gw’okubuurira. Okutiina oku abantu baaraatureebe nari oku baraatutwarize nabyo obumwe nibibaasa kuturemesa kubuurira. Nitubaasa kusingura tuta okutiina nk’okwo, kandi ni migisha ki erikwija kurugamu?
2. Okutebeekanisa nikwija kutuhwera kuta kutuubya aha kutiina twaba nituza kubuurira?
2 Tebeekanisa Bukiri Kare: Okutebeekanisa gye nikubaasa kutuhwera kutuubya aha kutiina. Nk’eky’okureeberaho, twateekateeka kare aha bi abo abarikutwangira ngu tutababuurira barikubaasa kugamba, nitwija kuba twetebeekaniise gye kubagarukamu. (Enf. 15:28) Nitubaasa kukoresa obwire bw’Okuramya kw’Eka kwegyezamu kubaasa kwetebeekanisiza embeera ezigumire ezi turikubaasa kubugana ah’eishomero n’omu kubuurira.—1 Pet. 3:15.
3. Okwesiga Yehova nikutuhwera kuta kusingura okutiina?
3 Yesigye Yehova: Okwesiga Yehova nikwija kutuhwera kusingura okutiina. Yehova naatuhamiza ngu naija kutuhwera. (Isa. 41:10-13) Obwo nibwo burinzi bw’amaani obu turikubaasa kutunga. Kandi, Yesu akatuhamiza ngu n’obu haakubaho embeera ezi tuteetebeekanisiize, omwoyo gurikwera gwa Ruhanga nigwija kutubaasisa kubuurira omu muringo murungi. (Mak. 13:11) N’ahabw’ekyo, shaba Yehova obutoosha kukuha omwoyo gwe gurikwera.—Luk. 11:13.
4. Ni birungi ki ebirikuruga omu kugumisiriza omu kubuurira n’obu twakubugana oburemeezi?
4 Ebirungi Ebirikurugamu: Twagumisiriza omu kubuurira n’obu twakubugana oburemeezi, nikituha amaani kwija kusingura okugyezibwa okw’ebiro by’omumaisho. Nitugira obumanzi—omutwarize ogurikugirwa abo abarikuheebwa omwoyo gurikwera. (Byak. 4:31) Ekindi, twasingura okutiina turikuhwerwa Yehova, nituhamya okwikiriza kwaitu n’obwesigye bwaitu omu mukono gwe ogurikucungura. (Isa. 33:2) Kandi nitutunga okushemererwa n’okumarwa ebirikuruga omu kumanya ngu nitushemeza Tataitwe ow’omu iguru. (1 Pet. 4:13, 14) N’ahabw’ekyo ka tubuurire amakuru g’Obukama n’obumanzi tutaine kutiina, butoosha twine obwesigye ngu Yehova naatuhwera!