‘Okugira Omujinya ahabw’Omwoyo Gurikwera’
1. Niki eki tushemereire kugira omu kubuurira kwaitu?
1 Titushemereire kuhwa amaani omu buheereza bwaitu bw’Ekikristaayo. Kureka nituhigwa ‘kugira omujinya ahabw’omwoyo gurikwera, n’okuheereza Yehova.’ (Rom. 12:11, NW) Kwonka, hariho ebintu bingi ebirikubaasa kutureetera kuhwa amaani omu buheereza bwaitu. Nitubaasa “kwenegyeza” tuta omujinya gwaitu omu murimo gw’Obukama?—2 Tim. 1:6, 7.
2. Okweshomesa Baibuli kwine kakwate ki n’okugira omujinya omu kubuurira?
2 Okweshomesa Baibuli: Omubuurizi w’Obukama omurungi n’ogwo orikukunda ebiragiro bya Yehova kandi orikukwatwaho munonga amazima agari omu biragiro ebyo. (Zab. 119:97) Twayega amazima g’omu Baibuli kurabira omu kweshomesa Baibuli, ekyo nikituhiga kandi tweyongyera kugira omujinya. Rukundo ei twiniire Orikutuha amazima ago hamwe n’ekyetengo eki twine eky’okubuurira abandi amakuru marungi, nabyo nibituhiga kuhimbisa Ruhanga n’okubuurira aha iziina rye. (Heb. 13:15) Okugira obweziriki omu kubuurira amakuru marungi nikworeka ngu buzima nitumanya omugasho gw’amakuru ago.
3. Omwoyo gwa Ruhanga nigubaasa kutuhwera guta omu kubuurira kwaitu?
3 Shaba Ruhanga Kukuha Omwoyo Gwe: Ebirungi omu kubuurira tibirikubaho ahabw’amaani gaitu. Nitugira omujinya ahabw’okugira ngu omwoyo gwa Ruhanga nigutuhwera. (1 Pet. 4:11) Okwirira haihi Yehova, Oburugo ‘bw’amaani’ nikiija kutuhwera kugira amaani omu by’omwoyo, tubaase kubuurira n’obumanzi. (Isa. 40:26, 29-31) Entumwa Paulo ku yaatungire oburemeezi omu kubuurira kwe, ‘akahwerwa Ruhanga.’ (Byak. 26:21, 22) Omwoyo gwa Ruhanga nigubaasa kutuhwera okugira omujinya omu kubuurira kwaitu, n’ahabw’ekyo tushemereire kushaba Ruhanga kugutuha.—Luk. 11:9-13.
4. Okugira omujinya nikubaasa kurugamu birungi ki, kwonka omu kugworeka twine kwijuka ki?
4 Okugira omujinya omu kubuurira aha Bukama, butoosha nikukira kuhiga Abakristaayo bagyenzi baitu. (2 Kor. 9:2) Abantu nibabaasa kurahuka kwikiriza amakuru, twaba tugabuuriire n’omujinya kandi tutarikubangaanisa. Kwonka omujinya, butoosha gwine kworekwa omu bwengye n’omu bucureezi. (Tit. 3:2) Obutoosha, tuteereho kuha ekitiinisa ou turikubuurira kandi tumurekyere obugabe kwecweramu.
5. Ni buhabuzi ki bw’omu byahandiikirwe obu tushemereire kuteeraho kugyenderaho?
5 Nk’ababuurizi b’Obukama, butoosha ka ‘tugire omujinya ahabw’omwoyo gurikwera.’ Ka tuteereho kugira omujinya kurabira omu kweshomesa Baibuli n’okushaba Yehova obutoosha, ahakuba niwe arikubaasa kutuha amaani g’omwoyo gurikwera. Omu muringo ogwo, nitubaasa kubuurira n’omujinya ahabw’okuhwerwa ‘o[m]woyo [o]rikwera turikwikiririza kimwe tutarikubangaanisa.’—1 Tes. 1:5.