Obwire bw’Okurisibwa Yehova Hamwe n’Okushemererwa
1. Yehova naareeberera ata abaheereza be omu by’omwoyo?
1 Yehova na rukundo naareeberera abaheereza be omu by’omwoyo. N’obu abantu baingi omu nsi baraabe baine enjara y’eby’omwoyo, itwe nituriisibwa gye omu by’omwoyo. (Isa. 65:13) Omuringo gumwe ogu Yehova arikuturiisamu eby’okurya eby’omwoyo n’okurabira omu nteerane empango ez’ebiro bishatu ezirikubaho buri mwaka. Waatandikire kwetebeekanisa kubaasa kubaho ebiro byona bishatu eby’Oruteerane Oruhango orwine omutwe “Okwebemberwa Omwoyo gwa Ruhanga”? Eby’okurya eby’omwoyo birungi kandi ebirikwombeka bitebeekanisiibwe.
2. Okwetebeekanisiza oruteerane kare nikutwariramu ki?
2 Tebeekanisa Bukiri Kare: “Ebi omweziriki ateekateeka kukora tibibura kureeta mweru.” (Enf. 21:5) N’ahabw’ekyo, omu kwetebeekanisa kwawe kubaho ebiro byona bishatu eby’oruteerane oruhango, otakaayebwa kushaba ou orikukorera kukwikiriza kuba omu ruteerane orwo. Ku oraabe noija kwetenga oburaaro, waatebeekaniise kubaasa kubutunga? Kandi noija kwetenga kutebeekanisa kyamushana kugira ngu obaase kuriira hamwe n’ab’eishe-emwe aha mwanya gw’oruteerane. Buri izooba teeraho kuhika aha mwanya gw’oruteerane kare obaase kutunga omwanya gw’okushutamaho kandi oyejumbe omu kyeshongoro n’eshaara ebirikutandika.
3. Ni bijwaro ki ebi tushemereire kutebeekanisa kujwara?
3 Nitwenda kuhamya ngu emyenda ei turikuza kujwara eshemeire kandi ecumire gye. (1 Tim. 2:9, 10) Enteerane empango ez’ebiro bishatu nizituha omugisha gw’amaani kuha obujurizi abantu. Okuguma nitujwara gye twaba turi omu tauni ezirikubamu enteerane ez’ebiro bishatu kandi tukajwara na baagi zaitu z’oruteerane, nitugira entaaniso n’abatari baikiriza kandi nitwija kugira ekishushani kirungi aha baratureebe.
4. N’enki ekirikwija kutuhwera n’ab’omu maka gaitu kugasirwa kihango omu puroguramu?
4 Hurikiza Gye: Buzima titurikwenda kufeerwa bimwe aha by’okurya by’omwoyo ebiratuheebwe! (Enf. 22:17, 18) Twakuratira omu Baibuli zaitu kandi tukagira ebi twahandiika, nikiija kutuhwera kuguma tutaire omutima aha birikugambwa kandi twetantare ebirikubaasa kutuhuzya. Omu mwabazyo nitubaasa kukoresa ebi twahandiika, kugaaniira n’abandi aha bikuru ebyaba biri omu puroguramu. Omu myaka ehweire, kyetegyereziibwe ngu bamwe aha minyeeto nibashutama hamwe omu nteerane empango reero batandika kugaaniira nari kwohererezana obutumwa aha simu zaabo puroguramu erikugyenda omumaisho. Twaba twine abaana, otwariiremu n’eminyeeto, nikibaasa kuba eky’oburyo itwe kushutama nabo omu mwanya gw’okubareka bakashutama n’endiijo minyeeto bonka.
5. Nitubaasa kwongyera tuta kushemererwa twaba turi omu ruteerane rw’ebiro bishatu?
5 Shemerererwa Okuba n’Abandi: Eby’okurya birungi nibinura twabiriira hamwe na banywani baitu. (Enf. 15:17) Nikyo kimwe, okuba hamwe n’ab’eishe-emwe na banyaanyazi-itwe omu ruteerane rw’ebiro bishatu nikutwongyera okushemererwa. N’ahabw’ekyo, puroguramu yaaba etarikugyenda omumaisho, ka ni kirungi okuteeraho kuhika aha bandi okabeeyajurira okubaasa kushemererwa nabo! (Zab. 133:1) Orikwanjura puroguramu yaatushaba kushutama omu myanya yaitu obweshongoro butakatandikire, tushemereire kureekyeraho kugaaniira reero tukashutama omu myanya yaitu puroguramu etakatandikire.
6. Ha eky’okureeberaho ekirikworeka oku twakubaasa kubuurira abantu b’omu rurembo ahu turikutungira oruteerane rw’ebiro bishatu.
6 Koresa Buri Kagisha Kubuurira: Enteerane ez’ebiro bishatu butoosha nizituha omugisha murungi gw’okubuurira. Baingi ahari abo abarikwija omu nteerane ezi ku barikuza omu myanya y’okuriiramu bwanyima ya puroguramu, nibabuuzibwa abarikukora omu myanya egyo aha birikukwata aha mutwe gw’oruteerane ogurikuba guri aha baagi zaabo. Eki kibahwereire kutandika kugaaniira nabo aha birikukwata aha mazima. Bamwe aha baabuurize bakeetwa aha ruteerane oru kandi baija.
7. Ahabw’enki tushemereire kuza omu ruteerane rw’ebiro bishatu orurikwija?
7 Okuteebekanisa puroguramu, ebyombeko ebiraabemu enteerane, abarayebembere omu kutebeekanisa enteerane ezi, hamwe n’okutebeekanisa embazo kutwire enkumi n’enkumi z’eshaaha. Omurimo muhango ogurikworeka rukundo ogukozirwe omu kutebeekanisa eby’okurya eby’omwoyo ebi, nigworeka ngu Yehova naafayo munonga aha bantu be. Twena ka tuteereho kuba omu ruteerane orwo tubaase kwega baingi. Twakora tutyo, obutashushana n’ab’ensi nitwija ‘kweshongora ahabw’obunanukye bw’omu mutima.’—Isa. 65:14.
[Akabokusi aha rupapura 4]
Eby’Okweijutsya Ebirikukwata aha Ruteerane orw’Ebiro Bishatu
◼ Eshaaha za Puroguramu: Puroguramu neija kuba neetandika shaaha 3:20 ez’Omukasheeshe ebiro byona bishatu. Emyanya y’oruteerane neija kuba neigurwa shaaha 2:00 ez’Omukasheeshe. Obweshongoro ku buraatandike, buri omwe ashemereire kutunga ah’okushutama kugira ngu puroguramu etandikye hatabaireho okuteganisibwa. Orwakataano n’Orwamukaaga puroguramu neija kuhendera shaaha 10:55 ez’omu mwabazyo reero aha Sande ehendere shaaha 10:00 ez’omu mwabazyo.
◼ Ah’Okwemereza Ebiiruka: Aha myanya y’Enteerane yoona, ahu tutungire ah’okwemereza ebiiruka, abaraabanze kwija nibo baraabanze kutunga ah’okubyemereza. Oine baagi y’Oruteerane, niwe araaheebwe ah’okwemereza ekiiruka kye. Abarema abarikwenda kwemereza ebiiruka byabo haihi n’ah’okutaahiramu bashemereire kushaba abarikwakiira abantu kubahwera.
◼ Okukwata Emyanya: Noobaasa kukwatira emyanya abu waija nabo nari abu orikutuura nabo bonka.
◼ Kyamushana: Nooshabwa kwija n’eby’okurya omu mwanya gw’okuza kubisherura ahandi omu shaaha za kyamushana. Noobaasa kureetera ebyokurya byawe omu kintu kikye eki orikubaasa kuta ahansi y’entebe. Ebintu ebihango, ebirikwatika, n’amaarwa tibirikwikirizibwa aha mwanya gw’oruteerane.
◼ Okuhayo: Nitubaasa kworeka okusiima kwaitu turikuhayo twekundiire kushemba omurimo gw’Obukama ogurikukorwa omu nsi yoona, twaba turi omu Kyombeko ky’Obukama nari omu nteerane empango. Ceeka ezirikuheebwayo omu nteerane empango, zishemereire kuhandiikwa omu iziina ry’ekibiina eririkukoresibwa omu ihanga eryo.
◼ Zaabutandu: Haabaho orikwetenga obujanjabi obw’ahonaaho aha ruteerane oruhango, hikiirira omwe aha barikwakiira abantu oraahikiirire abarikukora aha by’obujanjabi omu ruteerane kugira ngu abakugu abo babaase kwetegyereza embeera ye kandi bamuhe n’obujanjabi oburikwetengyesa. Abarikukora aha by’obujanjabi obw’ahonaaho nibaija kureeba oku baraatware enshonga egi omu maisho.
◼ Abatarikuhurira Gye: Shaba bakutungire omwanya haihi n’omugambi.
◼ Eby’Emigaju: Enteerane ezi ezimwe niziba omu byombeko. N’ahabw’ekyo, nikiba kiri kirungi okutakoresa emigaju ey’amaani, erikubaasa kukora kubi abaine oburemeezi omu kwitsya.—1 Kor. 10:24.
◼ Foomu z’Okuhandikaho Abo Abarikwenda Kwega Baibuli: Foomu Please Follow Up (S-43) eshemereire kukoresibwa kubaasa kuhandiika ebirikukwata aha muntu ogwo owaayoreka ngu naayenda kumanya ebirikukiraho bwanyima y’okumubuurira kitaraariire omu bwire bw’oruteerane. Ababuurizi bashemereire kwija na foomu Please Follow Up (S-43) emwe nari ibiri aha ruteerane. Foomu ezijuziibwe gye nizibaasa kuheebwa abarikukora aha by’ebitabo nari omuhandiiki w’ekibiina kyawe waaheza kugarukayo.—Reeba Our Kingdom Ministry aka Febwari 2005, rup. 6.
◼ Emyanya y’Okuriiramu: Haisa Yehova ekitiinisa orikutwaza gye omu myanya y’okuriiramu. Omu myanya mingi, abantu nibakira kuhayo akasiimo kurugiirira aha buheereza.
◼ Oburaaro: (1) Nooshabwa kutakwatisa ebishengye ebi otaraakorese, kandi otakaarenzya aha mubaro ogurikwikirizibwa kuraara omu kishengye ekyo. (2) Waaba nooyenda kushazamu okushaba kwawe, manyisa aba hoteeri bukiri kare. (3) Twara akagaari k’emigugu obu orikuba nooza kukakoresa bwonka, kandi waaheza, kagarure ahonaaho kugira ngu n’abandi bakakorese. (4) Otakateekyera omu bishengye ebitarikwikirizibwa kuteekyerwamu. (5) Tsigira ogwo orikuboneza ekishengye akasiimo. (6) Obwire bwona yoreka ebyana by’omwoyo orikukoragana gye n’abakozi ba hoteeri. (7) Ku oraatungye oburemeezi omu kishengye omu orikuraara, manyisa abarikukora aha by’Oburaaro mwaba muri aha mwanya gw’oruteerane.