‘Naaha Amaani Abatagaine’
1 Obumwe na bumwe, twena nituruha. Oburuhe tiburikureetwa okukora emirimo kwonka, kureka nibureetwa n’oburemeezi oburikutuhikaho omu ‘biro ebi eby’akabi kaingi.’ (2 Tim. 3:1) Nk’abaheereza ba Yehova, nitutunga tuta amaani omu by’omwoyo agu turikwetenga okubaasa kuhamira omu buheereza bwaitu? Nitugatunga, twayesiga Yehova, “ow’amaani omu bushoboorozi.” (Isa. 40:26) Naamanya ebyetengo byaitu kandi buzima aine ekyetengo ky’okutuhwera.—1 Pet. 5:7.
2 Oku Yehova Arikutuhwera: Yehova naatuha amaani arikwejunisa omwoyo we orikwera, nigwo mwoyo ogutaremwa ogu yaakoreise omu kuhanga byona. Ku turikuruha, omwoyo wa Ruhanga naatuhwera ‘kugarukwamu amaani.’ (Isa. 40:31) Yebuuze, ‘Ni ryari obu mpereeruka kushaba kuheebwa omwoyo orikwera ngu ampe amaani g’okuhikiiriza obujunaanizibwa bwangye nk’Omukristaayo?’—Luka 11:11-13.
3 Ku turikushoma, tukacumitiriza aha Kigambo kya Ruhanga buri izooba, kandi tukeshomesa ebitabo by’Ekikristaayo butoosha, nitwija kuba nk’omuti gw’amaani “ogubyairwe aha rubaju rw’amaizi, ogwana ebyana byagwo omu bunaku bwabyo, n’amababi gaagwo tigahotoka.”—Zab. 1:2, 3.
4 Yehova naakoresa n’abaikiriza bataahi baitu ‘okutugumya.’ (Kol. 4:10, 11) Ku turikuba turi omu nteerane z’ekibiina, nibatugumya kurabira omu kugaaniira naitwe aha birikwombeka, omu kugarukamu ebibuuzo, n’omu mbazo. (Byak. 15:32) Abareeberezi Abakristaayo namunonga nibatuha obuhwezi omu by’omwoyo kandi batugaruramu amaani.—Isa. 32:1, 2.
5 Obuheereza: Waahurira ngu noohwamu amaani, otakaareka kubuurira! Obutashushana n’endiijo mirimo, okwejumba omu buheereza butoosha nikutuhuumuriza. (Mat. 11:28-30) Okwejumba omu kubuurira amakuru marungi nikutuhwera okuta omutima aha Bukama bwa Ruhanga n’aha migisha ey’omu biro by’omu maisho.
6 Hariho omurimo muhango gw’okukora obusingye obu obubi butakacwekyereziibwe. N’ahabw’ekyo, tushemereire kuguma tuhamiire omu buheereza bwaitu, ‘turikukoresa amaani agu Ruhanga arikutuha.’ (1 Pet. 4:11) Twine obuhwezi bwa Yehova, nitwija kuheza omurimo gwaitu, ahakuba ‘naaha abaruhire amaani.’—Isa. 40:29.