Ruhanga Akahanga Omushaija n’Omukazi ab’Okubanza

Ruhanga akakora omusiri omu mwanya ogurikwetwa Edeni. Omusiri gukaba gurimu ebimuri bingi, emiti n’enyamaishwa. Bwanyima Ruhanga akahanga omushaija w’okubanza, Adamu, kuruga omu mucuucu yaamuhuuha omunyindo. Noomanya ekyabaireho? Adamu akaba omuntu ohuriire! Yehova akaha Adamu omurimo gw’okureeberera omusiri, kandi akamugira ngu ayete enyamaishwa zoona amaziina.

Yehova akaha Adamu ekiragiro kikuru. Akagambira Adamu ati: ‘Noobaasa kurya aha bijuma by’emiti yoona kureka ebijuma by’omuti gumwe ogw’omutaano nibyo otarikwikirizibwa kuryaho. Waarya aha bijuma by’omuti ogwo, noija kufa.’

Bwanyima Yehova akagira ati: ‘Naaza kukorera Adamu omuhwezi.’ Akagwejegyeza Adamu munonga, kandi yaamwihamu orubaju rumwe. Yehova akakoresa eigufa ry’orubaju orwo, yaarihangamu omukazi yaamuha Adamu. Eiziina rye akaba ari Haawa. Adamu na Haawa bakaba eka y’okubanza. Adamu akeehurira ata ku yaatungire omukazi? Adamu akashemererwa munonga yaagira ati: ‘Reeba ou Yehova yaahanga omu rubaju rwangye. Ogu naashushana naanye.’

Yehova akagambira Adamu na Haawa ngu bazaare abaana baijuze ensi. Akaba naayenda ngu bakorere hamwe bashemereirwe bahindure ensi yoona paradiso, nari omusiri murungi, nka Edeni. Kwonka tikwo kyabaire. Ahabw’enki? Nituza kwega ebirikukiraho omu shuura erikukurataho.