Ekicweka 5
Ekiconco ky’Omuhendo eky’Obugabe obw’Okwecweramu
1, 2. Ni kiconco ki eky’omuhendo eki twahangirwe nakyo?
OKUBAASA kwetegyereza ahabw’enki Ruhanga naarekaho okubonabona n’eki araije kukukorera, twine kwetegyereza oku yaatuhangire. Taratuhangire na mubiri n’obwonko byonka. Kureka akatuhanga n’obwengye bw’omutaano, hamwe n’emitwarize.
2 Ekicweka kikuru ky’obwengye hamwe n’ebiteekateeko byaitu, n’obugabe obw’okwecweramu. Buzima, Ruhanga akatuhanga n’obugabe bw’okwecweramu. Buzima kikaba kiri ekiconco ky’omuhendo kuruga ahariwe.
Oku Tuhangirwe
3-5. Ahabw’enki nitusiima obugabe obw’okwecweramu?
3 Ka twetegyereze oku obugabe obw’okwecweramu bwine akakwate n’enshonga ahabw’enki Ruhanga arekireho okubonabona. Banza oteekateekye ahari eki: Nooyoreka okusiima ahabw’okugira obugabe bw’okwecweramu aha ki oraagambe, oraarye, oraajware, omurimo ogu oraakore, ahu oraatuure n’oku oraatuure? Ninga okaayenzire ngu omuntu akucweremu buri ki oraagambe n’eki oraakore obwire bwona omu magara gaawe?
4 Tihariho omuntu otebeekaine orikwenda ngu bamwiheho obugabe bwe bwona. Ahabw’enki? Ahabw’oku Ruhanga yaatuhangire. Baibuli neetugira ngu Ruhanga akatuhanga omu ‘kishushani kye n’omu muringo gwe,’ kandi gumwe aha miringo ei Yehova aine n’obugabe obw’okwecweramu. (Okutandika 1:26; Eky’Ebiragiro 7:6) Ruhanga abantu akabahangiramu ekiconco ekyo eky’omuhendo—nibwo bugabe obw’okwecweramu. Egi niyo nshonga ahabw’enki nituhurira kubi twaba nitwebemberwa abategyeki b’omwaga.
5 N’ahabw’ekyo, abantu okwenda obugabe tikiraabaireho bubaho, ahakuba Ruhanga ni Ruhanga w’obugabe. Baibuli negira eti: “Ahu [o]mwoyo wa Mukama ari, niho obusingye [nari obugabe] buri.” (2 Abakorinso 3:17) N’ahabw’ekyo, Ruhanga akatuha obugabe obw’okwecweramu nk’ekicweka ky’obuhangwa bwaitu. Ahabw’okugira ngu akaba naamanya oku ebiteekateeko byaitu byabaire nibiija kukora, akamanya ngu nitwija kushemererwa twagira obugabe obw’okwecweramu.
6. Ruhanga akahanga ata obwonko bwaitu kukorera hamwe n’obugabe bw’okwecweramu?
6 Okubaasa kukoresa gye obugabe bw’okwecweramu, Ruhanga akatuha obushoboorozi bw’okuteekateeka, okugyeragyeranisa, okucwamu, n’okutaanisa ekirungi n’ekibi. (Abaheburaayo 5:14) N’ahabw’ekyo, obugabe obw’okwecweramu bukaba buri obw’okukoresibwa n’obwengye. Tituri nka zaaroboti ezitaine bwengye obw’okwecweramu ahabwazo. Kandi, titurahangirwe nk’enyamaishwa ezirikukorera aha bwengye obwazihangiirwemu. Baitu obwonko bwaitu obw’omutaano bukahangwa kukorera hamwe n’obugabe bwaitu obw’okwecweramu.
Entandikiro Nungi
7, 8. Ni ntandikiro ki enungi ei Ruhanga yaahaire abazaire baitu b’okubanza?
7 Ruhanga okworeka oku yaabaire naabafaho, akaha Adamu na Haawa, abazaire baitu b’okubanza buri kintu kyona eki omuntu yaakwetengire okwongyera aha kiconco ky’obugabe obw’okwecweramu. Bakateebwa omu paradiso. Bakaba baine ebintu omu bwingi. Bakaba baine ebiteekateeko n’emibiri ebihikiriire, n’ahabw’ekyo bakaba batarikubaasa kukaikura, kurwara nari kufa—bakaba nibaija kugumaho obwire bwona. Bakaba nibaija kuzaara abaana abahikiriire kandi nabo abaakugumireho bashemereirwe ebiro byona. Abantu ku baakubaire baingi, bakaagizire emirimo erikushemeza kandi ekyakurugiremu ensi yoona ehinduka paradiso.—Okutandika 1:26-30; 2:15.
8 Kurugiirira aha byabaire bibahairwe, Baibuli neeshoborora eti: ‘Ruhanga yaareeba byona ebi ahangire; kandi reeba, bikaba biri birungi munonga.’ (Okutandika 1:31) Kandi Baibuli neegamba eti ahari Ruhanga: ‘Omurimo gwe guhikire.’ (Eky’Ebiragiro 32:4) Buzima, Omuhangi akaha abantu entandikiro nungi. Niyo yaabaire neekirayo oburungi. Ruhanga ka yaayorekire ngu naafayo!
Obugabe Obwine Obugarukiro
9, 10. Ahabw’enki obugabe bw’okwecweramu bushemereire kukoresibwa gye?
9 Kwonka shi, Ruhanga akagyenderera ngu obugabe obw’okwecweramu butagira obugarukiro? Teekateeka aha rurembo orurimu ebiiruka bingi kwonka orutaine biragiro by’ebiiruka, ei buri omwe arikuvuga nk’oku arikwenda. Okaayenzire ovugire omu mwanya nk’ogwo? Ngaaha, ako kaakabaire akatabanguko kandi karugamu butandu nyingi.
10 N’ahabw’ekyo, nikyo kimwe n’ekiconco kya Ruhanga eky’obugabe obw’okwecweramu. Buri omwe kukora nk’oku arikwenda kikaaretsireho akatabanguko omu bantu. Hashemereire kubaho ebiragiro kwebembera abantu omu mirimo yaabo. Ekigambo kya Ruhanga nikigira kiti: “Mutwaze nk’abantu abaine obugabe, kwonka obugabe bwanyu mutaribukoresa nk’eky’okwekwatsa kukora ebibi.” (1 Petero 2:16, JB) Ruhanga naayenda ngu obugabe bw’okwecweramu bukoresibwe ahabw’oburungi bwa boona. Akaba naayenda ngu tugire obugabe butari bw’ekirenga, kureka oburinganiire, oburi ahansi y’ebiragiro.
Ebiragiro by’Oha?
11. N’ebiragiro by’oha ebi twahangirwe kworobera?
11 N’ebiragiro by’oha ebi twahangirwe kworobera? Akacweka akandi omuri 1 Petero 2:16 (JB) nikagira kati: “Timuri bahuuku b’ondiijo kureka aba Ruhanga.” Eki tikirikumanyisa ngu turi abahuuku abataine bugabe, kureka, nikimanyisa ngu tukaba tuhangirwe kushemererwa twayorobera ebiragiro bya Ruhanga. (Matayo 22:35-40) Ebiragiro bye, okukira ebindi byona ebitairweho abantu, nibiha obuhabuzi oburikukirayo oburungi. “Niinye MUKAMA Ruhanga waawe, orikukwegyesa eby’okukugasira, nkakwebembera omu muhanda ogu oshemereire kutoora.”—Isaaya 48:17.
12. Ni bugabe ki obw’okwecweramu obu twine omu biragiro bya Ruhanga?
12 Kandi, ebiragiro bya Ruhanga nibiha obugabe bwingi obwine obugarukiro. Eki nikirugamu bingi kandi kireetera abantu boona kushemererwa. Teekateeka aha by’okurya by’emiringo mingi, ebijwaro, ebyeshongoro, ebishushani ebihuugirwe, hamwe n’amaju agari omu nsi yoona. Buzima nitukunda kwecweramu aha bintu ebi, okukira omuntu ondiijo kutucweramu.
13. Ni biragiro ki eby’obuhangwa ebi tushemereire kworobera ahabw’oburungi bwaitu?
13 N’ahabw’ekyo tukahangwa turi ab’okushemererwa twayorobera ebiragiro bya Ruhanga ebirikukwata aha micwe y’abantu. Nikyo kimwe n’okworobera ebiragiro bya Ruhanga eby’obuhangwa. Nk’eky’okureeberaho, ku turikwanga kworobera ekiragiro eky’amaani agarikukurura ebintu nigabigarura ahansi, tukaguruka ahantu aharaingwa, nitwija kuhutaara nari tufe. Twayanga kworobera ebiragiro by’omu mubiri gwaitu, tukareka kurya, kunywa, nari kwitsya, nitwija kufa.
14. Nitumanya tuta ngu abantu tibarahangirwe kwetegyeka?
14 Nk’oku twahangirwe twine kworobera ebiragiro bya Ruhanga eby’obuhangwa, nikwo twahangirwe turi ab’okworobera ebiragiro bye ebirikukwata aha micwe n’emituurire. (Matayo 4:4) Abantu tibarahangirwe kwetegyeka haza bakasingura bataine Muhangi waabo. Nabi Yeremia naagira ati: “Omuntu weena ogyenda tabaasa kwehabura mu rugyendo rwe ahu yaahika hoona. Ai MUKAMA, ompane.” (Yeremia 10:23, 24) N’ahabw’ekyo omu muringo gwona abantu bakahangwa bari ab’okuba ahansi y’obutegyeki bwa Ruhanga, baitu butari obwabo.
15. Ebiragiro bya Ruhanga bikaabaire byabaire nibirutsya Adamu na Haawa?
15 Okworobera ebiragiro bya Ruhanga tikukaabaire kwabaire nikurutsya abazaire baitu ab’okubanza. Kureka, bakaabaire baayorobeire ebiragiro bye ahabw’oburungi bwabo n’obw’abantu boona. Kuri noogira ngu abantu babiri ab’okubanza tibaragomeire biragiro bya Ruhanga, ebintu byona bikaabaire biri birungi. Buzima, tukaabaire nitutuura omu paradiso erimu abantu abaine okushemererwa, rukundo n’obumwe! Tihakubaireho obubi, okubonabona, nari okufa.
[Ekishushani ekiri aha rupapura 11]
Omuhangi akaha abantu entandikiro nungi
[Ekishushani ekiri aha rupapura 12]
Okaayenzire kuvugira omu biiruka bingi ku haakubaire hatariho biragiro by’ebiiruka?