Abajurizi ba Yehova Nibabuurira Enju aha nju Kugira ngu Bajunwe?

Ngaaha. Nitubuurira enju aha nju obutoosha, kwonka titurikwikiriza ngu twine kujunwa ahabw’okukora omurimo ogwo. (Abaefeso 2:8) Ahabw’enki?

Teekateeka aha kugyeragyeranisa oku: Ka tugire ngu omushaija omunyambabazi yaaraganisa kuha ekiconco ky’esente nyingi omuntu weena oraije aha mwanya nanka aha eizooba nanka. Waaba noikiririza omu mushaija ogwo nookora eki yaagamba. Tikwo? Kandi noobaasa n’okugambiraho banywani baawe n’ab’eka yaawe kugira ngu batakafeerwa omugisha ogwo. Kwonka ahabw’okugira ngu waakora ebi omushaija ogwo yaagamba, tikirikumanyisa ngu nooba oine kuheebwa ekiconco. Omushaija ogwo niwe arikuba aine kucwamu kukuha ekiconco.

Nikyo kimwe, Abajurizi ba Yehova nibaikiriza ngu Ruhanga naija kuha amagara agatahwaho boona abarikumworobera. (Abarooma 6:23) Nituteeraho kugambira abandi ebi turikwiriza, twine amatsiko ngu nabo nibaija kugasirwa omu bi Ruhanga arikuraganisa. Kwonka titurikwikiriza ngu twine kujunwa ahabw’okwejumba omu buheereza obu. (Abarooma 1:17; 3:28) Buzima, tihariho omuntu orikubaasa kugira ngu omugisha nk’ogwo ogurikuruga ahari Ruhanga gumushemereire. Ruhanga ‘akatujuna, ti habw’eby’okuhikiirira ebi twakozire, kureka ahabw’okusaasira kwe.’—Tito 3:5.