Ekikorwa Kimwe eky’Embabazi
Omu rurembo Gujarat, omuri India, Ishe John akaba ari omwe aha Abajurizi ba Yehova owaabaitiziibwe omu myaka ya 1950. Kwonka John, n’abaana abandi bataano abu yaazairwe naabo na nyinabo bakaba bari Abakaturiki enkomba. N’ahabw’ekyo bakaba nibahakanisa enyikiriza ya Ishe John.
Eizooba rimwe, John akatumwa Ishe kutwarira ow’eishemwe ebaruha. Kwonka akasheeshe ako, John akeeshara akakumu arikuteeraho kwigura omukyebe muhango. Kwonka akoorobera Ishe, yaashemba akakumu kubaasa kutwara ebaruha ei baamuha.
Ku yaahikireyo ebaruha akagikwatsa omukazi w’ow’eishe-emwe ogwo. Nawe akaba ari Omujurizi wa Yehova. Akareeba John aine obuhuta yaashaba kumuhwera. Akareeta akabokisi ke akarimu eby’okukoresa, yaaboneza ekironda kandi yaakishemba gye. Reero akakorera John ekikopo kya chai. Akaguma naamugaaniirira omu muringo murungi ebirikukwata aha Baibuli.
John akahindura emiteekateekyere ye aha Bajurizi ba Yehova ahabw’embabazi z’omukazi ogwo. N’ahabw’ekyo John akamubuuza ebibuuzo bibiri ebirikukwata aha nyikiriza z’Abajurizi ba Yehova ezirikutaana n’ez’Abakaturiki. Akamubuuza yaaba Yesu ni Ruhanga kandi yaaba Abakristaayo bashemereire kushaba Mariamu. Munyaanyazi-itwe akaba yaayegire orurimi rwa Gujarati n’ahabw’ekyo akagarumu John omu rurimi rwe. Akamugarukamu arikukoresa Baibuli kandi yaamuha akatabo “This Good News of the Kingdom.”
Bwanyima, John ku yaashomire akatabo, yaamanya ngu ebi arikushoma n’amazima. Akaza ow’omwebembezi w’ediini yaabo yaamubuuza ebibuuzo bibiri ebi yaabuurize munyaanyazi-itwe. Akagira ekiniga kingi yaamutambikira Baibuli arikumugira ati: “Obaire Sitaani! Nyoreka omu Baibuli aharikugira ngu Yesu ti Ruhanga. Nyoreka aharikugira ngu titushemereire kuramya Mariamu. Nyoreka!” Oku omwebembezi w’ediini ogwo yaatwarize kukatangaaza John. Akagarukamu omwebembezi w’ediini ogwo ngu taragarukye omu Kelezia. Kandi taragarukireyo.
Abajurizi ba Yehova bakatandika kwegyesa John Baibuli, yaikiriza amazima, kandi yaaheereza Yehova. Abandi ab’omu ka ye bakamwegaitaho. Bwanyima y’emyaka 60, John ku arikureeba enkojo ei aine aha kakumu naijuka embabazi ezi baamworekire ezaamureeteire kucwamu kuheereza Yehova ebiro byona.—2 Abakorinso 6:4, 6.