Oine Okwikiriza?

Twine kugira okwikiriza kubaasa kushemeza Yehova. Kwonka, Baibuli neegira ngu “abaine okwikiriza ti boona.” (2 Tes. 3:2) Entumwa Paulo akagira ngu abaabaire nibamuhiiganisa bakaba bari abantu “babi abahabire.” Kwonka eki yaagambire aha kwikiriza nikikwata aha mbeera ezindi. Abamwe nibacwamu kwehuzya obuhame oburikworeka ngu hariho Omuhangi w’ebintu byona. (Rom. 1:20) Abandi nibabaasa kugira ngu baine okwikiriza ahabw’okugira ngu hariho oine amaani agarikukirayo. Kwonka okwikiriza okwo, tikwo kurikushemeza Yehova.

Twine kuba nituhamiza kimwe ngu Yehova ariho, kandi ngu ‘naaha ebihembo’ abaine okwikiriza kuhami. (Heb. 11:6) Okwikiriza ni gumwe aha mitwarize ei turikugira ahabw’omwoyo gurikwera. Okushaba Yehova nikibaasa kuhwera omuntu kugutunga. (Luk. 11:​9, 10, 13) Omuringo mukuru gw’okutunga omwoyo ogurikwera n’okushoma Ekigambo kya Ruhanga. Reero tukateekateeka aha bi twashoma, kandi tukateeraho kubigyenderaho. Waakora otyo, omwoyo gwa Yehova nigukuhwera kugira okwikiriza okurikumushemeza.