Abari omu Bushwere Bashemereire Kubugumamu

Obushwere burungi nibuhaisa Yehova ekitiinisa kandi nibureetera omushaija n’omukazi okushemererwa. (Mak 10:9) Abakristaayo kubaasa kugira obushwere oburikuhangaara, oburimu okushemererwa, baine kuhamira aha misingye ya Baibuli baaba nibatoorana ow’okubutaahamu nawe.

Waaba nooyenda kurima banza orenzye emyaka y’omushogoyo, obu ekyetengo ky’okuteerana kirikuba kiri eky’amaani kirikubaasa kukureetera kucwamu kubi. (1Kor 7:36) Koresa gye obwire bwawe otakataahire omu bushwere kuhamya omukago gwawe na Ruhanga n’okugira emitwarize y’Ekikristaayo. Ekyo nikiija kukubaasisa kugira obushwere burungi.

Otakacwiremu kutaaha omu bushwere n’omuntu, twara obwire burikumara kumanya gye ekiri aha mutima gwe. (1Pet 3:4) Waagira ebi waabanganisaho, bigaaniireho nawe. Okushushana n’emikago endiijo, n’omu bushwere oine kuta omutima aha bi orikubaasa kukorera omukundwa waawe bitari ebi orikwenda ngu akukorere. (Fil 2:3, 4) Waagyendera aha misingye ya Baibuli otakataahire omu bushwere, nikiza kukworobera kugumizamu noogigyenderaho na waaba waabutaahiremu kubaasa kugira obushwere oburimu okushemererwa.

MUREEBE VIDIYO OKWETEBEEKANISIZA OBUSHWERE—EKICWEKA 3: ‘BARIIRIRA’ EBIRIKUTWARIRWAMU, REERO MUGARUKYEMU EBIBUUZO EBI:

• Omukago gwa munyaanyazi-itwe na Shane gukagumizamu nigukura guta?

• Munyaanyazi-itwe ku yaayongyeire kumumanya gye akeetegyereza ki?

• Abazaire be bakamuhwera bata, kandi akacwamu gye ata?