‘Mweiheho Baaruhanga b’Abanyamahanga’

Yakobo akaba naamanya ngu Yehova niwe ashemereire kuramibwa wenka, n’obu haabaire hatakabaireho kiragiro ekyabaire nikizibira okuramya ebishushani. (Bir 20:3-5) N’ahabw’ekyo, Yehova ku yaamugambiire kugaruka Beseeli, Yakobo akagambira boona abaabaire bari nawe kweihaho ebishushani. Yakobo akaihaho ebishushani, otwariiremu n’empeta ezi baabaire bajwaire aha matu gaabo. (Kut 35:1-4) Hatariho kubangaanisa Yehova akashemererwa ahabw’eki Yakobo yaakozire.

Omu bunaku bwaitu, nitubaasa kworeka tuta ngu nituramya Yehova wenka? Twine kubanza twayeyihaho ebintu byona ebikwatiraine n’okuramya ebishushani nari eby’obufumu. Eki nikitwariramu okweihaho ebintu byona ebiine akakwate n’okuragura kandi tukashwijuma n’obwegyendesereza eby’okweshemeza byaitu. Nk’eky’okureeberaho, yebuuze oti: ‘Ninkunda ebitabo nari vidiyo ezirimu eby’obufumu, eby’emizimu nari ezirimu abarikukoresa amaani agatarikwetegyerezibwa? Nindeeba eby’okweshemeza ebirimu emiguruko n’emikyeeno nk’ebitaine kabi?’ Twine kwetantarira kimwe ebintu byona ebi Yehova arikwanga.​—Zab 97:10.

MUREEBE VIDIYO “MURWANISE SITAANE,” BWANYIMA MUGARUKYEMU EBIBUUZO EBI:

• 

  Omwegi wa Baibuli orikwetwa Palesa akatunga buremeezi ki?

• 

  Ahabw’enki kiri eky’obwengye kushaba abareeberezi obuhabuzi omu nshonga ezikwatiraine n’eby’obufumu?

• 

  Twaba nitwenda oburinzi bwa Yehova ni bintu ki ebi twine kweihaho?

• Palesa akacwamu kukora ki?

• Ahu orikutuura, noobaasa kwetantara ota ebintu ebiine akakwate na baadaimoni?