EBI ABAKRISTAAYO TWINE KUKORA

Ekicweka Kisya omu Ruteerane orw’Ahagati ya Saabiiti

Okutandika na Jenwari 2018, oruteerane orw’ahagati ya saabiiti nirwija kuba rurimu ekicweka ebigambo by’okwegaho n’eby’okureeba kuruga omu New World Translation of the Holy Scriptures (nwtsty-E), ey’aha mukura n’obu muraabe mutakagitungire omu rurimi rwanyu. Hatariho kubanganisa, ekicweka eki nikiija kukuhwera omu kutebeekanisa enteerane. Ekikuru munonga, twine amatsiko ngu nikiija kukuhwera kwirira haihi Tataitwe oine rukundo, Yehova!

EBIGAMBO BY’OKWEGAHO

Ekicweka eki nikiija kutuhwera kwetegyereza eby’enganda, emyanya, n’endimi ebiri omu nyiriri nyingi z’omu Baibuli.

Matayo 12:20

Orumuri orurikwaka kubi: Ekaba eri etaara nkye ekozirwe omu ibumba erikukoresa amajuta kandi abantu bakaba bagikoresa omu ka. Orutambi rwayo rukaba runyuunyuuta amajuta rwatsya orurimi rw’omuriro. Ekigambo eky’Orugriika ekirikumanyisa “orumuri orurikwaka kubi” nikibaasa kumanyisa orutambi orurikureeta omwika bwanyima y’omuriro kuraara. Obunabi oburi omu Isaaya 42:3 bukagamba aha mbabazi za Yesu; tariraaza orumuri rw’omuriro oruri haihi kuraara kandi taritwariza kubi abantu abacureezi.

Matayo 26:13

Buzimazima: Ekigambo ky’Orugriika, a·menʹ, nikiruga omu kigambo ky’Oruheburaayo ʼa·menʹ, ekirikumanyisa “kibe nikwo kyaba,” nari “eego buzima.” Yesu butoosha akaba akoresa ekigambo eki omu bigambo ebimwe arikuraganisa nari arikuranga obunabi, obwo arikuhamya ku biri eby’amazima kandi ebirikwesigwa. Yesu okukoresa “buzimazima,” nari amiina, omu muringo ogu n’eky’omutaano omu bihandiiko ebirikwera. Kyagambwa emirundi ekurataine (a·menʹ a·menʹ), nk’oku kiri omu Ngiri ya Yohaana, ekigambo eki Yesu yaagambire nikivunuurwa nka “buzimazima.”—Yoh 1:51.

EBY’OKUREEBA

Ebishushani, vidiyo ezitarimu maraka na katuuni nibyoreka gye ebintu bitari bimwe ebiri omu Baibuli.

Besifaage, Orushozi rwa Zeituuni, na Yerusaalemu

Vidiyo egi ngufu neeyoreka omuhanda kuruga burugwa izooba kuza Yerusaalemu, kuruga omu kyaro ekirikumanywa hati nka et-Tur—ekirikugambwaho omu Baibuli nka Besifaage—kuza ahari gumwe aha myanya etunguukire ey’Orushozi rwa Zeituuni. Besania neeshangwa omu burugwa izooba bwa Besifaage, orubaju rw’oburugwa izooba bw’Orushozi rwa Zeituuni. Obu Yesu n’abeegi be baabaire bari omuri Yerusaalemu, bakaba bakira kuraara omuri Besania, obunaku obu erikumanywa nk’etauni ya el-ʽAzariyeh (El ʽEizariya), eiziina ry’Oruharabu eririkumanyisa “Omwanya gwa Laazaaro.” Hatariho kubanganisa Yesu akatuura omu ka ya Mariza, Mariamu, na Laazaaro. (Mat 21:17; Mak 11:11; Luk 21:37; Yoh 11:1) Yesu obu yaabaire naaruga omuka yaabo arikuza Yerusaalemu, naabaasa kuba yaarabire omu muhanda ogurikushushana n’ogwayorekwa omu vidiyo. Aha Nisani 9, 33 Y.A.K., obu Yesu yaaraba aha Rushozi rwa Zeituuni akataaha omuri Yerusaalemu atembire aha ndogoya, naabaasa kuba yaabaire naaruga Besifaage, kurabira omu muhanda ogurikuza Yerusaalemu.

Oruguuto kuruga Besania kuza Besifaage
Besifaage
Orushozi rwa Zeituuni
Omugyera Kederoni
Omwanya ogu Hekalu Erimu

Omusimaari omu Eigufa ry’Akagombamburi

Eki n’ekishushani ky’eigufa ry’akagombamburi k’omuntu ericumisirwemu omusimaari muraingwa gurikwingana inci 4.5. Ekishushani kyenyine kikajumburwa omu 1968, omu bwire obu baabaire nibatimba omu itaka omu matemba ga Yerusaalemu, n’omu bunaku bwa Rooma. Nikiha n’obuhame kuruga omu bizoirwe omu itaaka ngu emisimaari ekaba ekoresibwa kuhanika abantu aha muti. Omusimaari ogu nigubaasa kuba nigushushana n’emisimaari eyaakoresiibwe abaserukare b’Abarooma kuhanika Yesu Kristo aha muti. Ekishushani kikashangwa omu kabokisi k’eibaare, akarikumanywa nka ossuary, ahu amagufa g’omire gaabaire gabikwa bwanyima y’omubiri kujunda. Eki nikyoreka ngu omuntu owaabaire ahanikwa aha muti akaba naabaasa kuziikwa.—Mat 27:35.