Oku Turikubaasa Kuhika aha Mitima y’Abu Turikwegyesa Baibuli
1. Abeegi ba Yesu bakakwatwaho bata ebi yaayegyeise?
1 Yesu Kristo akahika aha mitima y’abaabaire bamuhurikiize. Eizooba rimwe, emitima y’abeegi be ‘ekashashaanuka’ bwanyima y’okubashoboororera gye Ebyahandiikirwe. (Luk. 24:32) Obu okworobera Ruhanga kwine kuruga aha mutima, nitubaasa kuhiga tuta abu turikwegyesa kukora empindahinduka?—Rom. 6:17.
2. Okukoresa obwengye n’okwetegyereza nibituhwera bita kuhika aha mutima gw’omuntu?
2 Koresa Obwengye Hamwe n’Okwetegyereza: Abantu abaingi, okubagambira ekihikire n’ekitahikire kwonka, tikirikubahiga kugira eki bakora. Okuhakanisa enyegyesa zaabo orikukoresa ebyahandiikirwe bingi nikibaasa kureeta bataahurikiza. Kubaasa kuhiga omuntu, twine kubanza twamanya ahabw’enki naikiriza atyo kandi naatwaza omu muringo ogwo. Okukoresa ebibuuzo ebitebeekaniise gye nikiija kumuhiga kugamba ebi muri aha mutima. (Enf. 20:5) Obwo nibwo turikubaasa kumanya ebi turaakorese ebiraamuhikye aha mutima ebiri omu Kigambo kya Ruhanga. N’ahabw’ekyo, twine kworeka ngu nitufayo aha muntu kandi tukagira okugumisiriza. (Enf. 25:15) Kwonka ijuka ngu abantu tibarikutunguukira aha rurengo rumwe omu by’omwoyo. Bahe obwire kugira ngu omwoyo gwa Yehova gubaase kubahwera kuhindura omu biteekateeko n’omu bi barikukora.—Mak. 4:26-29.
3. Nitubaasa kuhwera tuta abeegi ba Baibuli kugira emitwarize ehikire?
3 Bahwere Kugira Emitwarize Ehikire: Ebiri omu Baibuli ebirikugamba aha rukundo ya Yehova n’oburungi bwe nibibaasa kuhwera abu turikwegyesa kugira emitwarize ehikire. Nitubaasa kukoresa ebyahandiikirwe nka, Zaaburi 139:1-4 nari Luka 12:6, 7 kubooreka ngu buzima Ruhanga naatutaho omutima. Abantu baayoreka ngu nibasiima embabazi za Yehova, rukundo ei bainiire Yehova n’okumutiina nibyeyongyera. (Rom. 5:6-8; 1 Yoh. 4:19) Kandi, ku barikumanya ngu Yehova naafayo aha bi barikukora, nikibaasa kubahiga kukora ebirikumushemeza kandi ebirikumuhaisa ekitiinisa.—Zab. 78:40, 41; Enf. 23:15.
4. Twaba nitwegyesa abantu turi omu kubuurira, nitubaasa kworeka tuta ngu nituha abantu obugabe bw’okucwamu?
4 Tihariho ou Yehova arikugyema kworobera ebiragiro bye. Kureka, naahiga abantu kumanya ngu n’eky’obwengye kugyendera aha buhabuzi bwe. (Isa. 48:17, 18) Nitutooreza Yehova twayegyesa omu muringo ogurikuhwera abantu kucwamu gye. Abantu ku barikumanya ngu ni kikuru kukora empindahinduka, niharugamu ebirungi. (Rom. 12:2) Kandi nikibiiriza haihi na Yehova orikucaaka emitima.—Enf. 17:3.