Okwongyera Kubuurira Gye—Okutendeka Abasya

Ahabw’Enki Ni Kikuru: Abeegi ba Yesu abasya baine kwega kworobera “byona” ebi yaaragiire, ebirikutwariramu okwegyesa abandi amazima. (Mat. 28:19, 20) Abeegi abaingi abasya baikiriziibwe kuza omu Eishomero ry’Obuheereza kandi nibabuurira ab’omu ka yaabo n’abanywani baabo kitaraariire. Kwonka, ku barikweyongyera kusiima ebi barikwega kandi bakamanya ngu Yehova naayenda ngu abantu boona bamanye amakuru marungi, nibabaasa kugira ekyetengo ky’okwenda kwejumba omu kubuurira. (Rom. 10:13, 14) Abasya abo baikirizibwa kuba ababuurizi abatabatiziibwe kandi baakatendekwa gye nikiija kubahwera kubuurira n’obumanzi kandi beeyongyere kutunguuka omu by’omwoyo.—Luk. 6:40.

Oku Turikubaasa Kukikora:

Hwera omubuurizi omusya kutunga ebitabo by’okukoresa omu kubuurira n’okwegyesa abandi. Mworekye ebitabo ebi orikuta omu nshaho yaawe y’okubuurira, reero omushoboororere omugasho gwa buri kitabo eki orikutwara.
Mutebeekanise hamwe emwe aha nyanjura eziri omu Obuheereza Bwaitu obw’Obukama. Muhigye kukoresa ebigambo ebye yaaba naahayo enyanjura egyo. Mwegyeze omu biri omu kitabo Ministry School, orupapura 82, ebirikuhikaana n’embeera z’omu kicweka kyanyu. Mushoboororere obukuru bw’okujwara gye hamwe n’okureebeka gye.—2 Kor. 6:3, 4.
Gumizamu n’omutendeka. Yoreka omubuurizi omusya kaada y’ekicweka ky’okubuuriramu, reero omworekye oku arikubaasa kukoresa akapapura k’okuhandiikaho ebirikukwata aha u waabuurira. Mworekye oku orikuhandiika ebirikukwata aha muntu orikwenda kumanya ebirikukiraho n’oku arikubaasa kukoresa jw.org n’akatabo Good News for People of All Nations omu kubuurira. Muhwere kumanya oku arikubaasa kwongyera kuhwera abarikwenda kumanya ebirikukiraho.—1 Kor. 3:6.
Gira okugumisiriza waaba n’omuhwera kandi omusiime. (Enf. 25:11) Ba eky’okureeberaho kirungi. Yoreka ngu ori omweziriki kandi ngu noofayo ahabw’okuba nibiija kumuhwera munonga n’omu biro by’omumaisho.

Teeraho Kukora Eki Okwezi Oku:

Gyenda n’omubuurizi omusya ou orikwegyesa Baibuli waaba noobuurira enju aha nju kandi omutware aha barikwenda kumanya ebirikukiraho n’abu orikwegyesa Baibuli. Waaba otaine ou orikwegyesa Baibuli ori omubuurizi musya, buurira n’ababuurizi abasya abandi.