OMUTWE GW’OKWEZI OKU: “OBUURIRE EKIGAMBO KYA RUHANGA, OGAMBE N’OBWEZIRIKI.”—2 TIM. 4:2.
Koresa Buri Mugisha Kujanjaaza Amakuru g’Obukama!
1. Niki eki turikwegyera ahari Daudi?
1 Omugabe Daudi taraikiriize mbeera ei yaabaire arimu kumumaramu amaani. Nk’eky’okureeberaho, Daudi akaba naayenda kwombekyera Yehova enju. Kwonka ku yaazibiirwe kugyombeka, yaatebeekanisiza Sulemaani eby’okwombekyesa hekalu. (1 Bag. 8:17-19; 1 Bus. 29:3-9) Omu mwanya gw’okuguma naateekateeka aha bi yaabaire atarikubaasa, Daudi akata omutima aha bi yaabaire naabaasa kukora. Nitubaasa kutooreza Daudi tuta twaba nitusherura oku turikubaasa kujanjaaza amakuru g’Obukama?
2. Nitubaasa kukora ki kwongyera aha buheereza bwaitu?
2 Kora Eki Orikubaasa: Baingi baakozire empindahinduka kugira ngu babe baapayoniya abahwezi nari ab’obutwire. (Mat. 6:22) Noobaasa kukora empindahinduka nkabo? Waashwijuma embeera yaawe kandi okashaba Yehova kukuhwera, noobaasa kureeba ngu oyiguriirweho “orwigi ruhango kuza” omu buheereza. Kyaba nikwo kiri, koresa omugisha ogwo!—1 Kor. 16:8, 9.
3. Ni migisha ki y’okubuurira ei turikubaasa kukoresa n’obu embeera zaitu zirikuba zitarikutubaasisa kuba baapayoniya?
3 Mbwenu shi embeera yaawe ku yaakuba neekuremesa kuba payoniya? Noobaasa kukoresa emigisha endiijo eriho. Nk’eky’okureeberaho, waaba nookora n’abatari mu mazima, noobaasa kukoresa omugisha ogwo kubabuurira. Nari waaba oine amagara mabi, noobaasa kubuurira abashaho abarikukujanjaba. Ijuka ngu hariho entebeekanisa y’abo abatarikubaasa kukora kihango omu kubuurira ahabwa bukuru nari amagara mabi kuhayo edakiika 15. Ahari ripoota y’okubuurira buri kwezi, reeba ngu waataho eshaaha ezi obuuriire kitaraariire, ebitabo ebi ogabire, otwariiremu turakiti, obupapura bw’okweta abantu aha kiijutsyo hamwe n’aha nteerane empango. Noija kutangaara kureeba oku eshaaha ziraakanye ahabw’okukoresa buri mugisha kubuurira!
4. Omaririire kukora ki?
4 Omu mbeera ei buri omwe araabe arimu, ka tuteereho kukoresa buri mugisha kujanjaaza amakuru marungi. Obwo nitwija kutunga okumarwa ahabw’okumanya ngu nitukora kyona eki turikubaasa ahabw’Obukama.—Mak. 14:8; Luk. 21:2-4.