Baanabi Mubatware nk’Eky’Okureeberaho—Nahumu
1. Nitwega ki omu kitabo kya Nahumu?
1 Amatongo g’orurembo Nineeve n’obuhame ngu nk’oku Nahumu yaarangire, Yehova naahoora enzigu aha bazigu be kandi n’obu baakuba bari ab’amaani tibarikubaasa kumusingura. (Nah. 1:2, 6) Twayetegyereza gye obunabi bwa Nahumu, nitubaasa kugira eki twabwegaho aha bikwatiraine n’okubuurira.
2. Nitubaasa kubuurira tuta abantu ebirikuhuumuriza?
2 Huumuriza Abantu Obahwere n’Okugira Amatsiko: Waareeba ebiri omu kitabo kya Nahumu, omu kubanza noobaasa kuteekateeka ngu nikigamba aha kucwekyerezibwa kwa Nineeve n’orurembo rukuru rwa Asiria byonka. (Nah. 1:1; 3:7) Kwonka, abaheereza ba Yehova bakaakiira oburangi obu kandi baabusiima. Nahumu ou eiziina rye ririkumanyisa “Omuhuumuriza,” akahamiza Abayudaaya bagyenzi be ngu abazigu baabo obwire butari bwa hare bakaba nibaija kucwekyerezibwa. Nahumu akagumizamu yaabahamiza ngu Yehova “n’ekigo kigumire aha izooba ry’enaku.” (Nah. 1:7) Naitwe twaba nitubuurira, nitugambira abantu amakuru marungi kandi tubahiga kusherura obuhungiro omuri Yehova.—Nah. 1:15.
3. Nitubaasa kutooreza tuta Nahumu omu kukoresa eby’okureeberaho?
3 Koresa eby’Okureeberaho: Yehova akahwera Nahumu kugyeragyeranisa okucwekyerezibwa kwa Nineeve n’okw’orurembo Tebesi orwa Misri orwacwekyereziibwe Abaasiria. (Nah. 3:8-10) Twaba nitugaaniira n’abantu aha mperu y’ensi egi embi, nitubaasa kubooreka obunabi bwa Baibuli oburikuhamya ngu Yehova naahikiiririza kimwe eki arikuba agambire. Nk’eky’okureeberaho, obu Ababulooni n’Abameedi baija kucwekyereza Nineeve omuri 632 Yesu atakazairwe, enjura y’amaani ekaijuza omugyera Tigris, amaizi gaahirimya ekicweka ky’ekisiika ekyabaire kigumire kurabamu. Eki kikareetera orurembo Nineeve kurahuka kutaahirirwa nk’oku Yehova yaabaire agambire.—Nah. 1:8; 2:6.
4. Nitubaasa kugamba tuta ebirikwetegyerezibwa gye abandi omu kubuurira?
4 Gamba Ebirikwetegyerezibwa Gye: Nahumu akahandiika ebirikushemeza kandi yaabishoboorora. Ebi yaahandiikire nibyetegyerezibwa gye. (Nah. 1:14; 3:1) Nikyo kimwe naitwe, twine kukoresa orurimi orworobi kwetegyereza. (1 Kor. 14:9) Waabuurira omuntu omurundi gw’okubanza, mugambire gye ahabw’enki waija owe. Waaba nooyegyesa abantu Baibuli, bahwere kwikiririza omuri Yehova hamwe n’Ekigambo kye, bareebe n’oku ebi barikwega birikubakwataho.—Rom. 10:14.
5. Ni buhame ki obu turikushanga omu bunabi bwa Nahumu?
5 Obwesigwa bwa Nahumu ngu ekigambo kya Yehova nikiija kuhikiirira nibworekwa gye omu kitabo kya Baibuli ekirikwetererwa eiziina rye. Obu emperu y’ensi egi eri haihi kuhika, nituhuumurizibwa ebigambo bya Ruhanga ebi: “Abazigu be taribahoora bwa kabiri.”—Nah. 1:9.