Teeraho Kuguma n’Okwata Obwire
1. Ni ky’okureeberaho ki eki Yehova arikututeeraho aha bikwatiraine n’okukwata obwire?
1 Yehova naakwata obwire. Nk’eky’okureeberaho, naaha abaheereza be obuhwezi omu bwire obuhikire. (Heb. 4:16) Kandi naabaha n’eby’okurya by’omwoyo “omu bunaku obuhikire.” (Mat. 24:45) Ekyo nikituhamiza ngu ekiro kya Yehova eky’okucweraho orubanja tikiraije ‘kukyerererwa.’ (Hab. 2:3) Ahabw’okugira ngu Yehova naakwata obwire nikitugasira. (Zab. 70:5) Obu turi abatahikiriire kandi twine bingi by’okukora, nikibaasa kutugumira kukwata obwire. Ahabw’enki tushemereire kuteeraho kukwata obwire?
2. Ahabw’enki okukwata obwire nikihimbisisa Yehova?
2 Omu biro ebi eby’emperu, okukwata obwire tikirikutwarwa nka kikuru ahabw’okuba abantu baingi n’abarikwekunda kandi abatarikweyangisa. (2 Tim. 3:1-3) Abakristaayo ku barikuhika aha mirimo yaabo omu bwire, bakakwata obwire bw’enteerane, batarikukyerererwa baaba baine abu baragaine nabo, abandi nibakireeba kandi kihimbisisa Yehova. (2 Pet. 2:12) Butoosha, nituhika aha mirimo yaitu omu bwire, kwonka tukyerererwa kuza omu nteerane z’ekibiina? Twakwata obwire bw’enteerane, otwariiremu n’ekyeshongoro ekirikutandika hamwe n’okushaba, nikyoreka ngu nitutooreza tataitwe ow’omu iguru orikukora ebintu omu buteeka.—1 Kor. 14:33, 40.
3. Ahabw’enki twakwata obwire kirikworeka ngu nitufayo aha bandi?
3 Twakwata obwire nikyoreeka ngu nitufayo aha bandi. (Fil. 2:3, 4) Nk’eky’okureeberaho ku turikukwata obwire bw’enteerane, otwariiremu enteerane z’okwetebeekanisiza okubuurira titurikwija kuteganisa ab’eishe-emwe bagyenzi baitu. Kwonka twaba twine omuze gw’okukyerererwa, nikireetera abandi kuteekateeka ngu nitutwara obwire bwaitu nka bukuru kukira obw’abo. Twakwata obwire nikyoreeka ngu turi abeesigwa kandi nitufayo aha bandi.
4. Twaba nitukira kukyerererwa, nitubaasa kukora mpindahinduka ki?
4 Waaba nookira kukyerererwa, teeraho kumanya ahabw’enki. Kora entebeekanisa eraakubaasise kukora buri kimwe omu bwire. (Mub. 3:1; Fil. 1:10) Shaba Yehova kukuhwera. (1 Yoh. 5:14) Okukwata obwire n’omuringo gumwe gw’okworekamu ngu nituhikiiriza ebiragiro bibiri bikuru—okunda Ruhanga hamwe n’omutaahi.—Mat. 22:37-39.