Oku Turikubaasa Kutebeekanisa Enyanjura Nungi
1. Ahabw’enki kiri kikuru kugira enyanjura nungi?
1 Nk’oku ebirungo ebirikuba bikoresiibwe omu kuteeka eby’okurya birikureetera omuntu kwenda kurya eby’okurya, nikwo n’enyanjura nungi erikutubaasisa kuhikaanisa ebiteekateeko n’omuntu aha Byahandiikirwe. Enyanjura nungi obumwe neeba eri ndaingwa nari ngufu, nk’oku eby’okurya binuzire birikuba bitebeekanisiibwe gye n’enyanjura nungi neeba eine kutebeekanisibwa gye. (Enf. 15:28) Niki ekirikureetera enyanjura yaaba nungi?
2. Nitubaasa kutebeekanisa tuta enyanjura nungi?
2 Toorana Ebiraashemeze Abantu: Enyanjura zaitu zishemereire kureetera abantu kwenda kumanya ebirikukiraho, ahakuba abu turikubuurira nibabaasa kwanga kugaaniira naitwe. N’ahabw’ekyo waaba nootebeekanisa, teekateeka aha birikubaasa kushemeza abari omu kicweka kyanyu. Abantu omu kicweka kyanyu nibenda obutegyeki burungi, amaka agarimu okushemerewa, nari okureeba entaro nizihwaho? Abantu nibakunda kugamba enteekateeka yaabo, n’ahabw’ekyo tebeekanisa ekibuuzo ekiraabareetere kugamba eki barikuteekateeka. Noobaasa kukoresa enyanjura emwe aha ziri omu Obuheereza Bwaitu obw’Obukama reero ogihikaanise n’ekicweka kyanyu? Obumwe nimubaasa kuraba omuri zimwe aha nyanjura ezo mwaba muri omu Kuramya okw’Eka.
3. Nitubaasa kuhikaanisa tuta enyanjura ezi turikukoresa n’emicwe hamwe n’emitwarize y’abantu b’omu kicweka kyaitu?
3 Faayo aha Micwe n’Emitwarize y’Abantu B’omu Kicweka: Omu bicweka ebimwe, abantu nibenda ngu tutandikye turikugamba ekyatureeta. Omu bicweka ebindi, nikiba kitari kirungi twaba tutabandize kubaramutsya kandi obumwe tukabagambira n’ebirikutukwataho. Omu bicweka ebimwe, abantu ahabw’okuba nibaha Baibuli ekitiinisa nitubaasa kugikoresa omu nyanjura zaitu. (Byak. 2:14-17) Kwonka ei abantu barikuba bari omu diini etarikwikiririza omuri Kristo, nari bataine diini, nikiba kiri kirungi kukoresa Baibuli waaba ogarukireyo beitu hatari ha murundi gw’okubanza.—Byak. 17:22-31.
4. Omu bigambo byaitu ebi turikutandikisa twine kuta omutima ahari ki?
4 Ebigambo Ebi Turikukoresa omu Kutandika: Tebeekanisa gye ebigambo ebi oraatandikise. Ebigambo bikye kandi ebyorobi kwetegyereza nibikora gye. Oku turikukoresa ebigambo byaitu ebi turikutandikisa ni kikuru. Gira omuhimbo omu kugamba. Gira akamwenyo aha matama kworeka ngu noofayo aha u orikubuurira. Twakuratira obuhabuzi obu nitwija kubaasa kutebeekanisa enyanjura nungi eziraahigye abantu b’omu kicweka kyaitu kuriira ‘aha meeza ya Mukama.’—1 Kor. 10:21.