Ebirikutuhwera omu Kubuurira
1. Ebirikuba biri ahansi y’omutwe “Okugaaniira n’Omutaahi” bitebeekanisiibwe ahabwa kigyendererwa ki?
1 Obumwe n’obumwe, Watchtower ey’okukoresa omu kubuurira neiziramu omutwe “Okugaaniira n’Omutaahi.” Ebiri ahansi y’omutwe ogu bitebeekanisiibwe ahabw’okwenda kworeka enyegyesa za Baibuli omu muringo ogurikushemeza abantu n’okutuhwera kuhikaanisa ebiteekateeko n’abantu omu muringo gw’obwengye ahari bimwe ebiri omu Baibuli. (1 Pet. 3:15) Nitubaasa kubikoresa tuta omu muringo murungi?
2. Nitubaasa kukoresa tuta emitwe egi omu kubuurira?
2 Bikorese omu Kubuurira: Noobaasa kubiikaho zimwe ahari Watchtower ezirimu emitwe egi. Ou orikubuurira, orikwenda kumanya ebirikukiraho nari ou orikwegyesa Baibuli yaabuuza ekibuuzo ninga yaahakanisa ekibaire kyagambirweho, muhe Watchtower ei kirimu reero otebeekanise kugarukayo muhikaanise ebiteekateeko. Waaba otaine Watchtower erimu omutwe ogu, noobaasa kugiiha aha Mukura jw.org.
3. Nitubaasa kuhikaanisa ebiteekateeko tuta n’abu turikubuurira aha biri ahansi y’emitwe egi?
3 Noobaasa kuhikaanisa ebiteekateeko ota n’omuntu aha biri ahansi y’omutwe ogu? Abamwe nibashaba omuntu kushoma ebigambo eby’omutaahi omu iraka eririkuhurirwa, kandi bo bashoma eby’omubuurizi. Okuhikaanisa ebiteekateeko n’abantu aha biri ahansi y’emitwe egi nikikora gye ahakuba nikihwera omuntu kwetegyereza ebi turikwikiriza aikaikaine.—Bir. 32:2.
4. Nitubaasa kukoresa tuta ebiri ahansi y’emitwe egi omu kwetendeka?
4 Yetendekye Kandi Otendekye n’Abandi: Waaba nooshoma ebiri ahansi y’emitwe egi, teeraho kwetegyereza ebyahandiikirwe, eby’okureeberaho n’oku enshonga erikushoboororwa. Yetegyereze oku ebi murikugaaniiraho birikukwata aha mbeera y’omuntu, reero oteereho kukoresa omuringo ogu, omu kubuurira. (Enf. 1:5; 9:9) Munyaanyazi-itwe akagira ngu, “Okushoma ebiri ahansi y’emitwe egi n’oba ori nk’orikwegyera ahari payoniya murungi orikuba naamanya eki ashemereire kugamba!”
5. Nitubaasa kuhwera tuta abeegi baitu ba Baibuli kwega kubuurira?
5 Noobaasa n’okubikoresa kuhwera abeegi ba Baibuli kwega kubuurira. Ebiri ahansi y’omutwe ogu mubishome hamwe kandi omwegi wa Baibuli abe niwe yaakora nk’omubuurizi. Omu muringo ogu, abeegi ba Baibuli nibaba nibeegyezamu kumanya oku barikubaasa kushoboorora ebi barikwikiriza omu muringo gw’obwengye. (Kol. 4:6) Buzima ebiri ahansi y’emitwe egi ni bimwe aha miringo ei Yehova arikukoresa kutuhwera ‘kuhikiza kimwe’ obuheereza bwaitu.—2 Tim. 4:5.