Entebeekanisa Eraatubaasise Kwongyera Kuhimbisa Yehova
1. Ni ntebeekanisa ki ensya erikwija kutuhwera kuhimbisa Yehova?
1 Maaci ehweire, ababuurizi bakaheebwa omugisha gw’okuba baapayoniya abahwezi barikubuurira eshaaha 30 buri Maaci na Apuri hamwe n’okwezi oku omureeberezi orikutaayaayira ebibiina arikuba ataayaayiire ekibiina kyanyu. Okutaayaaya kw’omureeberezi orikutaayaayira ebibiina kwaba nikutandikira omu kwezi kumwe kukahenderera omu kundi, ameezi abiri ago ababuurizi nibabaasa kucwamu okwezi oku barikwenda kuba baapayoniya abahwezi barikubuurira eshaaha 30. Baapayoniya abahwezi boona, nibaija kuba omu ruteerane oru araagire na baapayoniya ab’obutwire hamwe na baapayoniya ab’omutaano barugumemu kuhitsya aha muheru. Eki nikimanyisa ngu waaba otarikubaasa kuhitsya eshaaha 50 naiwe noobaasa ‘kuhimbisa Yehova’ waaba payoniya omuhwezi okabuurira eshaaha 30 emirundi ena omu mwaka.—Zab. 109:30; 119:171.
2. Abo abaraabe bari baapayoniya abahwezi obu omureeberezi orikutaayaayira ebibiina araabe ataayaayiire nibaija kutunga migisha ki?
2 Obu Omureeberezi Orikutaayaayira Ebibiina Araabe Ataayaayiire: Baingi nibaija kubaasa kuba baapayoniya abahwezi omureeberezi orikutaayaayira ebibiina yaaba ataayaayiire ekibiina kyanyu reero mugumyane ahabw’okubuurira nawe. (Rom. 1:11, 12) Baingi abaraabe baapayoniya abahwezi nibaija kukora entebeekanisa y’okubuurira nawe omu wiiki. Baapayoniya abahwezi abarikukora, nibabaasa kushaba kukora nawe aha Rwamukaaga nari Sande. Ka nikiija kugaruramu amaani abaraabe bari baapayoniya abahwezi okuba omu ruteerane na baapayoniya ab’obutwire hamwe na baapayoniya ab’omutaano!
3. Ahabw’enki obwire bw’Ekiijutsyo buri burungi kuba payoniya omuhwezi?
3 Omuri Maaci na Apuri: Abo abaabaire baapayoniya abahwezi okwezi kumwe omu ntebeekanisa ehweire ey’okuhayo eshaaha 30 omu bwire bw’ekiijutsyo, hati nibabaasa kwongyera aha bitambo byabo by’okusiima. (Heb. 13:15) Maaci na Apuri n’ameezi marungi kwongyera aha buheereza bwaitu twaba baapayoniya abahwezi. Omu meezi ago buri mwaka, nitwejumba omu kampeyini y’okweta abantu kwija aha Kiijutsyo. Ahabw’okugira ngu baingi nibongyera aha buheereza bwabo omu bwire bw’Ekiijutsyo, ekyo nikitubaasisa kubuurira n’ababuurizi baingi. Bwanyima y’Ekiijutsyo, nitutaayaayira abo abaayorekire ngu nibenda kumanya ebirikukiraho abaizire aha Kiijutsyo kubahiga kwija kuhurikiza orubazo orw’omutaano orwa boona. Mbwenu shi noija kukoresa entebeekanisa egyo kuba payoniya omuhwezi?—Luk. 6:45.