Tihariho obu Tutashemereire Kubuurira
1. Nitumanya tuta ngu ababuurizi omu kyasha ky’okubanza bakaba batateekateeka ngu hariho obu batashemereire kubuurira?
1 Ababuurizi abeeziriki ab’omu kyasha ky’okubanza “tibararekire” kubuurira amakuru marungi buri hamwe ei baabaire bashanga abantu. (Byak. 5:42) N’ahabw’ekyo ku baabaire baba nibabuurira enju aha nju bakaba babuurira n’abu baabaire babugana omu nguuto. Kandi bakaba bateeraho kubuurira kitaraariire baaba nibagura ebintu omu katare baaheza kubuurira enju aha nju. Nka Yesu, bakaba batateekateeka ngu hariho obu batashemereire kubuurira.—Mak. 6:31-34.
2. Okwetwa Abajurizi ba Yehova nikimanyisa ki?
2 Butoosha Tube Twetebeekaniise: Okwetwa Abajurizi ba Yehova tikirikumanyisa eki turikukora kwonka; beitu nikyoreka eki turi obwire bwona. (Isa. 43:10-12) N’ahabw’ekyo butoosha twine kuba twetebeekaniise kubuurira abandi amatsiko agu twine n’obu twakuba tutariyo nitubuurira enju aha nju. (1 Pet. 3:15) Nooteeraho kuteekateeka aha mbeera ezirikukubaasisa kubuurira kitaraariire n’eki orikubaasa kugamba? Butoosha nooba oine ebitabo ebi orikubaasa kuha abo abaakunda ebi mwagaaniira? (Enf. 21:5) Noobuurira enju aha nju kwonka, nari noobuurira amakuru marungi omu miringo endiijo nk’oku embeera zirikukubaasisa?
3. Ahabw’enki tutashemereire kutwara okubuurira aha nguuto, omu myanya ei abantu barikukwatiramu ebiiruka, erikukorerwamu eby’obushuubuzi n’endiijo nk’egyo nk’ekitari kikuru?
3 Okubuurira omu Myanya Erimu Abantu Baingi: Nitubuurira aha nguuto, omu myanya ei abantu barikukwatiramu ebiiruka, erikukorerwamu eby’obushuubuzi n’endiijo nk’egyo. Mbwenu shi tushemereire kubuurira omu myanya egyo obu twayeyendera? Entumwa Paulo akagira ngu akabuurira “boona” nari omu myanya eyaabaire eba erimu abantu baingi n’enju aha nju. (Byak. 20:20) Okubuurira enju aha nju nigwo muringo gwaitu mukuru gw’okubuurira abantu amakuru marungi g’Obukama. Kwonka, ababuurizi omu kyasha ky’okubanza bakaba bata omutima aha abantu beitu gatari maju. Bakaba bakoresa buri kagisha koona kugamba aha mazima barikubuurira kitaraariire, omu myanya eyaabaire eba erimu abantu baingi, hamwe n’enju aha nju. Naitwe ka tuteereho kubatooreza turikwejumbira kimwe omu kubuurira.—2 Tim. 4:5.