Ekicweka Kisya Ekirikukwata aha Kutandika Kwegyesa Abantu Baibuli

1. Ni kicweka ki ekisya ekirikwija kuba nikiizira omuri Watchtower ey’abantu boona kandi kitebeekanisiibwe kukoresibwa kita?

¹ Kutandika n’okwezi oku, omuri Watchtower ey’abantu boona nihaija kuba nihiziramu ekicweka kisya kutuhwera kutandika kwegyesa abantu Baibuli. Kiine omutwe “Yega Ebiri omu Kigambo kya Ruhanga.” N’obu bamwe omu kicweka eki turikubuuriramu baraabe barikwija kukunda kweshomera ekicweka eki ahabwabo, kitebeekanisiibwe kutuhwera kuhikaanisa ebiteekateeko n’abantu omu kubabuurira.

2. Ekicweka eki kitebeekanisiibwe kita?

² Oku Kitebeekanisiibwe: Omutwe omuhango n’emitwe emikye eri omu muringo gw’ebibuuzo by’okubuuza ou orikubuurira. Ebyahandiikirwe ebiine kushomwa byorekirwe kwonka tibijuriziibwe, kugira ngu ou orikubuurira abaase kwega ebiri omu Kigambo kya Ruhanga arikushomayo. Obucweka ni bugufu kugira ngu ababuurizi babaase kubukoresa kuhikaanisa ebiteekateeko omu bugufu n’ou barikubuurira. Ebirikuba biri ahansi ya buri mutwe nibyoreka ahu orikubaasa kushanga ebirikukiraho omu katabo Eki Baibuli Erikwegyesa kukuhwera kutandika kwega n’omuntu omu katabo ako kyaba nikibaasika.

3. Twaba nitubuurira enju aha nju, nitubaasa kukoresa tuta ekicweka ekyo kutandika kwegyesa omuntu Baibuli?

³ Oku Turikubaasa Kukikoresa: Waaba noogaba zaamagaziini noobaasa kubuuza omuntu ekibuuzo ekirikubaasa kumureetera kwenda kumanya ebiri omu kicweka ekyo. Nk’eky’okureeberaho, Watchtower eya Jenwari 1 neegamba aha mugasho gwa Baibuli. Noobaasa kumubuuza oti: “Nootwara Baibuli nk’Ekigambo kya Ruhanga nari nk’ekitabo kirungi kwonka? [Tegyereza agarukyemu.] Aha hariho ekirikushemeza ekirikukwata aha nshonga egyo.” Mworekye ekibuuzo ky’okubanza, oshome akacweka k’okubanza kandi mushome omu Baibuli ekyahandiikirwe ekyorekirwe. Garuka oshome ekibuuzo kandi shaba ou orikubuurira kugamba eki arikuteekateeka. Murikukoresa ebibuuzo ebiriho enamba, muhikaanise ebiteekateeko aha biri ahansi y’omutwe ogwo nk’oku obwire buraababasise. Otakagyenzire, mworekye ekibuuzo ekirikukurataho ekiriho enamba kandi okore entebeekanisa kugaruka mukakigaaniiraho. Guma noogarukayo buri saabiiti kugaaniira nawe aha biri ahansi y’omutwe ogwo okuhitsya obu oraareete Watchtower endiijo. Omuringo ogundi n’okushaba omuntu kutandika kumwegyesa Baibuli aha murundi gw’okubanza kumubuurira. Reero okakoresa ekicweka ekiri omu magaziini egyo kumworeka oku arikubaasa kwega Baibuli.

4. Nitubaasa kukoresa tuta ekicweka eki twaba tugarukireyo aha barikwenda kumanya ebirikukiraho?

⁴ Noobaasa n’okukoresa ekicweka eki ekisya waaba ogarukireyo ahari abo abu orikuha zaamagaziini nari abandi abarikwenda kumanya ebirikukiraho. Noobaasa kugira oti: “Omuri Watchtower egi harimu ekicweka kisya. Ka nkworekye oku kirikubaasa kukoresibwa.” Twine amatsiko ngu ekicweka eki nikiija kubaasisa baingi ‘kuhika aha kumanyira kimwe amazima.’—1 Tim. 2:4.