Kakorese Obwire Bwona
1. Kaaturakiti Nooyenda Kumanya Amazima nikatuhwera omu kukora ki?
1 Kaaturakiti Nooyenda Kumanya Amazima? katebeekanisiibwe kutuhwera kutandika kwegyesa abantu Baibuli. Kwonka nitubaasa n’okukakoresa kujanjaaza embibo z’amazima. (Mub. 11:6) Aha hariho obuhabuzi bumwe oburikubaasa kutuhwera kukakoresa gye.
2. Nitubaasa kukoresa tuta kaaturakiti aka kutandika kubuurira omuntu?
2 Okutandika Kubuurira Omuntu: Kaaturakiti aka noobaasa kukaha ou orikubuurira, omworekye ebibuuzo mukaga ebikariho reero omubuuze oti: “Aha bibuuzo ebi nikiiha eki oraayebuurizeho?” Yaaheza kukugarukamu, musherure hamwe eky’okugarukamu ky’ekibuuzo eki yaatoorana omu kaaturakiti aka, reero mushome kimwe aha byahandiikirwe ebiriho. Mushomere nari omworekye omu bugufu ebiri enyima ahari kaaturakiti reero omuhe akatabo Eki Baibuli Erikwegyesa. N’obu yaakuba ataikiriize katabo aka, naaba yaatwara kaaturakiti akarikubaasa kumureetera kukunda amazima.—Mat. 13:23.
3. Ou orikubuurira yaaba aine bingi by’okukora noobaasa kukora ki?
3 Ou Orikubuurira Yaaba Aine Bingi by’Okukora: Noobaasa kumugira oti: “Obu oine ebi oriyo nookora, ka nkutsigire kaaturakiti aka. Kariho ebibuuzo bikuru mukaaga ebi baingi omuriitwe turikwebuuza kandi nikaha eby’okugarukamu bya buri kibuuzo kuruga omu Baibuli. Ku ndaagarukye noobaasa kungambira eki oyegiremu.”
4. Nitubaasa kugamba ki twaba nitugaba kaaturakiti aka turikubuurira aha nguuto?
4 Waaba Noobuurira aha Nguuto: Noobaasa kuramutsya omuntu reero ogire oti: “Oraayebuurizeho kimwe aha bibuuzo ebi? [Tegyereza agarukyemu.] Kaaturakiti aka nikooreka eby’okugarukamu ebirikushemeza ebirikuruga omu Baibuli.” Omuntu ogwo yaaba atari ha bwira, noobaasa kushoma nawe eky’okugarukamu kimwe kuruga omuri kaaturakiti aka kandi omuhe n’akatabo Eki Baibuli Erikwegyesa.
5. Nitubaasa kukoresa tuta kaaturakiti aka omu maka agu tutaraashangyemu bantu?
5 Omu Maka agu Mutaraashangyemu Bantu: Omu bicweka ebimwe ababuurizi nibakira kutsiga ebitabo omu maka agu batarikushangamu bantu. Ekibiina kyanyu ku kiraabe nikwo kirikutwaza kityo, nimubaasa kutsiga kaaturakiti Nooyenda Kumanya Amazima omu maka ago. Waagarukayo noobaasa kugira oti: “Obu twija aha, mukaba mutariho twatsiga kaaturakiti aka ahansi y’orwigi. Mbwenu aha bibuuzo ebi nikiiha eki orikwenda kutunga eky’okugarukamu kyakyo?”
6. Niki ekirikureetera kaaturakiti Nooyenda Kumanya Amazima kuba karungi k’okukoresa omu kubuurira?
6 Kaaturakiti Nooyenda Kumanya Amazima nikeegyesa amazima omu muringo gworobi. Nikahwera abantu b’ediini zoona n’enganda zoona. Korobi kukakoresa omu kubuurira, nangwa abaana n’ababuurizi abasya nibabaasa kukagaba. Nookakoresa obwire bwona kyaba nikibaasika?