Akabokisi k’Ebibuuzo

◼ Ni mu miringo ki ei turikubaasa kuhweramu baapayoniya?

Omu mwaka gw’obuheereza 2009, omu nsi yoona ab’eishe-emwe n’abanyaanyazi-itwe nka 800,000 bakaheereza nka baapayoniya ab’obutwire na baapayoniya ab’omutaano. Baapayoniya abo nibefeerereza obwire bwabo, amaani gaabo n’ebintu byabo kubaasa kujanjaaza amakuru marungi g’Obukama. (Enf. 3:9) Yehova ka aine kuba naashemererwa ahabw’okuteeraho kwabo! Ni mu miringo ki ei turikubaasa kworeka emiteekateekyere nk’eya Yehova tukahwera baapayoniya kwongyera kushemererwa n’okugumisiriza omu buheereza bwabo?

Ebigambo byaitu birungi nibibaasa kubahiga kugumizamu nibaheereza nka baapayoniya. (Enf. 25:11) Omu saabiiti nitubaasa kukora empindahinduka omu ntebeekanisa zaitu tubaase kubuurira nabo. Twaba nitubuurira nabo, nitubaasa kucwamu kukoresa motoka zaitu omu mwanya gw’okukoresa ezaabo nari tubashashurire esente zeengyenda. Twagyenda nabo omu motoka ezaabo, nitubaasa kubahwera aha nshohoza. (1 Kor. 13:5; Fil. 2:4) Kandi nitubaasa kushagika baapayoniya turikubakorera eby’obufura kandi obumwe tubeete omu maka gaitu kurya nabo.—1 Pet. 4:8, 9.

Ebyahandiikirwe nibihamya ngu Yehova naija kuha abo abarikwebembeza eby’Obukama bwe ebi barikwetenga. (Zab. 37:25; Mat. 6:33) Omuringo gumwe ogu arikukoramu eki n’okurabira omu b’eishe-emwe. (1 Yoh. 3:16-18) N’amazima, baapayoniya tibarikuteekateeka ngu abandi nibo baine obujunaanizibwa bw’okubahwera omu by’empiiha. Kandi nibabaasa n’okutagambira abandi baaba nibeetenga obuhwezi. Kwonka, nitubaasa kuhwera baapayoniya omu bi barikwetenga turikwetegyereza embeera ezi barimu.—2 Kor. 8:14,  15.

Obu Foibe omubuurizi omweziriki omu kibiina kya Kenkerea eky’omu kyasha ky’okubanza yaaza Rooma, Paulo akahiga ab’eishe-emwe b’omuri Rooma ati: “Mumwakiire omuri Mukama waitu, nk’oku kishemereire abarikwera, kandi mumuhwere omuri byona ebi aryetenga ahariimwe.” (Rom. 16:1, 2) Twine omugisha okworeka obushagiki nk’obwo ahari abo abari omu kibiina kyaitu abarikubuurira amakuru marungi n’obweziriki nka baapayoniya ab’obutwire na baapayoniya ab’omutaano.—Byak. 5:42.