Buurira n’Obweziriki!
1. Ni kuhiga ki kwa Paulo oku twine kutaho omutima omu bunaku obu?
1 ‘Buurira ekigambo n’obweziriki.’ (2 Tim. 4:2) Ahabw’enki okuhiga kwa Paulo okwo kuri kukuru omu bunaku obu? Ebigambo ebi nibibaasa kutukwataho bita hamwe n’abandi?
2. Ahabw’enki n’obweziriki twine kusherura abo abatakahikirwe amakuru marungi?
2 Amagara Nigatwarirwamu: Abantu nyamwingi omu nsi yoona baine kubuurirwa amakuru marungi agarikubabaasisa kucungurwa. (Rom. 10:13-15; 1 Tim. 4:16) Omu bicweka ebirikukira kubuurirwamu na hati nibikishangwamu abantu abandi baingi abarikwenda kumanya amazima. Twabuurira omu bicweka ebyo omu mazooba gatari gamwe nari omu shaaha zitari zimwe, nitubaasa kushangayo abantu abasya. Okusherura abantu n’obweziriki nk’okwo nikwija kutuhwera kutagira omutima ogurikweshinja nari kugiibwaho orubanja rw’eshagama yaabo.—Byak. 20:26.
3. Nitubaasa kukoresa gye tuta obwire bwaitu omu kubuurira?
3 Abakristaayo omu kyasha ky’okubanza ‘bakaijuza Yerusaalemu n’okwegyesa kwabo’ n’obu baraabe baahiganisiibwe munonga. (Byak. 5:28) Naitwe tumaririire ‘kubuurira hoona’? (Byak. 10:42) Twaba turi omu kubuurira, nitukoresa gye obwire bwaitu? Twaba twine kutegyereza abu twaba nitubuurira nabo, nituteeraho kubuurira abarikuba nibahingura?
4. Okubuurira n’obweziriki nikituhwera kita kuguma nitureeba?
4 Tweyongyere Kuba Abeeziriki: Obu emperu eri haihi, twine kweyongyera kuba abeeziriki kandi tukaguma nitureeba. (1 Tes. 5:1-6) Butoosha twaba nitugamba aha matsiko g’Obukama, nitwetantara okureka ebintu by’ensi egi kutumaramu amaani omu by’omwoyo. (Luka 21:34-36) Kandi oku turaagume ‘nitwijuka’ eizooba rya Yehova, nikwo turaahwerwe kweyongyera kwejumba omu murimo gw’okubuurira ogw’okukiza abantu.—2 Pet. 3:11, 12.
5. Okuha amagara ekitiinisa nikutuhiga kuta omu kubuurira?
5 Twabuurira n’obweziriki, nituba nitureeba amagara nk’oku Yehova arikugareeba. Ahakuba “tarikwenda muntu weena kuhwerekyerera, kureka naayenda ngu boona bahikye aha kweteisa.” (2 Pet. 3:9; Ezek. 33:11) Ka tumariirire kuhika aha bantu baingi nk’oku kirikubaasika, tukore byona kuhimbisisa Yehova!—Zab. 109:30.