Akabokisi K’ebibuuzo
◼ Ahabw’enki nikyetengyesa okucwamu kurungi aha bikwatiraine n’okukoresa esimu okubaasisa ab’eishe-emwe abari omu maka gaabo kuhurira ebiriyo nibyegyesibwa omu nteerane z’ekibiina?
Ebibiina bingi bibaasiise ab’eishe-emwe abatarikubaasa kuba omu nteerane z’ekibiina omu Kyombeko ky’Obukama ahabw’endwara nari oburemeezi obundi, kubaasa kuhuririra aha simu ebiriyo nibyegyesibwa omu nteerane bari omuka. Okuhamya ngu entebeekanisa egi yaagasira abo bonka abatarikubaasa kwija omu nteerane nikyetengyesa okucwamu gye n’okutebeekanisa gye. N’ahabw’ekyo, abareeberezi abu kirikukwataho baine kutebeekanisa kandi bakareeberera oku erikukoresibwa, kugira ngu “byona bikorwe gye, bitebeekanisiibwe.”—1 Kor. 14:40.
Abareeberezi baine kubanza n’ababuurizi ab’omu kibiina kyabo abaine endwara y’amaani etarikukira nari abamuga abatarikubaasa kuruga omuka. Omubuurizi orwaire nari ozingazingirwe, nari shi omwegi wa Baibuli orikweyongyera omumaisho omu by’omwoyo orikuba atarikubaasa kuruga omuka ahabw’obumuga, nawe naabaasa kugasirwa omu ntebeekanisa egi kandi nawe abarirwe omu baija omu nteerane. Omu bibiina ahu entebeekanisa egyo etarikubaasika, entebeekanisa ezindi nizibaasa kukoresibwa, nk’okubaha ebyayegyesibwa omu nteerane ebirikuba bikwatsirwe aha ntambi.
Buzima, okweizira omu nteerane nikugasha munonga okukira okukoresa entebeekanisa ezindi zoona. Okuba hamwe n’ab’eishe-emwe omu nteerane nikurugamu ‘okugumyana’ kandi nikuhwera abasya kumanya gye obukuru bw’okuba omu nteerane. Twaba turiho omu nteerane, nitugasirwa munonga omu by’okureeberaho, kandi nikibaasisa n’abareeberezi kuha buri omwe obuhwezi, kandi nitwereebera n’oku ab’eishe-emwe barikukundana. Buzima ekyo nikihikaana n’oku munyaanyazi-itwe okaikwire yaahuriire, obu ow’eishe-emwe yaamugwa omu kifuba aha Kyombeko ky’Obukama kandi munyaanyazi-itwe akagira ati: “Eki torikubaasa kukitunga kurabira aha simu!”—Rom. 1: 11, 12.
Nka Anna ‘owaabaire atoosha omuri hekalu,’ omu bunaku obu, baingi aha b’eishe-emwe na banyaanyazi-itwe abakaikwire nibateeraho kubaho omu nteerane z’ekibiina zoona nk’oku amagara gaabo n’embeera birikubabaasisa. (Luk. 2:36, 37) Abo abarikukoresa esimu kuhurira ebiriyo nibyegyesibwa omu nteerane, tibarikukitwara nk’ekirikwingana n’okuza omu nteerane aha Kyombeko ky’Obukama. Turikutooreza eky’okureeberaho kyabo kirungi, ka tugumizemu kuteeraho kuba omu nteerane kuramya Ruhanga waitu, Yehova.—Zab. 95: 1-3, 6; 122:1.