Okubuurira Orikukoresa Esimu Nikubaasa Kurugamu Ebirungi
1. Ahabw’enki okubuurira turikukoresa esimu gurikubaasa kuba omuringo mukuru omu kubuurira kwaitu?
1 Ahabw’enki nitubaasa kuteekateeka aha kukoresa esimu omu kubuurira kwaitu? Ahabw’okuba nagwo n’omuringo ogundi ogw’okuhweramu abantu kutunga okumanya okuhikire okurikubabaasisa kucungurwa. (2 Pet. 3:9) N’obu omuringo gwaitu omukuru ogw’okubuuriramu amakuru marungi g’Obukama bwa Ruhanga guraabe guri okubuurira enju aha nju, nitukoresa n’endiijo miringo kuhika ahari abo abarikuba batari mu maka gaabo.—Mat. 24:14; Luk. 10:1-7; Kush. 14:6.
2. Okubuurira turikukoresa esimu kutebeekanisiibwe kuta?
2 Oku Kutebeekanisiibwe: Nk’oku okubuurira enju aha nju kurikwetengyesa ekicweka ky’okubuuriramu, n’okubuurira turikukoresa esimu nakwo nikwetengyesa ngu ababuurizi baheebwe ekicweka ky’okubuuriramu. Nikubaasa kukorwa omubuurizi ari wenka nari ari n’abandi babiri nari bashatu. Omwanya ogu muraabe murimu tigushemereire kuba gurimu ebirikuyomba. Baingi nibashanga kirikuhwera kushutama haihi n’emeeza reero omu maisho gaabo batamu ebi barikukira kukoresa baaba nibabuurira enju aha nju.
3. Twaba nitubuurira turikukoresa esimu tushemereire kuguma nitwijuka ki?
3 Oku Tushemereire Kubuurira Turikukoresa Esimu: Twaba nitubuurira turikukoresa esimu, omu nyanjura yaitu tushemereire kuba nk’abarikugaaniira. Abamwe abarikuba nibatandika kubuurira omuntu aha simu, nibabaasa kumushomera enyanjura yaabo kwonka omu muringo gw’okugaaniira. Enyanjura eziri omu katabo Reasoning, omu Obuheereza Bwaitu obw’Obukama, hamwe n’omu kaaturakiti Nooyenda Kumanya Amazima? nizibaasa kuhwera omu nshonga egi. Waaba nookora enyanjura eyaawe, banza omanye eki orikwenda kugambaho, mubuuze ekibuuzo ekirikuhikaana n’eki waayanjura, kandi ba oyetebeekaniise kumushomera ebyahandiikirwe bikye ebirikugarukamu ekibuuzo ekyo. Noobaasa kumushaba kumuha ebitabo ebi murikugaba mwaba nimubuurira enju aha nju. Guma noijuka ebi: Gamba orikwetwara kandi otarikugambira ahaiguru. Ha ekitiinisa abu oraagambe nabo, ogire okugumisiriza kandi obe munywani waabo, ahakuba ebyo nibibaasa kworekyerwa aha simu. Hurikiza ou orikubuurira yaaba naagamba ebi arikuteekateeka, bwanyima musiime ahabw’ebi yaagamba. Yetantare kugamba aha ntebeekanisa y’okuhayo ayekundiire obu ekyo kirikubaasa kureebwa nk’okushaba empiiha z’esimu.
4. Okubuurira turikukoresa esimu nikutubaasisa kukora ki omu kicweka eki tuhairwe kubuuriramu?
4 Omuntu ou orikugamba nawe aha simu naabaasa kuba ari omurema, omurwaire nari omuntu ou emirimo ye erikutuma ataashangwa omu ka ye twaba nitubuurira enju aha nju. Hariho n’abandi abarikutuura omu nju ezetooroirwe engo kandi eziine abarinzi aha marembo kandi batarikwikiriza abagyenyi kutaahamu bataikiriziibwe. N’ahabw’ekyo, omu kuteeraho kuhikiiriza gye obuheereza bwaitu, tuteereho kukoresa omuringo ogurikurugamu ebirungi, ogw’okukoresa esimu.