Koresa Gye Baibuli
1. Ahabw’enki Baibuli eri ey’omugasho munonga?
1 Okumanya kukoresa Ekigambo kya Ruhanga, nikituhwera okubuurira n’okwegyesa gye amazima n’okusheeshuura enyegyesa z’ebishuba hamwe n’emigyenzo y’abantu.—2 Tim. 2:15; 1 Pet. 3:15.
2. N’enki ekiratuhwere kumanya gye ahu ebyahandiikirwe biri omu Baibuli?
2 Yeyongyere Kumanya gye Baibuli: Waguma nookoresa gye ekintu nooyeyongyera kumanya kukikoresa gye. Okushoma Baibuli okagiheza nikukuhwera kumanya eki erikushoboororaho. Kandi ekyo nikikuhwera kuguma noijuka ebyahandiikirwe n’okurahuka kubibona omu Baibuli. Ku orayeyongyere kumanya gye ebyahandiikirwe, noija kugamba n’omuhimbo kandi orikuhamya ebi orikugamba waaba noobuurira n’ekibiina nari kitaraariire.—1 Tes. 1:5.
3, 4. (a) Ni miringo ki emwe ei turikubaasa kukoresa kutuhwera kumanya kukoresa gye Baibuli? (b) Wakoreise emiringo endiijo kukuhwera kumanya gye Ebyahandiikirwe?
3 Teeraho kuguma nookuratira omu Baibuli yaawe waaba ori omu nteerane z’ekibiina. Waaba nooyeshomesa Baibuli na waaba noyetebeekanisiza enteerane z’ekibiina, shoma Ebyahandiikirwe ebyorekirwe kandi oteekateeke aha ku birikubaasa kukuhwera. Baingi bashangire ngu okushoma ebyahandiikirwe omu Baibuli hatari ahari kompyuta nari aha mpapura nikubahwera omu kusherura ebyahandiikirwe baaba nibabuurira.—Yoh. 14:26.
4 Amaka agamwe gataireho entebeekanisa y’okuteeraho kukwata ebyahandiikirwe omu mutwe. Eki nikibaasa kukorwa barikwejunisa orupapura oruhandiikireho ekyahandiikirwe ekyorekirweaha rubaju rumwe, kandi aha rubaju orundi hahandiikirweho ebigambo by’ekyahandiikirwe ekyo. Nibatwara embu kwijuka oku ekyahandiikirwe ekyo kirikugira nari ahu ebigambo by’ekyahandiikirwe birikushangwa omu Baibuli. Okwegyeza omu nyanjura z’okukoresa omu kubuurira n’omu kugarukamu ebibuuzo turikukoresa Baibuli nikituhwera kwongyera kukoresa gye Baibuli.
5. Ahabw’enki nitwenda kwongyera kumanya kukoresa gye Baibuli?
5 Tihariho kitabo ekindi ekyakubaasa kwingana na Baibuli. Baibuli niyo yonka erimu ebirikubaasa kuhwera abantu kutunga ‘obwengye bw’okuhabura omuhanda gw’okujunwa.’ (2 Tim. 3:15) Obu abantu baingi omu kicweka kyaitu batarikumanya gye eby’omuhendo ebirikushangwa omuri Baibuli, twine enshonga nungi y’okwongyera kumanya kukoresa gye Baibuli kubooreka eki Baibuli buzima erikwegyesa.—Enf. 2:1-5.