Oyetebeekanisiize Ekiihuro ky’eby’Omwoyo?
1. Niki ebirikutwarirwa omu kutebeekanisa ekiihuro?
1 Obugyenyi nibwetengyesa okutebeekanisa gye. Eby’okurya byine kutungwa, bikatekwa gye kandi bikagaburwa. Okugabura eby’okurya kwine kuba kutebeekanisiibwe gye. Ekindi, omwanya agurariirwemu eby’okurya gushemereire kuba gutebeekanisiibwe gye. Abagyenyi nabo baine kwetebeekanisa, na munonga baba baine kugyenda engyendo ndaingwa kuhikayo ahu obugyenyi buri. N’obu okutebeekanisa obugyenyi kuraabe nikutwariramu emirimo mingi, okurya ekiihuro n’abanywani, hamwe n’abanyabuzaare ni kishemeza. Abajurizi ba Yehova bari haihi kuteeranira hamwe omu nsi yoona ahabw’ekiihuro ky’eby’omwoyo, nirwo Oruteerane Oruhango orw’Ebiro Bishatu orwine omutwe “Mugume Nimureeba!” Ni bingi ebikozirwe omu kutebeekanisa puroguramu. Twena twetsirwe. Kugira ngu tubaase kuruzamu kandi turugasirwemu munonga, naitwe twine kurwetebeekanisiza.—Enf. 21:5.
2. Okubaasa kubaho ebiro byona bishatu eby’oruteerane nikyetengyesa ki?
2 Rugasirwemu omu Bwijwire: Waaherize kukora entebeekanisa eziraakubaasise kubaho ebiro byona eby’oruteerane orwo? Kyaba nikyetengyesa, shaba ou orikukorera kukwikiriza kubaho ebiro byona eby’oruteerane. Waaherize kutebeekanisa ebikwatiraine n’eby’engyenda hamwe n’eby’oburaaro? Abareeberezi baine kuhamya ngu abakaikwire, abamuga n’abandi abarikwetenga obuhwezi baabutunga.—Yer. 23:4; Gal. 6:10.
3. Ahabw’enki tutashemereire kuza omu ruteerane orw’ensi yoona oru tutetsirwemu?
3 Amahanga agamwe nigaija kubamu enteerane empango ez’ensi yoona. Guma noijuka ngu hariho ebibiina ebimwe ebyetsirwe kandi ngu hariho n’ab’eishe-emwe kuruga omu mahanga gatari gamwe na gamwe abeetsirwe kwija omu nteerane ezo. Omu kukora entebeekanisa ezi, ofiisi z’amataagi omu mahanga agarabemu enteerane ezi, zeetsire abantu kurugiirira aha buhango bw’omwanya ogu oruteerane ruraabemu n’oburaaro oburiho. Nihabaasa kubayo omwijuro, ababuurizi baaza omu ruteerane orw’ensi yoona oru batetsirwemu.
4. Niki ebiraatuhwere kuba twetebeekanisize kutandika na puroguramu y’oruteerane buri izooba?
4 Buri izooba, teeraho kuhika omu ruteerane bukiri kare kutunga omwanya puroguramu etakatandikire. Oruteerane rutakatandikire yetegyereze ebiri aha kapapura akariho puroguramu. Eki nikyija kukuhwera kutebeekanisa omutima gwawe ahabw’ebyo ebiraagambwe. (Ezr. 7:10) Obweshongoro oburikubanza kuburaatandikye, buhurikize gye orikwetebeekanisiza okwejumba omu kyeshongoro ekirikwigura oruteerane hamwe n’okushaba.
5. Nk’amaka nitubaasa kugasirwa gye tuta aha biri omu puroguramu?
5 Ab’eka emwe bashutama hamwe, abazaire nibaija kubaasa kuhwera abaana kuhurikiza gye omu ruteerane. (Bir. 31:12) Twena nituhigwa kukuratira omu Baibuli zaitu ebyahandiikirwe byaba nibishomwa. Okugira ebi waguma noohandiika nikibaasa kukuhwera kuhurikiza gye. Ebi oraahandiikye, bwanyima nibibaasa kukuhwera kwijuka enshonga enkuru omu mbazo. Yetantare okwimukyera nari okugambagamba oruteerane rurikugyenda omumaisho. Waaba oine esimu, hamya ngu tiyakuhuzya nari okuteganisa abandi. Mwaba muri omu kahuumuro, gaaniira na bagyenzi baawe aha byakushemeza omuri puroguramu.
6. Ni kintu ki ekikuru ekirikushangwa omu nteerane zaitu empango kandi nitubaasa kukigasirwamu tuta omu bwijwire?
6 Omu ruteerane orw’ebiro bishatu, twine omugisha gw’okushemererwa hamwe n’ab’eishe-emwe na banyaanyazi-itwe ekintu ekitarikushangwa mu nsi. (Zab. 133:1-3; Mak. 10:29, 30) Teeraho kweyanjurira abaraabe bashutami haihi naiwe kandi omu bwire bwa kyamushana oteereho kugaaniira nabo. Niyo nshonga ahabw’enki twine kureeta ebyokurya aha mwanya gw’oruteerane omu mwanya gw’okuza kubironda omu mahoteeri. Teeraho kureeba ngu tiwafeerwa omugisha gw’okwombekana.—Rom. 1:11, 12.
7. Tushemereire kwetebeekanisa tuta aha bikwatiraine n’ebi turaajware?
7 Eby’Enjwara: Nikyetegyerezibwa ngu Yehova akaragiira Abaisraeli kukora ebijwengye aha mikugiro y’ebijwaro byabo, n’okubaziira akenda ka bururu aharuguru y’ekijwengye. (Kub. 15:37-41) Aka kakaba kari akamanyiso akarikubaijutsya ngu n’abantu abatoorainwe kuramya Yehova. Obunaku obu, okujwara gye kwaitu omu ruteerane oruhango nikututaanisa aha b’ensi. Emijwarire yaitu mirungi neeha ekishushani kirungi abo abarikutureeba na twaba turi omu hoteeri bwanyima ya puroguramu. N’ahabw’ekyo, teekateeka aha bi oraajware bukiri kare.
8. Nitubaasa kubuurira abandi tuta twaba turi omu rurembo oruraabemu oruteerane oruhango?
8 Buurira: Twaba twetebeekaniise gye nitubaasa kubuurira abantu abari omu rurembo oruraabemu oruteerane. Ow’eishe-emwe omwe owaagyenzire n’omukazi we omu hoteeri kurya bwanyima ya puroguramu akorekyereza aha baagi ye reero yaabuuza omukozi w’omu hoteeri egyo ati: “Waareeba abantu baingi baine baagi nk’egi?” Omukozi akagarukamu, ati naabareeba kandi tindikumanya ahabw’enki buri omwe yaaba agijwire. Bakagumizamu nibagaaniira kandi ow’eishe-emwe yaayeta omukozi ogwo kwija omu ruteerane orwo.
9. Nitubaasa kworeka tuta ngu nitusiima Yehova orikutweta aha kiihuro?
9 N’obu ab’eishe-emwe baraabe nibaija kuha embazo zoona nari kugira abu baabuuza kuha eby’okureeberaho, Yehova Tataitwe, niwe arikuba atutebeekanisiize ekiihuro eki eky’eby’omwoyo buri mwaka. (Isa. 65:13, 14) Nitworeka ngu nitusiima Yehova otwetsire, turikubaho buri izooba kandi tukashemerererwa buri kacweka ka puroguramu ey’eby’okurya eby’omwoyo ebituhairwe. Waaherize kukora entebeekanisa zaawe zoona kubaasa kubaho ebiro by’oruteerane byona?
Obubokusi aha rupapura 6]
Eby’Okweijutsya Ebirikukwata aha Ruteerane orw’Ebiro Bishatu
◼ Eshaaha za Puroguramu: Puroguramu neija kuba neetandika shaaha 3:20 ez’Omukasheeshe ebiro byona bishatu. Emyanya y’oruteerane neija kuba neigurwa shaaha 2:00 ez’Omukasheeshe. Obweshongoro ku buraatandike, buri omwe ashemereire kutunga ah’okushutama kugira ngu puroguramu etandikye hatabaireho okuteganisibwa. Orwakataano n’Orwamukaaga puroguramu neija kuhendera shaaha 10:55 ez’omu mwabazyo reero aha Sande ehendere shaaha 10:00 ez’omu mwabazyo. Aha nteerane empango ez’ensi yoona puroguramu ey’Orwakana neija kutandika shaaha 7:20 ez’eihangwe kandi ehendere shaaha 10:55 ez’eihangwe.
◼ Ah’Okwemereza Ebiiruka: Aha myanya y’Enteerane yoona, ahu tutungire ah’okwemereza ebiiruka, abaraabanze kwija nibo barabyemerezeho. Abarema bonka nibo barikiirizibwe kwemereza ebiiruka byabo omu mwanya ogutsigiirweho abarema. Obu omwanya ogw’okwemerezamu ebiiruka gurikukira kuba guri mukye, abamwe baizire omu motoka za bataahi baabo nk’oku kirikubaasika.
◼ Okukwata Emyanya: Noobaasa kukwatira emyanya abu waija nabo nari abu orikutuura nabo bonka.
◼ Kyamushana: Nooshabwa kwija n’eby’okurya omu mwanya gw’okuza kubisherura ahandi omu shaaha za kyamushana. Noobaasa kureetera ebyokurya byawe omu kintu kikye eki orikubaasa kuta ahansi y’entebe. Ebintu ebihango, ebirikwatika, tibirikwikirizibwa aha mwanya gw’oruteerane.
◼ Okuhayo: Nitubaasa kworeka okusiima kwaitu turikuhayo twekundiire kushagika omurimo gw’Obukama ogurikukorwa omu nsi yoona, twaba turi omu Kyombeko ky’Obukama nari omu nteerane empango. Ceeka ezirikuheebwayo omu nteerane empango, zishemereire kuhandiikwa omu iziina ry’ekibiina eririkukoresibwa omu ihanga eryo.
◼ Zaabutandu: Haabaho orikwetenga obujanjabi obw’ahonaaho aha ruteerane oruhango, hikiirira omwe aha barikwakiira abantu oraahikiirire abarikukora aha by’obujanjabi omu ruteerane kugira ngu abakugu abo babaase kwetegyereza embeera ye kandi bamuhe n’obujanjabi oburikwetengyesa. Abarikukora aha by’obujanjabi obw’ahonaaho nibaija kureeba oku baraatware enshonga egi omu maisho.
◼ Eby’Okujwara omu Bigyere: Buri mwaka ni baingi abarikuhutaara ebigyere ahabw’okujwara enkaito zitashemeire. Omu mwanya gw’okujwara enkaito eziri nka silipa nari eziri aha murembe, ni kirungi okujwara enkaito ezirikukuhika gye ezirikukubaasisa kugyenda gye aha matembero n’ahandi.
◼ Okukwata eby’Aha Ntambi: Ebintu ebirikukwata eby’aha ntambi eby’omuringo gwona tibishemereire kuteebwa aha mashanyarazi nari aha byoma ebirikukoresibwa omu ruteerane kandi omu kubikoresa tibishemereire kuteganisa abandi.
◼ Obugaari bw’Abaana: Obugaari bw’abaana tibushemereire kureetwa aha mwanya gw’oruteerane. Kwonka eby’okushutamaho eby’abaana ebirikubaasa kuteebwa haihi n’abazaire baabo nibyikirizibwa.
◼ Eby’Emigaju: Enteerane ezi ezimwe niziba omu byombeko. N’ahabw’ekyo, nikiba kiri kirungi okutakoresa emigaju ey’amaani, erikubaasa kukora kubi abaine oburemeezi omu kwitsya.—1 Kor. 10:24.
◼ Foomu z’Okuhandiikaho Abo Abarikwenda Kwega Baibuli: Foomu Please Follow Up (S-43) eshemereire kukoresibwa kubaasa kuhandiika ebirikukwata aha muntu ogwo owaayoreka ngu naayenda kumanya ebirikukiraho bwanyima y’okumubuurira kitaraariire omu bwire bw’oruteerane. Ababuurizi bashemereire kwija na foomu Please Follow Up (S-43) emwe nari ibiri aha ruteerane. Foomu ezijuziibwe gye nizibaasa kuheebwa abarikukora aha by’ebitabo nari omuhandiiki w’ekibiina kyawe waaheza kugarukayo.—Reeba Our Kingdom Ministry aka Febwari 2005, rup. 6.
◼ Emyanya y’Okuriiramu: Haisa Yehova ekitiinisa orikutwaza gye omu myanya y’okuriiramu. Omu myanya mingi, abantu nibakira kuhayo akasiimo kurugiirira aha buheereza.
◼ Oburaaro: (1) Nooshabwa kutakwatisa ebishengye ebi otaraakorese, kandi otakaarenzya aha mubaro ogurikwikirizibwa kuraara omu kishengye ekyo. (2) Waaba nooyenda kushazamu okushaba kwawe, manyisa aba hoteeri bukiri kare. (3) Otakateekyera omu bishengye ebitarikwikirizibwa kuteekyerwamu. (4) Tsigira ogwo orikuboneza ekishengye akasiimo buri izooba. (5) Otakatwara eby’okurya ebirengire ahari ebyo ebi oshemereire kutwara ka tugire nka kyatsya n’ebindi ebirikuba biteereirweho abarikuraara omu hoteeri egyo. (6) Obwire bwona yoreka ebyana by’omwoyo orikukoragana gye n’abakozi ba hoteeri. Nibareberera abagyenyi baingi n’ahabw’ekyo nibashemererwa twayoreka embabazi, okugumisiriza n’obwengye. (7) Ku oraatungye oburemeezi omu kishengye omu orikuraara, manyisa abarikukora aha by’Oburaaro mwaba muri aha mwanya gw’oruteerane.