Okubuurira Nikwetengyesa Okugumisiriza
1 Okumara emyaka erengire 30, entumwa Paulo akaba naahurira amazirwe ahabw’okutwara omurimo gw’okubuurira nka mukuru. Nk’emirimo endiijo yoona, n’omurimo gwe gw’okubuurira gukaba gurimu oburemeezi. (2 Kor. 11:23-29) Kwonka, Paulo tararekire kubuurira. (2 Kor. 4:1) Akaba naamanya ngu amaani g’okubaasa kugumisiriza omu kubuurira kwe gakaba nigaruga ahari Yehova. (Fil. 4:13) Arikwihirira aha ky’okureeberaho kye kirungi eky’okugumisiriza, Paulo akagira ati: “Mukuratire emitwarize yangye, nk’oku naanye nkuratira Kristo.”—1 Kor. 11:1.
2 Okugumisiriza Okugyezibwa omu Obunaku Obu: Buri izooba, ab’eishe-emwe baingi nibajumwa, bahakanisibwa, nari bangwa abanyabuzaare, abu barikukora nabo, nari abu barikushoma nabo. (Mat. 10:35; Yoh. 15:20) Obundi naiwe nikyo kirikukuhikaho. Nari, noobaasa kuba oine endwara erikukuteganisa nari butoosha nooteeraho kurwanisa ebirikukuhuzya n’ebirikugyeza okwikiriza hamwe n’okugumisiriza kwawe. Nitubaasa kugarukamu amaani twayetegyereza eby’okureeberaho by’abaheereza abeesigwa aba ira nari eby’Abakristaayo bangyenzi baitu ab’obunaku obu ababaasize kusingura oburemeezi obu baatungire.—1 Pet. 5:9.
3 ‘Twajwara eby’okurwanisa byona ebya Ruhanga’ nitwija kutunga amaani g’okuguma nitubuurira. (Efe. 6:10-13, 15) Okushaba nakwo ni kukuru okubaasa kugumisiriza. Ruhanga naatuha omwoyo gwe kubaasa kugumisiriza okugyezibwa. (2 Kor. 6:4-7) Kubaasa kusingura Sitaane hamwe n’ensi ye, tushemereire kukuratira obuhabuzi bwa Ruhanga. (Zab. 119:24, 85-88) Nk’oku omwana arikubaasa kuguma naashoma ebaruha kuruga ahari ishe orikumukunda, okuguma nitushoma Baibuli buri izooba nikuhamya omukago gwaitu na Yehova. Kurabira omu kweshomesa, nitutunga obwengye bw’okugumisiriza ebigyezo tutyo twikiriza emiteekateekyere ya Ruhanga kwijura omu biteekateeko byaitu kandi kihamya okwikiriza kwaitu.—Enf. 2:10, 11.
4 Okugumisiriza Nikurugamu Ebirungi: Nk’oku kyabaire kiri ahari Paulo okugumisiriza kwaitu omu kubuurira nikushemeza omutima gwa Yehova kandi kurugamu ebirungi ahariitwe hamwe n’abandi. (Enf. 27:11) Ka tumariirire kugumisiriza omu kubuurira, tworekye ngu okwikiriza kwaitu kuhami kandi ngu ‘nikukiza ezaabu erikuhwaho obuguzi bwingi n’obu yaakuba egyeziibwe omu muriro.’—1 Pet. 1:6, 7.