Akabokisi K’ebibuuzo

◼ Nikiba kihikire abahurikiize okuteera omu ngaro bwanyima ya buri rubazo omu Ishomero ry’Obuheereza hamwe n’omu Ruteerane rw’Obuheereza?

Omuhangi Yehova, ku yaahangire ensi, “enyonyoozi z’akasheeshe zikeeshongorera hamwe, n’abaana ba Ruhanga boona baateera akaari k’okushemererwa.” (Yobu 38:7) Baamaraika ba Ruhanga aba bakaba baine ekyetengo ky’okuhimbisa Yehova ahabw’omurimo gwe gw’omutaano ogw’okuhanga, ogwabaire guri omuringo musya gw’okworeka obwengye n’oburungi bwe hamwe n’amaani ge.

N’ekintu kirungi itwe okworeka ngu nitusiima twihire aha mutima ahabw’ebi ab’eishe-emwe bataahi baitu barikukora n’ahabw’embazo ezi barikuha. Nk’eky’okureeberaho, nitukira kuteera omu ngaro ahabw’embazo ezirikuheebwa omu nteerane ez’omutaano, nk’enteerane ez’ekyanga n’ez’ebiro bishatu. Embazo ezirikuheebwa niziba zitwariire ab’eishe-emwe obwire oburikukira aha bu barikumara barikuteebekanisa embazo eza butoosha. Okuteera omu ngaro kwaitu nikworeka ngu nitusiima omurimo muhango ogu orikuha orubazo arikuba akozire, hamwe n’ahabw’obuhabuzi obu Yehova arikutuha kurabira omu Kigambo kye n’ekibiina kye.​—Isa. 48:17; Mat. 24:45-47.

Kandi shi okuteera omu ngaro bwanyima y’embazo omu Ishomero ry’Obuheereza n’omu Ruteerane rw’Obuheereza? Tihariho biragiro ebirikuzibira ekyo gwaba guri omuringo ogw’okworeka okusiimwa, ka tugire nk’omwegi yaaha orubazo rwe orw’okubanza. Kwonka, okuteera omu ngaro nikubaasa kuba nk’omugyenzo, kubure amakuru. N’ahabw’ekyo, titurikuteera omu ngaro bwanyima ya buri rubazo.

N’obu turaabe tutarikuteera omu ngaro ahabw’embazo z’omu Ishomero ry’Obuheereza n’omu Ruteerane rw’Obuheereza, hariho endiijo miringo ei twena turikubaasa kworekyeramu okusiima kwaitu ahabw’okwegyesibwa okwo n’ahabw’okuteeraho kw’abarikuziha. Ekyo nitubaasa kukikora tutarikuhuga kandi turikuhurikiza gye abarikuziha. Kandi bwanyima y’oruteerane, omuntu ahabwe naabaasa kusiima abaaha embazo.​—Efe. 1:15, 16.