Twena Haine Eki Turikubaasa Kuha Yehova
1 Noomanya ngu abantu nibabaasa kugira eki baaha Yehova? Abeeli akatambira Yehova gamwe aha matungo ge agaabaire nigakirayo oburungi, kandi Noa na Yobu nabo bakahayo ebitambo nk’ebyo. (Kut. 4:4; 8:20; Yobu 1:5) Buzima, ebitambo nk’ebyo tibiratungiise Omuhangi omu muringo gwona, ahabw’okuba ebintu byona n’ebye. Kureka ebitambo ebyo bikoreka rukundo mpango ei abashaija abo abeesigwa baabaire bainiire Ruhanga. Omu bunaku obu, nitubaasa kukoresa obwire bwaitu, amaani gaitu, n’ebintu byaitu omu kuheereza Yehova “ekitambo ky’okusiima.”—Heb. 13:15.
2 Obwire: Ka ni kirungi ‘okugura’ obwire kuruga aha bintu ebitari bikuru okubaasa kwejumbira kimwe omu kubuurira! (Efe. 5:15, 16) Obundi nitubaasa kukora empindahinduka omu bi turikukora tubaase kuheereza nka payoniya omuhwezi okwezi kumwe nari n’okukiraho omu mwaka. Nari nitubaasa kwongyera aha bwire obu turikumara omu kubuurira. Okwongyera kubuurira edakiika 30 ezindi buri saabiiti, nikiija kutuhwera kwongyeraho eshaaha ibiri aha ziturikumara omu kubuurira buri kwezi!
3 Amaani: Okubaasa kugira amaani g’okuza omu kubuurira nikyetengyesa ngu twetantare eby’okweshemeza n’emirimo ebirikuturutsya munonga bikaturemesa kugira kihango eki twakorera Yehova. Kandi titushemereire kwemereza munonga omutima ahakuba nikubaasa kutureetera “okweyinamirira,” kutumaremu amaani agu twakukoreise omu kuheereza Ruhanga. (Enf. 12:25) Buzima n’obu twakuba twine oburemeezi, ka ni kirungi ‘okwegyekyerera Yehova oburemeezi bwaitu’!—Zab. 55:22; Fil. 4:6, 7.
4 Ebi Twine: Nitubaasa kugira ebintu ebi twahayo kushagika omurimo gw’okubuurira. Paulo akahiga Abakristaayo bataahi be ‘okuguma nibagira eki baabiika’ butoosha kugira ngu bagire eki baaha bataahi baabo abakyene. (1 Kor. 16:1, 2) Omu muringo nigwo gumwe, nitubaasa kugira sente ezi twata aha rubaju kuzihayo kuhwera ekibiina eki turimu hamwe n’omurimo gw’okubuurira omu nsi yoona. Yehova naasiima eki turikuhayo twihire aha mutima n’obu kyakuba kiri kikye.—Luka 21:1-4.
5 Yehova atuhaire bingi. (Yak. 1:17) Nitworeka okusiima kwaitu turikukoresa obwire bwaitu, amaani, n’ebindi bintu kubaasa kumuheereza. Ku turikukora ekyo nitushemeza Yehova, “ahakuba Ruhanga akunda efura.”—2 Kor. 9:7.