Ripoota y’Okwombeka Eitaagi rya Ofiisi Erya Tanzania

Twine okushemererwa okubamanyisa ngu okwombeka eitaagi risya erya ofiisi hanu omuri Tanzania kukagyenda gye.

N’obu emirimo emikuru eraabe yaakozirwe ekitongore ekirikwombeka eky’omuri Tanzania, hakaba hariho ab’eishe-emwe na banyaanyaitwe 20 kuruga omu mahanga 8 abaakozire nakyo kuhamya ngu okwombeka kwagyenda gye. Ab’eishe-emwe aba okukira munonga bakaba bariho kuhamya ngu omurimo gwakorwa gye kandi ngu n’empiiha zaitu ezi turikuhayo twekundiire zaakoresibwa gye.

Zaaburi 127:1 nirugira: “[Yehova] ku aba atombekire nju, abombeki beeruhiza busha.” Nikireebeka gye ngu buzima Yehova akaha abantu be omugisha omu murimo gw’okwombeka ogu, ogurikuhwera omu kwongyera omu maisho omurimo gwaitu gw’okubuurira n’okwegyesa ogu Yesu yaaragiire abakuratsi be kukora. Okukoresa abombeki abatari bajurizi ba Yehova ti kintu kisya aha bantu ba Yehova. Nk’eky’okureeberaho, Sulemaani akapatanisa Hiraamu Omugabe wa Tuuro kumureetera embaaho z’emyereezi n’emiberooshi ez’okwombekyesa hekalu.

Yehova akaha entebeekanisa egi omugisha? 1 Abagabe 8:10, 11 nihagamba aha ku omu kuhayo hekalu ekitiinisa kya Yehova ekyareebekiire omu kicu kiijwire hekalu. Naitwe nitureeba ngu buzima Yehova akaha okwombeka kwaitu omugisha aha omuri Tanzania.

Nk’oku ebibiina byona byamanyisiibwe omu baruha, okwombeka kukatandika Mei 2, 2006. Omurimo omuhango gwahweire.

Omu byombeko ebi ebisya, harimu bishatu eby’okuraaramu ebya kanyinaibiri ebirimu ebishengye by’abantu 56, Ekyombeko ky’Obukama eky’okukoresibwa ab’aha Beseeli n’ab’omu bibiina ebiri haihi n’omwanya ogwo, ekyombeko kya kanyinaibiri ekirimu ofiisi, ah’okwogyeza emyenda, ah’okuriira, n’ekiyungu. Ohiyireho ebyo, twineho ekindi kyombeko ekirimu ahu ebitabo birikuhikira, n’aharikubiikwa ebintu byona ebirikukoresibwa omu kureeberera omwanya ogwo. Hariho ekyombeko ekirimu tanka ezirikubikwamu rita z’amaizi 50,000 n’ebyoma ebirikugagyegyena. Ahi tuhandiikiire ebi, ebyombeko byona bibaire byahweire okushakaara kandi n’omurimo gw’okubiboneza omunda gurikugyenda omumaisho.

Ebintu bingi ebikoresiibwe omu kwombeka oku n’ebirikuruga aha omu Tanzania. Kwonka, ebikwatiraine n’eby’amashanyarazi hamwe n’eby’amaizi bikagurwa kuruga seeri y’amayanja. Ab’eishe-emwe omu mataagi agandi bakahwera omu kutunga, okugura n’omu kwohereza ebintu ebyatairwe omu byombeko bya Beseeli yaitu nsya. Buzima nitusiima obuhwezi obu twatungire kuruga omu b’eishe-emwe omu nsi yoona.

Twine amatsiko kutaaha omuri Beseeli ensya omuri Maaci 2008. Nitushaba ngu Yehova ayongyere kuha omugisha okwombeka kwaitu, naimwe ab’eishe-emwe na banyaanyaitwe ahabw’omutima murungi ogw’okugumizamu kushagika eby’Obukama.

Niitwe ab’eishe-emwe,

Itaagi rya Ofiisi erya Tanzania