“Ebigambo Byanyu Bigume Biri . . . nk’Ebirimu Omwonyo”
1. ‘Ebigambo byaitu okubamu omwoyo’ nikimanyisa ki?
1 “Ebigambo byanyu bigume biri eby’embabazi, nk’ebirimu omwonyo, mubone kumanya oku mushemereire kugarukamu omuntu weena.” (Kol. 4:6) Ebigambo byaitu okubamu omwonyo nikimanyisa okukoresa ebigambo birungi hamwe n’okugamba omu muringo ogurikureetera abu turikugamba nabo kukunda ebi turikubagambira. Ni kikuru munonga okukora ekyo twaba nitubuurira.
2. Yesu akabaasa ata kubuurira Omusamariakazi?
2 Eky’Okureeberaho kya Yesu: Yesu ku yaabaire ahuumwireho haihi n’eiziba, akatandika kugamba n’Omusamariakazi owaabaire aizire kutaha amaizi. Emirundi mingi omu kugaaniira okwo, Omusamariakazi akagamba aha bintu ebyabaire nibyoreka obwangani obwabaire buri ahagati y’Abayudaaya n’Abasamaria okumara obwire buraingwa. Kandi akooreka ku arikwikiriza ngu Abasamaria bakakomooka ahari Yakobo, n’obu Abayudaaya bo baabaire nibagira ngu Abasamaria bakakomooka aha bantu abaabaire batari Bayudaaya. Omu mwanya gw’okuhakanisa ebi Omusamariakazi yaagambire, Yesu akagumizamu naagamba aha bi Omusamariakazi yaabaire naikiriza. Ekyarugiremu, Yesu akabaasa kuha obujurizi obwahwereire omukazi ogwo hamwe n’abantu b’omu rurembo orwo.—Yoh. 4:7-15, 39.
3. Nitubaasa kutooreza tuta eky’okureeberaho kya Yesu twaba nitubuurira?
3 Twaba nitubuurira tushemereire kuguma nitwijuka ekigyendererwa kyaitu—‘okubuurira amakuru marungi g’ebintu ebirungi.’ (Rom 10:15, NW.) Nitwenda kugaaniira n’ou turikubuurira aha bintu birungi kandi ebirikwombeka ebirikuruga omu Baibuli, kutari kworeka ngu nituhakanisa ebi arikwikiriza. Yaagamba ekitahikire, titushemereire kurahuka kumuhakanisa. Omu bi yaagamba harimu eki turikwikirizana nawe nari eki turikubaasa kwihiriraho tukamusiima? Obundi nitubaasa kwanjura ekyahandiikirwe turikugira tuti: “Oreebuurize yaaba eki nikibaasika?”
4. Tushemereire kukora ki ou turikubuurira yaatugambira kubi?
4 Kandi shi ou turikubuurira yaatugambira kubi nari akenda kutuhakanisa? Tushemereire kugumizamu nitworeka obucureezi omu mitwarize n’omu bigambo. (2 Tim. 2:24, 25) Omuntu yaaba atarikukunda amakuru g’Obukama, ni kirungi kumurugaho omu bwengye.—Mat. 7:6; 10:11-14.
5. Munyaanyaitwe omwe akatunga ata ebirungi kuruga omu kutwariza gye omuntu?
5 Ebirungi Ebirikurugamu: Munyaanyaitwe ku yaataireho kubuurira omukazi owaabaire naatuura haihi nawe, omukazi ogwo akamugarukamu kubi. Omu bucureezi, munyaanyaitwe akamugira ati: “Nsaasira. Kare osiibe gye.” Bwanyima ya saabiiti ibiri, omukazi ogwo akaiguza aha rwigi rwa munyaanyaitwe, yaamushaba okusaasirwa ahabw’oku yaamutwariize, kandi yaayoreka ngu hati naayenda kuhurikiza eki munyaanyaitwe yaabaire naayenda kumugambira. Okugarukamu gye nikukira kurugamu ebirungi!—Enf. 15:1; 25:15.
6. Ahabw’enki ni kikuru itwe kukoresa ebigambo birungi twaba nitubuurira?
6 Teeraho kukoresa ebigambo ebirimu omwonyo waaba noobuurira amakuru marungi. N’obu ou orikubuurira yaakuba atarikwenda kuhurikiriza, naabaasa kwenda kuhurikiriza omurundi ogundi Abajurizi ba Yehova baamubuurira.