Hwera Abeegi ba Baibuli Kuhinduka Ababuurizi b’Amakuru Marungi g’Obukama
1 Omurimo ogu Yesu yaahaire abeegi be ogurikugambwaho omuri Matayo 28:19, 20 buzima gukaba guri omurimo muhango. Abeegi ba Kristo bakaragiirwa kuhindura abantu baingi abeegi, abaabaire nabo nibaija kwongyera omu maisho omurimo gw’okuhindura abantu abeegi. Bakaba nibaija kutaho omusingye ogw’okubuurira amakuru marungi ag’Obukama bwa Ruhanga omu nsi yoona okw’aha muheru omu bwire obu obw’emperu obu turimu.—Mat. 24:14.
2 Abu turikwegyesa Baibuli nibabaasa kuba bari abaana baitu nari abandi bantu abarikwenda kwega Baibuli naitwe. Buzimazima nitwenda kuhwera abantu nk’abo kumanya obujunaanizibwa obu bo baine, obw’okuhwera abandi kuhinduka abakuratsi ba Yesu Kristo.—Luka 6:40.
3 Batebeekanise Kuha Obujurizi: Higa abo abu orikwegyesa Baibuli kubuuriraho abandi ebi barikwega. Bagambire aha birikugaruramu amaani ebirikuruga omu kubuurira. Tendeka abaana baawe kuruga omu buto kwejumba omu buheereza okurugiirira aha kubaasa kwabo. (Zab. 148:12, 13) Omu bigambo n’omu bikworwa, yoreka ngu nootwara omurimo gw’okubuurira nka mukuru munonga omu magara gaawe.—1 Tim. 1:12.
4 Yehova naakoresa abo bonka abarikwikiriza kandi bakagyendera aha mitindo ye ey’okuhikiirira. N’eky’amazima, ababuurizi abasya tibarikumanya bingi nk’ababuurizi abeehaireyo kandi ababatiziibwe, abaherize omwanya muraingwa nibabuurira. Kwonka abasya baine kuba nibaikiriza kandi barikubaasa kushoboorora enyegyesa za Baibuli ezirikutandikirwaho. (Reeba akatabo Organized, rup. 79-82.) Bwanyima y’okwetaanisiza kimwe ahari ‘Babulooni Orurembo Orukuru’ n’okurekyeraho kwejumba omu by’obutegyeki, bashemereire kuba nibaija omu nteerane z’ekibiina obutoosha.— Kush. 18:2, 4; Yoh. 17:16; Heb. 10:24, 25.
5 Waaheza kureeba ngu ou orikwegyesa Baibuli ahikire kuba omubuurizi otakabatiziibwe, oshemereire kumanyisa omureeberezi orikwebembera akakiiko k’abareeberezi. Naija kukora entebeekanisa kugira ngu abareeberezi babiri bagaaniireho n’omwegi waawe muri hamwe okureeba yaaba ahikire kutandika kubuurira n’ekibiina nk’omubuurizi w’amakuru marungi g’Obukama otakabatiziibwe. Obwo noija kugira omugisha gw’okwongyera kutendeka ou orikwegyesa Baibuli orikugyenda nawe kubuurira.