Gira Ekigyendererwa ky’Okutandika Kwegyesa Omuntu Baibuli
1 “Munagye amaisho, mureebe emisiri ku eyezire, ku ehikire kugyeshwa.” (Yoh. 4:35) Ebigambo ebyo ebyagambirwe Yesu Kristo, buzima nibikwata n’aha bwire obu Abakristaayo ab’ebiro ebi barimu.
2 Hakiriho abantu b’emitima egororokire abaine ekyetengo ky’okwegyesibwa emihanda ya Yehova. Eki nikireebekyera aha mubaro gw’abeegi abasya abarikubatizibwa buri mwaka. Ku oraabe buzima oine ekyetengo ky’okwegyesa omuntu Baibuli, noobaasa kukora ki?
3 Taho Ekigyendererwa: Eky’okubanza, taho ekigyendererwa ky’okutandika kwegyesa omuntu Baibuli butoosha. Guma noijuka ekigyendererwa kyawe waaba noobuurira. Obu omurimo gwaitu ogw’Ekikristaayo gurikutwariramu okwegyesa hamwe n’okubuurira, twena hamwe tushemereire kusherura oku twakwongyera kwejumba omu murimo gw’okwegyesa abantu Baibuli.—Mat. 24:14; 28:19, 20.
4 Ebindi Ebi Tushemereire Kuguma Nitwijuka: Ababuurizi b’Obukama bashemereire kushaba baihire aha mutima. Obumwe nitubugana abantu abashabire Ruhanga kubahwera kwetegyereza Baibuli. Ka n’omugisha Yehova okutukoresa okuhika aha bantu nk’abo kandi tukabegyesa!—Hag. 2:7; Byak. 10:1, 2.
5 Munyaanyaitwe omwe akashaba ngu atungye omuntu ow’okwegyesa Baibuli, na bwanyima yaatangarika obupapura bwa turakiti erikwetwa Okayenzire Kweyongyera Kumanya Ebirikukwata Ahari Baibuli? ahi yaabaire naakorera. Omukazi omwe ku yaihireho ka turakiti kamwe, akakashoma, kandi akatandikiraho kwijuza endagiriro eri enyima yaako, munyaanyaitwe akagamba nawe kandi yaabaasa kutandika kumwegyesa Baibuli.
6 Ababuurizi bataahi baitu abarikumanya gye kutandika kwegyesa omuntu Baibuli nibabaasa kukuhwera kuhikiiriza ekigyendererwa kyawe eky’okwegyesa omuntu Baibuli. Shaba Ruhanga kukuhwera omu kuteeraho kwawe kutunga ow’okwegyesa Baibuli kandi koresa obuhwezi bwona oburiho kuhikiiriza ekigyendererwa kyawe. Obundi noobaasa kurahuka kutunga ow’okwegyesa Baibuli n’okushemererwa okurimu.