Akabokisi K’ebibuuzo

◼ Ni birango bya muringo ki ebishemereire kuhanikwa aha mwanya ogurikuhanikwaho ebirango by’ekibiina?

Omwanya ogurikuhanikwaho ebirango omu Kyombeko ky’Obukama niguba guriho ebirikukwata aha mirimo y’ekibiina. Tihaine ekishemereire kuhanikwaho, orikwebembera akakiiko k’abareeberezi atakiikiriize.

Ebirikukira kuhanikwaho ni: Entebeekanisa y’Oruteerane ry’Obuheereza hamwe n’ey’Eishomero ry’Obuheereza n’abarikuba baine embazo omu nteerane ezo, embazo za boona ezirikuza kuheebwa, orikuza kwebembera Oruteerane rwa Boona hamwe n’orikuza kushoma Watchtower, abari omu bubiina bw’Okushoma Ekitabo okw’Ekibiina n’emyanya ei obubiina obwo burimu, ekirango ekirikworeka obu omureeberezi orikutaayaayira ebibiina araataayaayire ekibiina, n’amakuru agandi agarikukwata aha kutaayaaya kwe, amakuru agarikukwata aha nteerane empango, hamwe n’entebeekanisa z’okuboneza Ekyombeko ky’Obukama. Obumwe abareeberezi nibashabwa kuhanikaho amabaruha nari ebindi birango. Haagira ekindi ekyayetengyesa kuhanikwaho, akakiiko k’abareeberezi nikabaasa kucwamu yaaba kishemereire kuhanikwaho.

N’obu ekirango kigufu ekirikukwata aha kugaitwa okurikuza kubaho omu Kyombeko ky’Obukama kiraabe nikibaasa kukorwa omuri rumwe aha nteerane z’ekibiina, ekirango nk’ekyo tikishemereire kuhanikwa aharikuhanikwa ebirango by’ekibiina. Kandi nikiba kitahikire kuhanikaho ebirango ebirikukwata aha nteerane ezitaine kakwate n’emirimo y’ekibiina.​—Reeba The Watchtower, eya Apuri 15, 1984, orupapura 15; Kingdom Ministry, eya Gyuni 1975, orupapura 4, n’eya Mei 1970, orupapura 8.

Omwanya ogurikuhanikwaho ebirango gushemereire kuguma guboneire kandi gurikureebeka gye. Gushemereire kuba guri muhango ekirikumara kubaasa kugiibwaho ebyagambwaho byona. Entebeekanisa ezitakyetengyesa hamwe n’ebirango ebindi ebi ekibiina kyaherize kumanya bishemereire kurahuka kwihwaho. Ebibiina ebirengire ahari kimwe byaba nibiteeranira omu kyombeko kimwe, buri kibiina kishemereire kugira ahaakyo nari akacweka akaakyo. Nitushaba ngu orikwebembera akakiiko k’abareeberezi nari ou atooraine agume ashwijume omwanya ogwo kuhamya ngu ebihanikirweho ni bitsya, bishemereire kuhanikwaho kandi ngu nibireebeka gye.