Abazaire Mute Emicwe Mirungi omu Baana Baanyu
1 Emicwe mirungi omuntu tarikuzaarwa nayo, kandi nabwe terikwereeta yonka. Okuta emicwe mirungi omu baana nikitwara obwire. Okwegyesa abaana n’omurimo ogurikukorwa mporampora. Abazaire baine kuguma nibakikora butoosha kubaasa ‘kugumizamu nibarera [abaana baabo] omu kuhana kwa Yehova kandi barikubatamu emiteekateekyere ye.’—Efe. 6:4, NW.
2 Tandika Kuruga omu Buto: Abaana bato nibakira kurahuka kwega n’okwenda kukora ebintu bisya. N’obu kiraabe nikigumira abantu bakuru kwega orurimi orundi, abaana abatakatandikire eishomero bo nibabaasa kwega endimi ebiri nari ishatu omurundi gumwe. Otakaateekateeka ngu omwana waawe yaaba akiri muto munonga tarikubaasa kwega emicwe mirungi. Omwana waatandika kumwegyesa amazima g’omu Baibuli kuruga omu buto kandi okagumizamu nomwegyesa, naakura ebiteekateeko bye birimu okumanya okurikwija kumuhaisa “obwengye bw’okumuhabura omuhanda gw’okujunwa.”—2 Tim. 3:15.
3 Guma Noobuurira Nawe: Omucwe murungi ogu oine kuta omu mwana okiri muto n’ogwo ogw’okubuurira amakuru marungi g’Obukama bwa Ruhanga butoosha. Abazaire baingi nibakora eki barikutandika kugyenda n’abaana baabo bakiri bato omu kubuurira enju aha nju. Abazaire baayejumba omu murimo gw’okubuurira butoosha nikihwera abaana baabo kukunda kubuurira n’okugira omujinya omu kubuurira. Abazaire nibabaasa kworeka abaana baabo oku baine kubuurira omu miringo yoona ey’okubuuriramu.
4 Abaana okuza omu Ishomero ry’Obuheereza nakyo nikibahwera. Niribeegyesa emiringo mirungi y’okweshomesa n’oku baine kushoma bakeetegyereza. Nibeega okuhikaanisa ebiteekateeko n’abantu ahari Baibuli, okugarukayo ahari abo abarikwenda kumanya ebirikukiraho n’oku baine kwegyesa abantu Baibuli. Okubatendeka omu muringo ogwo nikubaasa kubahiga kuba baapayoniya n’okwenda kwejumba omu buheereza bw’omutaano. Baingi abari aha Beseeli n’abarikuheereza nk’abamisani, nibaijuka obwire obu baabaire bari omu Ishomero rw’Obuheereza kandi bareeba ngu rikabatendeka gye.
5 Twena turi nk’eibumba omu ngaro z’Omubumbi Omukuru Yehova. (Isa. 64:8) Eibumba ryaba riri ribisi, niriba ryorobi kubumbwa. Kwonka ku ririkwoma niriba ritoorobi kubumbwa. Nikwo n’abantu bari. Baaba bakiri bato nibaba batagumire kutendekwa kandi waatendeka abaana bakiri bato nibaba ab’omugasho. Omu myaka yaabo y’obuto nibabaasa kutendekwa babe ab’omugasho nari babe babi. Nk’omuzaire orikufayo, tandika kare kutendeka gye omwana waawe orikugyenda nawe omu kubuurira.