Noobaasa Kubuurira Ota Omusiraamu?
1 Ku oraabe oraabuuriireho Abasiraamu, oketegyereza ngu nibaikiririza omu Ruhanga. Kwonka tibarikwetegyereza gye ebirikukwata ahari Paradiso eraabeho omu nsi eyaagambirweho baanabi ba Yehova kandi ekyo nikyo turikwenda kubabuuriraho. (1 Tim. 2:3, 4) Ebiri ahaifo nibiija kutuhwera kubabuurira.
2 Abasiraamu nibaikiririza omuri Allah, nari Ruhanga, kandi baikiriza ngu Muḥammad ni nabi wa Ruhanga. Ekitabo kyabo ekirikwera ni Koran, kandi ediini yaabo neeyetwa Obusiraamu, ekirikumanyisa “okwehayo.” Koran neyoreka ngu okubeiha n’okuramya ebishushani ni kibi, kandi ngu Ruhanga n’omwe tari mu bushatu. Neyoreka ngu omwoyo tigurikufa, ngu hariho omuriro ogutaraara kandi ngu Paradiso neija kuba omu iguru. Abasiraamu nibaikiriza ngu Baibuli n’Ekigambo kya Ruhanga, kwonka ngu ekahindurwa kandi baikiriza ngu Koran yo tehindwirwe ahabw’okugira ngu ekaguma omu rurimi oru yaahandiikirwemu.
3 Ba Omucureezi Kandi Okorese Okwetegyereza: Waaba n’obuurira Omusiraamu, gamba nawe omu muringo gw’obucureezi kandi okorese okwetegyereza. (Enf. 25:15) Guma noijuka ngu Abasiraamu bahamiire munonga aha nyegyesa zaabo ezi baayegyesiibwe kukuratirira eryo. N’ahabw’ekyo, tibarikuhikaanisa ebiteekateeko baaba nibeega enyegyesa z’ediini yaabo kubaasa kumanya ebi Ruhanga akunda. (Rom. 12:2) Twaba nitubuurira Abasiraamu twine kugumisiriza kandi tukakoresa okwetegyereza.—1 Kor. 9:19-23.
4 Waaba noobuurira yetantare kukoresa ebigambo ebirikubaasa kureetera Omusiraamu kukutwara nk’omwe aha Bakristaayo b’ebishuba. Yoreka butunu ngu tori Munyakaturiki, Omuporotesitanti nari ow’ediini ez’ebishuba ezindi. Gamba ahari Baibuli nk’Ekitabo kya Ruhanga. Obu Abasiraamu batarikwendera kimwe kuhurira ebigambo “Omwana wa Ruhanga” ti kirungi kubikoresa okwega kutakahamire. Kwonka Yesu noobaasa kumugambaho nka nabi nari entumwa. Yetantare empaka. Waareeba ngu haaza kubaho empaka, rugaho omu busingye ogyende.
5 Ni kirungi kubuurira omuntu omwe omu mwanya gw’okubuurira baingi omurundi gumwe. Butoosha ni kirungi abakazi kubuurira abakazi n’abashaija bakabuurira abashaija. Kwonka ekyo kyaba kitarikubaasika nituba twine kukoresa okwetegyereza. Kandi Abasiraamu nibakwatwaho munonga emijwarire y’abakazi. Banyaanyazi-itwe bashemereire kuguma nibaijuka ekyo.—1 Kor. 10:31-33.
6 Ebi Turikubaasa Kugambaho: Gamba butunu aha bushoboorozi bwa Ruhanga na rukundo ye. Otakaayeziringa kworeka ngu ori omwikiriza ow’amazima, ngu Ruhanga n’omwe kandi tari mu bushatu, ngu okuramya ebishushani tikihikire. Noobaasa kugamba aha bubi oburi omu nsi omu bunaku obu nk’entaro, emivuyo omu by’obutegyeki, okushoroora omu nganda n’oburyarya oburi omu madiini maingi.
7 Akatabo The Guidance of God—Our Way to Paradise nikaija kukuhwera kumanya ebindi ebi orikubaasa kukoresa kubuurira Abasiraamu. Katebeekanisiibwe kuhwera Abasiraamu abarikubaasa kwikiriza kwega Baibuli.
8 Oku orikubaasa kukagaba: “Mbaire ninshoma ebirikukwata aha nyikiriza yaanyu naashanga ngu nimwikiririza omuri Ruhanga omwe ow’amazima na baanabi boona. [Tegyereza agarukyemu.] Niinyenda kugamba naiwe aha bunabi oburikworeka ngu ensi neija kuhinduka Paradiso. Nitubaasa kureeba eki nabi yaahandiikire. [Shoma Isaaya 11:6-9.] Obunabi obu nibuhikaana n’ebiri omu Koran ebiri omu katabo aka.” Za aha rupapura 9 omu katabo Guidance of God, reero mushome hamwe ebiri omu nyuguta ezikwatsire ebirikworeka ngu abahikiriire nibaija kuhungura ensi. Noobaasa kugumizamu orikuhikaanisa nawe ebiteekateeko aha biri aha rupapura 7 kuhika 9. Mutsigire akatabo reero okore nawe entebeekanisa kugarukayo.—Reeba enyanjura endiijo, omu Our Kingdom Ministry aka Febwari 1998, orupapura 6, akacweka 27.
9 Waaba nooyega n’omuntu omu katabo Guidance of God, ni kirungi kugira ngu nimuhikaanisa ebiteekateeko kwonka beitu kutari kwega Baibuli. Mwaheza kwega akatabo ako, nimubaasa kutandika kwega burocuwa Amakuru Marungi nari akatabo Eki Baibuli Erikwegyesa. Ebindi ebitebeekanisiibwe kuhwera Abasiraamu nibitwariramu turakiti, How to Find the Road to Paradise, n’akatabo The Time for True Submission to God, na burocuwa Real Faith—Your Key to a Happy Life.
10 Nk’oku twareeba bimwe ebirikukwata aha nyikiriza z’Abasiraamu n’ebitarikubashemeza nitubaasa kukoresa okwetegyereza kucwamu ebitabo ebi turaabahe n’oku turikubaasa kukikora. Nitubendeza emigisha ya Yehova omu kuteeraho kwanyu kuhwera abantu b’emiringo yoona kutakira eiziina rye ngu babaase kujunwa.—Byak. 2:21.