6 Nikubaasa Kutugasira?

OKUSHABA shi nikutugasira? Baibuli neeyoreka ngu abaheereza ba Ruhanga abeesigwa nibagasirwa bashaba. (Luka 22:40; Yakobo 5:13) Nangwa, okushaba nikutuhwera kuba gye omu by’omwoyo, kutunga obusingye bw’omu biteekateeko, n’omu by’omubiri. Kuta shi?

Ka tugire ngu omwana waawe yaatunga ekiconco. Noija kumwegyesa ngu nikimara kwehurira gye? Nari noija kumwegyesa kworeka okusiima? Twayoreka enyehurira zaitu omu migambire, nikihamya ngu eki twaheebwa nitukitwara nka kikuru. Mbwenu shi titushemereire kukora nikyo kimwe twaba nitugamba na Ruhanga? Eego buzima! Teekateeka aha by’okureeberaho bimwe.

Okushaba turikusiima. Twayebaza Tataitwe ahabw’ebintu birungi ebi atuhaire, nituba nituta omutima aha migisha waitu. N’ekirikurugamu, nitwongyera kusiima, kugira okushemererwa, n’okuta omutima aha bintu birungi.—Abafilipi 4:6.

Eky’okureeberaho: Yesu akasiima Ishe ahabw’okuhurira okushaba kwe, kandi akakugarukamu.—Yohaana 11:41.

Okushaba okusaasirwa. Twashaba Ruhanga okutusaasira, omuntu waitu ow’omunda naahama, nitwongyera kweteisa, kandi nikworeka ngu nitumanya buhango bw’ekibi kyaitu. Kandi nitutunga obuhuumure ahabw’okutarengwa amaganya g’ekibi.

Eky’okureeberaho: Daudi akashaba kworeka ngu ayeteisize kandi ngu aine obusaasi.—Zaaburi 51.

Okushaba kutunga obuhabuzi n’obwengye. Nitushaba Yehova kukuhabura nari tuha obwengye kubaasa kucwamu gye kandi tukaguma turi abacureezi. Okushaba nikubaasa kutwijutsya obugarukiro bwaitu, kandi kutuhwere kwesiga Tataitwe ow’omu iguru.—Enfumu 3:5, 6.

Eky’okureeberaho: Sulemaani omu bucureezi akashaba obuhabuzi n’obwengye by’okwebembera ihanga rya Israeli.—1 Abagabe 3:5-12.

Okushaba twaba twine amaganya. Twaba nituteganisibwa omu biteekateeko tukashaba Ruhanga twihire aha mutima naija kutuhuumuriza, kandi nitwija kwesiga Yehova omu mwanya gw’okweyesiga.—Zaaburi 62:8.

Eky’okureeberaho: Omugabe Asa akashaba obu yaataahirirwa abazigu.—2 Obusingye 14:11.

Okushabira abandi kutunga ebirikwetengyesa. Okushaba nk’okwo nikworeka ngu titurikweyendeza, kureka nitugirira abandi embabazi n’esaasi.

Eky’okureeberaho: Yesu akashabira abakuratsi be.—Yohaana 17:9-17.

Okushaba turikuhimbisa Yehova. Twahimbisa Yehova ahabw’emirimo n’emitwarize ye erikutangaaza, nitwongyera kumuha ekitiinisa n’okumusiima. Kandi ekyo nikituhwera kwirira haihi Tataitwe Ruhanga.

Eky’okureeberaho: Daudi akahimbisa Ruhanga ahabw’ebi yaahangire.—Zaaburi 8.

Kandi twashaba nitutunga “obusingye bwa Ruhanga oburengire okwetegyereza kw’omuntu weena.” (Abafilipi 4:7) Okuguma otuurize omu ensi erimu amaganya ti kyorobi. Nangwa nitugasirwa n’omu by’omubiri. (Enfumu 14:30) Kwonka shi nikibaho hataine eki tukozire? Nari hariho kintu kikuru ekirikutwarirwamu?