Orubazo Rw’aha Rushozi

Yesu ku yaaherize kutoorana entumwa 12, akaruga aha rushozi yaashuuma ahu abantu baingi baabaire beeteeraniire. Bakaba baarugire Galilaaya, Buyudaaya, Tuuro, Sidoni, Siria, n’omuri Yorudani. Bakareeta abantu abaabaire barwaire kandi abamwe bakaba nibabonabonesibwa baadaimoni. Yesu akabatambira boona. Bwanyima akashutama aha rushozi yaatandika kubeegyesa. Akashoboorora ebi twine kukora twaba nitwenda kuba banywani ba Ruhanga. Twine kumanya ngu nitwetenga Yehova kandi tukeega kumukunda. Kwonka titurikubaasa kukunda Ruhanga twaba tutarikukunda abantu. Twine kugirira abantu boona embabazi, otwariiremu n’abazigu baitu.

Yesu akagira ati: ‘Tikirikumara okukunda banywani baawe bonka. N’oba oine kukunda n’abazigu baawe kandi okasaasira oyihire aha mutima. Omuntu yaakugirira ekiniga, ahonaaho omushabe kukusaasira. Twariza abandi nk’oku orikwenda ngu bakutwarize.’

Yesu akaha abantu obundi buhabuzi burungi aha by’obutungi. Akabagira ati: ‘Ni kikuru munonga kuba banywani ba Yehova okukira okugira esente nyingi. Omushuma naabaasa kwiba esente zaawe, kwonka tihariho orikubaasa kwiba omukago gwawe na Yehova. Mutemereza omutima aha by’okurya, eky’okunywa, nari ebijwaro. Mureebe ebinyonyi. Butoosha Ruhanga naabiha eby’okurya. Okwemereza omutima tikirikwija kukureetera kwongyeraho eizooba na rimwe. Ijuka, Yehova naamanya ebi orikwetenga.’

Abantu bakaba batakahuriraga omuntu orikugamba nk’oku Yesu yaabaire naagamba. Abeebembezi baabo b’ediini bakaba batarikubeegyesa ebintu ebi. Ahabw’enki Yesu yaabaire ari omwegyesa mukuru? N’ahabw’okugira ngu byona ebi yaayegyeise bikaba niburuga ahari Yehova.